Read Jinghpaw Hanson Version Bible PRU MAT 32 Bible Online

PRU MAT 32 - Jinghpaw Hanson Version Bible bible

PRU MAT 32

¹Ya dai bum e Mawshe na na nga mat ai hpe amyu masha ni mu ma yang, shanhte gaw Arun kaw hpawng sa nna, “Rawt u, anhte a shawng e sa wa na hpara, anhte a matu galaw ya mi: anhte hpe Egutu mung na woi wa ai wa, dai Mawshe hta hpa byin sai gaw, anhte n chye saga ai,” ngu nna tsun mu ai.

²Shaloi Arun mung, “Nanhte a madu jan, kasha ni a na e kai ai ja shanghkawng ni hpyu la nna ngai kaw la sa marit,” ngu nna shanhte hpe tsun mu ai.

³Dai rai nna amyu masha ni nlang tinang a na e kai ai ja shanghkawng ni raw la nna Arun kaw la sa mu ai.

⁴Arun mung dai hkap la nna, sumprang hte shajut nhtawm, dumsu kasha sumla jaw wu ai: dai ngut jang shanhte gaw, “Israela amyu e, hpara ndai gaw Egutu mung na nang hpe shaw wa ai, na a hpara rai nga ai law,” nga ma ai.

⁵Arun mung dai hpe mu jang, de a man e tawn hkungri gaw nhtawm, “Hpawt ni na nhtoi gaw Yehowa a matu poi nhtoi rai nga ai, nga nna ga shabra dat wu ai.”

⁶Hpang jahpawt jau jau shanhte rawt nna, wan nat hkungga nawng ai hte mahku hkungga la sa mu ai: amyu masha ni mung lusha let dung nga ma ai; bai ka manau na nga rawt ma ai.

⁷Dai rai nna Yegowa gaw Mawshe hpe, “Nang yu wa su; Egutu mung na nang shaw wa ai na a masha ni gaw byak mat masai:

⁸ngai hkang da ai lam hta na shanhte alawan dam mat wa nna, dumsu sumla jaw nhtawm, Israela amyu e, hpara ndai gaw Egutu mung na nang hpe shaw wa ai, na a hpara ni rai nga ai law, nga nna tsun let dai sumla man e nawku nna hkungga nawng nga masai,” ngu nna tsun wu ai.

⁹Dai hta kaga Yehowa gaw Mawshe hpe, “Ndai amyu hpe ngai yu yu mase ai, du ja ai baw rai nga ma ai:

¹⁰dai rai nna, nye a pawt sindawng ai kahtet nga nna ngai shanhte hpe atsai awai di kau lu hkra, ngai hkrai chyu nga n ga: shing rai ngai nang hpe sha amyu kaba shatai na de ai,” ngu nna tsun wu ai.

¹¹Mawshe chyawm gaw shi a Karai Kasang Yehowa hpe, “Yehowa e, nsam kaba hte n-gun rawng ai lata e Egutu mung na nang shaw wa ai na a amyu hpe hpa rai pawt bu nga n ta?

¹²Karai Kasang gaw myit magaw myit nna shanhte hpe nam mali hkan e sat kau ai hte ga ntsa na shanhte hpe shaprai kau na sha shaw wa wu ai, nga nna Egutu masha ni tsun shara hpa rai sharawng na rai ta? Na a pawt bu ai masin hpe shakawp la u; na a amyu hpe ning rai ari jaw na myit gaw kayin kau u.

¹³Nang tsun ndai hte maren, Nanhte a amyu matu hpe sumsing lamu na shagan ni zawn ngai shalaw na made ai rai nna, ngai ndat da ai ga ndai mahkra nanhte a amyu matu ni hpe ngai jaw nna, dai hpe prat dingsa shanhte madu nga lu na mara ai, nga nna, nang hkum dai hta, nang gang dagam ai ga lu la ai ni, ngu ai, na a mayam Abraham, Isak, Israela hte hpe dum u law,” ngu nna hpyi nem wu ai.

¹⁴Yehowa mung shi a amyu hpe ari jaw na lam tawn da ai myit kayin la wu ai.

¹⁵Shaloi Mawshe gaw dai sakse lungpa lahkawng la lang let kayin nna dai bum na yu wa ai: dai lungpa lahkawng a man lahkawng yan hta, maga mi hte maga mi de ka nga ai.

¹⁶Dai lungpa yan gaw Karai Kasang galaw ai lungpa yan hta Karai Kasang galaw ai lungpa rai nga ai: laika hkum mung, dai lungpa yan hta Karai Kasang ka jahkang ai laika rai nga ai.

¹⁷Amyu masha ni jahtau garu ai nsen Yawshu a wu yang, “Dai dap de hpyen gasat grau re nga ai,” ngu nna Mawshe hpe tsun wu ai.

