Read Jinghpaw Hanson Version Bible PRU MAT 26 Bible Online

PRU MAT 26 - Jinghpaw Hanson Version Bible bible

PRU MAT 26

¹Dai hta kaga di sumpan sum mung, nba grang shi dang hte nang galaw lu na rai ndai; kaboi ngut sai mani ai lachyit ri hte, sawm tsit ai, hkyeng mang ai, hkyeng tsawm ai ri a, ka chye ai masha ka ai Hkerubim sumla kap ai, nang galaw lu na rai ndai.

²Nba grang langai mi a galu de dawng hkun matsat, nda de dawng mali rai nna, nba grang langai mi a shadawn hte maren mahkra hte a rai na rai nga ai.

³Nba grang manga hte hpe langai hte langai matut lu na rai nga ai; bai nba grang manga hte hpe langai hte langai matut lu na rai nga ai.

⁴Shing rai matut ai nba grang a shakung hku, sawm tsit ai ri hte shangwang hku shakau na rai ndai: dai hte maren nba grang kaga a shakung hku mung dai zawn di na rai nga ai.

⁵Nba grang langai mi hta shangwang hku manga shi, bai matut nga ai kaga langai mi a shakung lam mi hta shangwang hku manga shi di nna, dai shangwang hku shada hkrum hkrum di na rai nga ai.

⁶Ja hte chinghkyi manga shi nang galaw lu nna, dai chyinghkyi hte nba grang yan hpe mahkai ma-ut nna, dai sumpan sum langai sha rai na rai nga ai.”

⁷Bai dai sumpan sum, galup na matu bainam mun hte da ai nba grang shi langai nang galaw lu na rai ndai.

⁸Nba grang langai mi a galu de dawng sumshi, nda de dawng mali rai nna, nba grang shi langai hte ting maren rai na rai nga ai.

⁹Bai nba grang manga hte hpe nang langai sha di nna matut na rai wu ai; nba grang kru hpe mung, langai sha di nna matut na rai wu ai: kru ngu na nba grang hpe gaw sum a ndaw maga de katsu tawn na rai wu ai.

¹⁰Matut ngut sai nba grang langai mi a shakung lam mi hta shangwang hku manga shi, bai langai mi a shakung lam mi hta shangwang hku manga shi, nang galaw lu na rai ndai.

¹¹Magri hte chyinghkyi manga shi nang galaw nna, dai chyinghkyi ni hpe shangwang hku ni hta mahkai matut na rai wu ai: shing di matut nna dai sum gaw langai sha rai na rai nga ai.

¹²Dai ntsa htap na nba grang kra ai ka-ang hkup hpe gaw, sumpan sum a nbang maga de shayat tawn na rai wu ai.

¹³Dai sum a maga mi hte maga mi de kra nga ai nba grang dawng dawng, dai sumpan sum hta maga mi hte maga mi de yat nga nna, dai hpe magap nga na matu rai na rai nga ai.

¹⁴Bai dai sum galup na matu jaw shahkyeng ai sagu la hpyi hte magap langai mi, de a ntsa e tahkisha hpyi hte magap langai mi, nang galaw lu na rai nga ndai.

¹⁵Dai sumpan sum a shakum matu, marau hpun hte hpunpyen shadun mung, nang galaw lu na rai ndai.

¹⁶Hpunpyen langai mi a galu de dawng shi, nda de dawng me lahkam mi rai na rai nga ai.

¹⁷Dai hpunpyen ni mahkra hpe, langai mi hta dawhkai lahkawng hkawng galaw bang nna, dai yawng hpe yan sha di shachyaw na rai wu ai: shing rai sumpan sum a hpunpyen mahkra hpe nang galaw na rai ndai.

¹⁸Dai sumpan sum a matu dingda maga de hpunpyen hkun, nang galaw su na rai ndai.

