Read Jinghpaw Hanson Version Bible PRU MAT 33 Bible Online

PRU MAT 33 - Jinghpaw Hanson Version Bible bible

PRU MAT 33

¹Bai Yehowa gaw Mawshe hpe, “Sa wa su, nang hte Egutu mung na nang woi wa ai masha ni ndai shara na pru nna, Na a amyu matu ni hpe ngai jaw na ngu nna, Abraham, Isak, Yaku hte hpe ngai dagam da ai ga de sa wa ma su:

²na a shawng e lamu kasa mung ngai shangun dat ya nna, Hkanan, Amuri, Hiti, Hperizi, Hiwi hte Yebusi masha ni hpe ngai shachyut kau ya na made ai;

³shing rai, nga chyu hte lagat jahku lwi ai mung de ngai nanhte hpe woi wa na made ai: rai timung, nang du ja ai amyu rai nga ndai majaw, lam hkan e ngai nang hpe n jahten kau n ga, ngai hkum nan nanhte a ka-ang e hkan sa lawm na n rai,” ngu nna tsun wu ai.

⁴Amyu masha ni dai hkrithpa shi na ma yang yawn nna, kadai mung tinang hkum sumli ma ai n rai.

⁵Bai Yehowa Mawshe hpe, Israela kashu kasha ni hpe ning ngu tsun mu: “Nanhte du ja ai amyu rai nga myit dai: na a ka-ang e hkring mi sha ngai du yang, ngai nang hpe atsai awai di kau na de ai: dai majaw nang hpe ngai kaning di na ngai chye lu n ga, na a sumli ai arai ni raw kau u, ngu u,” ngu wu ai.

⁶Shing rai Israela kashu kasha ni gaw Horeb bum du ai kaw nna shanhte a sumli rai raw da ma ai.

⁷Ya Mawshe dai sum la nna dap shinggan tsawmra tsan kaw gap nhtawm shawa Sum ngu nna, shamying wu ai. Dai rai nna Yehowa hpe tam ai ni kadai mung, dap shinggan na dai shawa sum de pru sa ma ai.

⁸Mawshe dai Sum de pru sa wa ai shaloi, amyu masha ni yawng rawt tsap nna, langai hte langai tinang nang a sum chyinghka lam e tsap nga let, dai sum kata de Mawshe shang wa ai du hkra hkan yu nga ma ai.

⁹Ya Mawshe dai sum kata de shang yang, sumwi shadaw yu hkrat wa nna, sum chyinghka lam e tu nga let, Yehowa Mawshe hte ga tsun wu ai.

¹⁰Dai sum chyinghka lam e sumwi shadaw tu nga ai hpe amyu masha ni mu ma yang, shanhte nlang rawt nna, langai hte langai tinang nang a sum chyinghka lam e nawku ma ai.

¹¹Shing rai Yehowa gaw jinghku shada shachyen ai zawn Mawshe hte myi man hkrum rai nna shaga wu ai. Mawshe dai dap de bai shang wa ai, rai timung, shi a hkringmang, Nun a kasha Yawshu ngu ai shabrang gaw, dai sum na n pru ai naw nga nga ai.

¹²Shaloi Mawshe gaw Yehowa hpe, “Yu u, ndai amyu hpe woi wa u, nga nna nang ngai hpe tsun nit dai, rai timung, ngai hte rau kadai hpe nang shangun ya ndai gaw, nang ngai hpe n tsun ndai: rai timung nang ngai hpe, Na mying hte ngai nang hpe chye da de ai, nye a man e nang myi man pa nit dai, nga ndai:

¹³dai rai nna, na a man e ngai myi man pa ni ai rai yang gaw, ngai myi man pa ai lam ngai chye lu n ga, nang hpe mung ngai chye lu hkra, na a lam ngai hpe madun ya e: ndai amyu, na a masha ni rai nga ma ai hpe myit yu u,” ngu nna hpyi wu ai.

¹⁴Yehowa gaw, “Ngai hkum nan sa nna, nang hpe shalan shabran na de ai,” ngu nna htan ya wu ai.

¹⁵Mawshe mung, “Nang hkum nan ngai hte rau n sa yang gaw, ndai kaw na anhte hpe hkum woi lung wa mi.

¹⁶Kaning rai nme law, ngai hte ndai amyu, na man e myit man pa lu ai gaw, kaning rai chye na a ta? Ngai hte na a amyu, ga ntsa na amyu nlang hte hte shai na gaw, nang anhte hte rau lung wa jang she chye lu na n rai ni?” ngu wu ai.

¹⁷Shaloi Yehowa gaw, “Nang nye a man e myi man pa nit dai hte nang hpe na amying hte ngai chye de ai majaw, ya nang tsun ai hku mung ngai hkan ga law na nngai,” ngu nna Mawshe hpe tsun wu ai.

¹⁸Mawshe mung Na a hpung shingkang ngai hpe madun ya e,” ngu wu ai.

¹⁹Yehowa gaw, Nye a mai kaja ai hpung mahkra na a man e ngai shalai dat nna, Yehowa a mying hpe na man e ngai shapraw na we ai: chyeju madun mayu ai wa hpe ngai chyeju madun na we ai; matsan dum myit rawng ai wa hpe ngai matsan dum na we ai.

²⁰Rai timung, nang nye a myi man mu lu na n rai; ngai e mu ai masha hkrung nga lu na n rai.

²¹Yu u, nye a makau e shara langai mi nga nga ai; dai lunghkrung ntsa e nang tsap nga na rai ndai:

²²shing rai nye a hpung shingkang lai wa nga yang, nang hpe dai lung kran e ngai bang da nna, ngai lai mat wa hkra, nang hpe nye a lata hte magap da na de ai:

²³shaloi nye a lata ngai dawn la ai hpang, nye a shingma sha nang mu lu na ndai: nye a myi man chyawm gaw nang mu ya lu na n rai,” ngu nna Yehowa tsun wu ai.