¹⁸Mawshe gaw, “Ngai na ai nsen gaw, ninglaw nna garu ai mung n rai, sum nna jahtau ai mung n rai: mahkawn mangoi ai she rai re nga ai,” ngu wu ai.

¹⁹Shing rai dai dap de du wa yu yang, dumsu kasha hte ka nga ma la ai hpe wa mu wu ai; dai majaw Mawshe masin pawt bu nna, dai lungpa yan hpe shi lata na jahkrat kau ai hte dai bum lagaw e agrawp kau wu ai.

²⁰Shanhte galaw ai dumsu kasha hpe mung shi la nna, wan hta ju nhtawm, ayun ayaw rai hkra rin wu ai; dai hpe hka hta run bun nhtawm, Israela kashu kasha ni hpe lu shangun mu ai.

²¹Shing rai Mawshe gaw Arun hpe mung, “Ndai amyu hta nde wa kaba ai yubak shapraw na gaw, shanhte nang hpe kaning di ma ta?” ngu nna san wu yang,

²²Arun gaw, “Madu e, masin hkum pawt et; ndai amyu n hkru ai myit rawng ai gaw nang chye nga ai myit rawng ai gaw nang chye nga ndai;

²³shanhte mahtan, “Anhte a shawng e sa wa na hpara anhte a matu galaw ya mi; Egutu mung na anhte hpe woi wa ai wa dai Mawshe hta hpa byin sai gaw anhte n chye ga ai, nga nna ngai hpe sa tsun ma ai majaw,

²⁴ngai mung, Ja lu ai wa kadai mung, raw mu ga, ngu mawe ai: dai hte maren shanhte ngai kaw ja la sa nna, dai hpe wan hta ngai bang we yang, ndai dumsu kasha pru wa ai,” ngu nna htan wu ai.

²⁵Shing rai amyu masha ni kabrawng mat wa nna, shanhte a hpyen ni a man e shatan shara rawng hkra, Arun e shaprang dat wu ai hpe, Mawshe mu wu yang,

²⁶dai dap chyinghka lam e shi tsap da nna, “Yehowa hpang maga de naw nga ai ni kadai mung, ngai kaw wa marit,” ngu wu ai, shaloi Lewi shadang sha ni nlang shi kaw wa hpawng ma ai.

²⁷Shaloi shi gaw, Israela Karai Kasang Yehowa ning nga ai: “Nanhte hkum shagu tinang nang a nhtu hpye nhtawm, dai dap maga mi de na chyinghka kaw nna, maga mi de na chyinghka du hkra dinghkrang hkawm nna, langai hte langai tinang a hpunau, tinang a mangang wa, tinang a htingbu wa hpe sat mu, nga ai,” ngu nna shanhte hpe hkang dat wu ai.

²⁸Mawshe hkang dat ai hte maren Lewi a shadang sha ni galaw ma ai rai nna, dai shani e amyu masha ni hta na marai hkying masum daram si mat ma ai.

²⁹Bai Mawshe gaw, “Dai ni Yehowa nanhte hpe shaman ya myit ga, langai hte langai tinang a shadang sha, tinang a hpunau wa hpe hpyen na, nanhte a hkum hpe Yehowa a matu san tawn mu,” ngu wu ai.

³⁰Bai hpang jahpawt mung Mawshe gaw amyu masha ni hpe, “Nanhte yubak kaba galaw manit dai; rai timung ngai Yehowa hpang de lung wa nna, nanhte a yubak matu htingrat ya lu na nhten,” ngu nna tsun da mu ai.

³¹Shaloi Mawshe gaw Yehowa hpang de bai lung wa nna, Gaja wa, ndai amyu gaw tinang a matu ja hpara galaw ai hte yubak kaba galaw masai;

³²rai timung, shanhte a yubak dat kau mayu yang gaw, dat kau ya u; dai n rai yang gaw, nang ka da ai laika hta na nye mying mung arut kau ya e law,” ngu nna hpyi wu ai.

³³Yehowa chyawm gaw, “Kadai wa ngai hpe shut yang, nye a laika hta na dai wa hpe ngai arut kau na we ai:

³⁴ya, naw sa wa su, ngai nang hpe tsun ai shara de ndai amyu hpe woi sa wa su; yu u, nye a Lamu kasa na a shawng e sa wa na ra ai: rai timung, ngai kawan katsan yu sa ai nhtoi hta shanhte a yubak shanhte a ntsa e jaw na ngai du na ring ngai,” ngu dat wu ai.

³⁵Shing rai Arun hte amyu masha ni dai dumsu kasha galaw ma ai majaw Yehowa shanhte hpe ari jaw wu ai.