¹⁹Dai hpunpyen hkun a htumpa de na matu gumhpraw hte machyaw mali shi nang jaw lu na rai ndai: hpunpyen langai mi hta na dawhkai lahkawng a matu, machyaw lahkawng hkawng rai na rai nga ai.

²⁰Dai hte maren sumpan sum a kaga maga, dai dingdung maga matu mung hpunpyen hkun rai na rai nga ai:

²¹de a matu mung gumhpraw machyaw mali shi jaw nna, langai mi a htumpa e machyaw lahkawng hkawng rai na rai nga ai.

²²Dai sumpan sum a nbang ngu na sinna maga a matu mung hpunpyen kru galaw lu na rai ndai.

²³Dai sumpan sum a nbang jut lahkawng a matu hpunpyen lahkawng nang galaw na rai ndai.

²⁴Dai lahkawng hpe htumpa de e kahtap nna, matu de na shanghkawng du hkra maren di lu na rai nga ai; shing rai dai jut lahkawng rai na rai nga ai; dai gaw dai jut lahkawng a matu rai na rai nga ai.

²⁵Shing rai hpunpyen matsat hte da a gumhpraw machyaw shi kru rai na rai nga ai: hpunpyen langai mi a htumpa e machyaw lahkawng hkawng, rai na rai nga ai.

²⁶Bai marau hpun hte htinggrang mung nang galaw lu na rai ndai; sumpan sum shakum maga mi de na matu htinggrang manga nga rai na rai nga ai;

²⁷bai sumpan sum a nbang ngu na sinna maga de na matu htinggrang manga rai na rai nga ai.

²⁸Ka-ang na htinggrang gaw nbang npan hkren jut htuk htuk, tawk dinghkren ai rai na rai nga ai.

²⁹Dai hpunpyen ni hpe ja hte nang kayawp nna, htinggrang dinghkrawn na matu ja shanghkawng galaw na rai ndai: dai htinggrang ni hpe mung ja hte sup lu na rai ndai.

³⁰Dai bum e nang hpe madun dan sade ai kasi hte maren, sumpan sum hpe nang sharawt da lu na rai wu ai.

³¹Bai, sawm tsit ai, hkyeng mang ai, hkyeng tsawm ai hte kaboi ngut sai lachyit ri hte nba shinggang langai mi nang galaw lu na rai ndai: dai gaw, ka chye ai masha galaw ai Hkerubim sumla kap ai rai na rai nga ai:

³²gumhpraw machyaw mali hta jung tawn ai ja hte sup sai marau hpun shadaw mali hta nang dai hpe noi da na rai wu ai: dai hta noi ai chyinghkyi mung ja rai na rai nga ai.

³³Dai nba shinggang hpe chyinghkyi ni hta noi grang nna, nba shinggang a kun kata de dai sakse sumpu shawn tawn da na rai wu ai: shaloi dai nba shinggang gaw, dai chyoi pra ai shara hte chyoi pra htum ai shara hpe, karan ginhka na ra ai.

³⁴Dai chyoi pra htum ai shara na sakse sumpu hta dai chyeju magap hpe nang magap da na rai wu ai.

³⁵Dai nba shinggang a shinggan ngu na de dai ku hpe tawn da nna, sumpan sum a dingda maga, dai ku hte tawtap e, dai pyengdin shadun tawn da na rai ndai: dingdung ngu na maga de dai ku tawn da na rai nga ai.

³⁶Bai dai sum a chyinghka a matu sawm tsit ai, hkyen mang ai, hkyeng tsawm ai hte kaboi ngut sai lachyit ri a ka chye ai masha da ai chyinghka grang langai mi mung, nang galaw na rai ndai.

³⁷Dai chyinghka grang noi na matu, marau hpun hte shadaw manga nang galaw nna, ja hte sup na rai wu ai: de a chyinghkyi ni mung ja rai na rai nga ai; de a matu mung machyaw manga, magri hte nang jaw lu na rai ndai.