Read Jinghpaw Hanson Version Bible PRU MAT 31 Bible Online

PRU MAT 31 - Jinghpaw Hanson Version Bible bible

PRU MAT 31

¹Bai Yehowa gaw Mawshe hpe ga tsun nna,

²“Yu u, Yuda lahkung hta na Uri a kasha Hura kashu Bezalela hpe amying hte ngai shaga se ai:

³shi gaw aja, gumhpraw, magri dup amu hte, nlung ka nna hkrep ai amu, hpun tawk ai amu hte hpaji amu lam baw sumhpa chye wa na,

⁴hpaji hparat, zai byeng-ya chye chyang ai lam hte seng ai hpaji amu baw sumpa chye nna,

⁵reng hkik ai amu galaw chye na matu, Karai Kasang a wenyi shi hta ngai jahpring se ai.

⁶Bai, yu u, shi hte shingtau na, Dan lakung hta na Ahisamak a kasha Aholiaba hpe mung ngai san da se ai: shing rai, ngai nang hpe hkang da mada yawng hte, myit hpaji rawng ai ni chye galaw lu hkra, shanhte a myit hta hpaji hparat ngai bang ya mase ai:

⁷dai rai nna shanhte gaw dai shawa sum, dai sakse a matu sumpu hte de a ntsa na magap, dai sum hte seng ai arai ni nlang hte hte;

⁸muk ku hte de a arai nlang, jet ai pyengdin hte de a arai nlang, manam pyaw nat ai hkungri;

⁹wan nat hkungga nawng ai hkungri hte de a arai nlang, ntsin htung hte de a shadun ku;

¹⁰hkinjawng amu gun hpai yang na matu, hkinjawng Arun a reng hkik ai hte chyoi pra ai hpun palawng mung, shi a shadang sha ni a hpun palawng mung;

¹¹chya na namman hte chyoi pra ai shara e lang na manam pyaw ai baw mung, ngai nang hpe hkang da mada hte maren shanhte galaw na rai ma ai,” ngu wu ai.

¹²Bai Yehowa Mawshe hpe shaga tsun wu ai gaw,

¹³“Israela kashu kasha ni hpe nang ning ngu na rai ndai: Ngai san da ai Laban nhtoi gaw nanhte gaja wa hkan nga na rai myit dai; kaning rai nme law, nanhte hpe shachyoi shapra ai Yehowa ngai rai nga nngai gaw nanhte chye lu na matu, dai gaw nanhte a shu mashi shu masha prat dingsa hta e nanhte hte nye a lapran e sakse kumla tai nga na rai nga ai.

¹⁴Dai rai nna, dai laban nhtoi hpe nanhte hkan nga lu na rai myit dai; dai gaw nanhte a matu chyoi pra nga ai: dai hpe shabyak ai wa gaw teng teng si lu na rai nga ai; dai nhtoi hta amu bungli galaw ai wa kadai rai timung, shi a amyu hta na sumri gadoi kau ai hkrum lu na rai wu ai.

¹⁵Kru ya nhtoi tup makan bungli galaw lu na rai nga ai; sanit ya nhtoi chyawm gaw, Yehowa a chyoi pra ai laban ban na nhtoi kaba rai nga ai: laban nhtoi hta amu bungli galaw ai wa gaw teng teng si lu na rai nga ai.

¹⁶Dai re ai majaw Israela kashu kasha ni prat mi hte prat mi na, htani htana ga shaka tai nga na matu, dai laban nhtoi hpe tut shanang hkan nga lu na rai ma ai.

¹⁷Dai gaw ngai hte Israela kashu kasha ni a lapran e htani htana na kumla tai nga na rai nga ai: kaning rai nme law, Yehowa gaw sumsing lamu hte ginding aga hpe kru ya laman e hpan hpajang da nna, sanit ya ngu na nhtoi hta ban sa nga ai hte nsa awai la wu ai,” ngu wu ai.

¹⁸Shing rai Karai Kasang gaw Sina bum ntsa e Mawshe hte shaga ngut jang, shi a layung hte ka ai sakse ga kap ai lungpa lahkawng shi hpe ap ya dat wu ai.