Read Jinghpaw Hanson Version Bible PRU MAT 3 Bible Online

PRU MAT 3 - Jinghpaw Hanson Version Bible bible

PRU MAT 3

¹Ya Mawshe gaw shi a katsa Yehtru ngu ai Midian hkinjawng a sagu bainam hpung rem nna nga nga ai: dai hpung ni hpe nam jahtum de shi gawt sa wa wu ai rai nna, Horeb ngu ai Karai Kasang a bu de sa du ai.

²Shaloi Karai Kasang a lamu kasa gaw, singwum hta wan grung ai hte shi kaw dan pru ai: dai hpe shi yu yu wu yang, yu u, wan grung nga timung singwum gaw n hkru mat nga ai.

³Dai rai nna Mawshe gaw, Singwum hpa rai n hkru mat ai kun, mauhpa lam kaba wora hpe ngai sa yu se ga, nga ai.

⁴Shi sit sa wa ai hpe Yehowa mu wu yang, Karai Kasang gaw, “Mawshe e, Mawshe e,” nga nna dai singwum kata na shi hpe shaga pru ai: shi gaw, “Nang rai nga nngai,” ngu nna htan wu ai.

⁵Shaloi Karai Kasang gaw, “Nang de hkum sit nit; na a kyepdin raw kau u; dai nang kabye ai ga gaw chyoi pra ai shara rai nga ai,” nga nna mung;

⁶“Ngai gaw na nwa a Karai Kasang, Abraham a Karai Kasang, Isak a Karai Kasang, Yaku a karai Kasang rai nga nngai,” nga nna mung, tsun wu ai: dai rai nna Mawshe gaw, Karai Kasang hpe yu na hkrit wu ai majaw, shi a myi man magap da wu ai.

⁷Bai Yehowa gaw, “Egutu mung e nye a amyu hkrum ai ru tsang lam hpe ngai azin ayang mu se ai rai nna, shanhte a hpareng ni a majaw hkrap sharung ai nsen hpe ngai na ya mase ai: shanhte hkrum ai nni nkri hpe ngai chye nga nngai:

⁸shanhte hpe Egutu masha ni a lata na hkye hkrang la na hte dai mung kaw nna, Hkanan, Hiti, Amori, Hperizi, Hiwi hte Yebusi masha ni nga ai, ja kat ai hte kaba nga ai, nga chyu hte lagat jahku lwi ai mung de woi wa na ngai yu sa ring ngai.

⁹Ya, yu u, Israela a kashu kasha ni a hkrap sharung ai nsen gaw ngai kaw du ra ai; Egutu masha ni shanhte hpe zingri zingrat ai mayam amu hpe mung ngai mu se ai.

¹⁰Dai majaw, ya sa wa su, nye a amyu Israela a kashu kasha ni hpe Egutu mung na sa shapraw la lu na, ngai nang hpe Hpara-u hpang de shangun dat de ga,” ngu nna tsun wu ai.

¹¹Shaloi Mawshe gaw Karai Kasang hpe, “Ngai gaw Hpara-u hpang de sa na mung, Israela a kashu kasha ni hpe Egutu mung na shaw la lu na mung, ngai hpa hkaw ai wa rai nga a ta?” ngu wu ai.

¹²Bai Karai kasang gaw, “Ngai nang hte rau teng teng nga na ring ngai; ngai nang hpe shangun dat ai kumla gaw, Dai amyu hpe Egutu mung na nang shapraw wa nhtawm, ndai bum hta e nanhte Karai Kasang hpe naw jau lu ai rai na ra ai,” ngu wu ai.

¹³Bai Mawshe mung, “Yu u, Israela a kashu kasha ni hpang de ngai sa du nna, Nanhte a nji nwoi ni a Karai Kasang gaw ngai hpe nanhte hpang de shangun dat nngai,” ngu mawe yang, shanhte mung, “Dai Karai Wa a amying ningsang kaning nga lu ta?” nga nna san dam yang, “Ngai kaning ngu bai htan na rai ta?” ngu nna Karai Kasan hpe san wu ai.

¹⁴Shaloi Karai Kasang gaw, “Ngai rai nga nngai hte maren ngai wa rai nga nngai; Ngai Wa Rai Nga Nngai nga ai wa gaw nanhte hpang de ngai hpe shangun dat ni ai, ngu nna Israela a kashu kasha ni hpe nang tsun na rai ndai,” ngu nna Mawshe hpe tsun wu ai.

¹⁵Bai Karai Kasang gaw Mawshe hpe, “Nanhte a nji nwoi ni a Karai Kasang, Abraham a Karai Kasang, Isak a Karai Kasang, Yaku a Karai Kasang ngu ai shangun dat ni ai, ngu nna Israela a kashu kasha ni hpe nang tsun na rai ndai: dai gaw htani htana na nye a amying rai nga na li ai; dai gaw prat mi hte prat mi na nye a masat dingsat mying rai nga na li ai.

¹⁶Sa wa su, Israela a salang ni hpe jahpawng nhtawm shanhte hpe ning ngu mu: Nanhte a nji nwa ni a Karai Kasang, Abraham, Isak, Yaku kaw dan pru nna, Ngai nanhte hpe gaja wa kawan yu nna, Egutu mung e nanhte hpe di ai lam ngai mu se ai;

¹⁷dai Egutu mung a ru tsang ai hta na ngai nanhte hpe shaw la nna, Hkanan, Hiti, Amori Hperizi, Hiwi hte Yebusi masha ni nga ai, nga chyu hte lagat jahku lwi ai mung de woi la na made ai, ngu nga nngai, nga nna ngai hpe tsun ai, ngu mu.

¹⁸Shanhte mung na a ga madat na ma ai; shing rai, nang hte Israela a salang ni gaw Egutu hkawhkam kaw shang nna, Hebre masha ni a Karai Kasang Yehowa gaw anhte hte hkrum sai; dai rai nna, anhte a Karai Kasang Yehowa hpe hkungga jaw lu na nam mali de lam masum ya sat sa lu na ahkang anhte hpe jaw mi, ngu nna shi hpe tsun na rai myit dai.

¹⁹Egutu hkawhkam chyawm gaw, nsam kaba sha n hkrum hkrum gaw, nanhte hpe sa wa na ahkang jaw na myit dai n rai, ngai chye nngai.

²⁰Shaloi ngai gaw nye a lata sharawt nna Egutu mung hta e ngai di dat na nye a mauhpa amu nlang hte hte dai mung hpe ari jaw na we ai: dai hpang shi nanhte hpe dat dat na ra ai.

²¹Ndai amyu hpe Egutu masha ni a man e ngai myi man pa shangun na mawe ai rai nna, nanhte pru wa lu ai shaloi kaman pru wa na myit dai n rai:

²²numsha hkum shagu tinang a htingbu hte, tinang a nta shingbyi ai num kaw nna gumhpraw rai, ja rai hte hpun palawng hpyi la nna, nanhte a shayi shadang sha ni hpe shanawn na marin dai: shing rai nanhte gaw Egutu masha ni hpe akrin atsai di kau na marin dai, ngu nna Mawshe hpe tsun dat wu ai.