Read Jinghpaw Hanson Version Bible PRU MAT 35 Bible Online

PRU MAT 35 - Jinghpaw Hanson Version Bible bible

PRU MAT 35

¹Shaloi Mawshe gaw Israela kashu kasha shawa hpung nlang hte hpe jahpawng tawn nna, “Da ndai gaw nanhte hkan galaw lu na Yehowa hkang dat ai ga rai nga ai:

²Kru ya tup amu bungli nang galaw shachyen lu na rai ndai; sanit ya ngu na nhtoi gaw, nanhte hta chyoi pra ai shani, Yehowa matu ban sa nga lu na laban nhtoi kaba rai nga ai; dai nhtoi hta amu bungli galaw ai wa gaw si ai hkrum lu na rai nga ai.

³Nanhte a nga shara shagu hta, laban nhtoi e, nanhte wan wut lu na myit dai n rai,” ngu nna shanhte hpe htawn tsun wu ai.

⁴Bai Mawshe gaw Israela kashu kasha ni a shawa hpung nlang hte hpe, “Da ndai gaw Yehowa hkang dat ai ga rai nga ai:

⁵Nanhte hta na Yehowa a matu kumhpaw kumhpa lahkawn la mu: kam jaw ai myit hte jaw mayu ai masha hkum shagu, Yehowa a kumhpaw kumhpa ngu na, aja, gumhpraw, magi;

⁶sawn tsit ai, hkyeng mang ai, hkyeng tsawm ai ri, mani ai lachyit sumpan, bainam mun;

⁷jaw shahkyen ai sagu la hpyi, tahkisha hpyi, marau hpun:

⁸wan shatu na matu sau; chya ya na namman hte manam pyaw ai baw nat na matu, manam pyaw ai baw;

⁹unkuk lungseng, dai hpa hkai lawng hte sinda magap hta hkrep na matu lungseng, re ai ni la sa marit.

¹⁰“Nanhte hta na myit hpaji rawng ai ni kadai mung Yehowa hkang da mada hte maren,

¹¹sumpan nta hte de a sum, de a magap, de a chinghkyi, de a hpunpyen, de a htinggrang, de a shadaw ni hte machyaw ni hpe mung;

¹²bai sumpu hte de a kandang yan, chyeju magap hte grang na matu nba shinggang mung;

¹³dai muk ku hte de a kandang, dai hte seng ai rai ni hte madun dan ai muk mung;

¹⁴wan shatu na pyengdin shadun hte dai hte seng ai arai ni, de a pyengdin ni hte wan shatu na sau mung;

¹⁵manam pyaw ai baw nat na matu hkungri hte de a kandang, chya na namman, manam pyaw ai baw, sumpan sum chyinghka grang na chyinghka grang mung;

¹⁶wan nat hkungga nawng na tawn hkungri hte, de a magri magrang, de a kandang, dai hte seng ai arai nlang hte, ntsin htung hte de a shadun ku mung;

¹⁷wanggrang hte de a shadaw, de a machyaw, wang chinghka grang na chyinghka grang mung;

¹⁸sumpan sum ai mailak, wang a mailak hte de a sumri ni mung;

¹⁹chyoi pra ai shara e daw jau yang na matu reng ai hpun palawng, hkinjawng amu gun hpai yang na matu hkinjawng Arun hte shi a shadang sha ni bun hpun na chyoi pra ai hpun palawng mung, sa galaw maru,” ngu nna tsun wu ai.

²⁰Shaloi Israela kashu kasha shawa hpung mahkra hte Mawshe kaw na pru wa shajang nna,

²¹tinang myit hta katu ai masha, kam jaw ai myit hte jaw na myit rawng ai ni nlang hte gaw, dai shawa sum galaw na matu mung, dai hta daw jau na amu a matu mung, chyoi pra ai hpun palawng galaw na matu mung Yehowa hpe kumhpaw kumhpa di na nga la sa ma ai.

²²Kam jaw ai shawang myit rawng ai numsha lasha ni yawng, ja hkaidang, ladi shanghkawng, lachyawp, lahkawn, re ai aja arai ni la sa ai: Yehowa hpe aja kumhpa jaw ai ni yawng du sa ma ai.

²³Sawm tsit ai, hkyeng mang ai, hkyeng tsawm ai ri hte, mani ai lachyit sumpan, bainam mun, jaw shahkyeng ai sagu la hpyi, tahkisha hpyi re ai rai lu ai ni mung la sa ma ai.

²⁴Gumhpraw hte magri kumhpa jaw ai ni mung, Yehowa kaw dai kumhpa la sa ma ai: daw jau na arai ni yawng a matu marau hpun lu ai ni mung, dai hpe la sa ma ai.

²⁵Hpaji maka rawng ai numsha ni nlang hte mung tinang a lata hte ri ri nna ri ngut sai sawm tsit ai, hkyeng mang ai, hkyeng tsawm ai hte mani ai lachyit ri re ai ni la sa ma ai.

²⁶Hpaji maka rawng ai hte tinang myit katu ai numsha ni nlang hte mung, bainam mun ri ma ai.

²⁷Agyi salang ni mung unuk lungseng hte, hpa hkai lawng hte sinda magap hkrep na lungseng;

²⁸wan shatu na matu, chya na namman matu, manam pyaw ai baw nat na matu, manam pyaw ai baw hte sau re ai ni la sa ma ai.

²⁹Shing rai, Yehowa Mawshe hpe hkang dat ai amu lam shagu a matu, Israela kashu kasha ni hta kam jaw ai shawang myit katu ai numsha, lasha nlang hte Yehowa hpe shawang myit kumhpa sa sak ma ai.

³⁰Bai Mawshe gaw Israela kashu kasha ni hpe, “Madat yu mu, Yehowa gaw Yuda lakung hta na Uri a kasha Hura a kashu Bezalela hpe amying hte shaga dang da nu ai;

³¹shi gaw aja, gumhpraw, magri dup amu hte, nlung ka nna, hkrep ai amu, hpun tawk ai amu hte hpaji amu lam baw sumhpa chye wa nna,

³²hpaji hparat, zai byeng-ya, chye chyang ai lam hte seng ai hpaji amu baw sumhpa chye nna,

³³reng hkik ai amu galaw chye na matu Karai Kasang a Wenyi shi hta jahpring nu ai.

³⁴Shi hte Dan lakung hta na Ahisamak a kasha Aholiaba gaw, gale ni hpe sharin ya lu na matu, shan hta hpaji maka bang ya manu ai.

³⁵Dai yan gaw, tawk nna galaw ai amu, reng hkik ai laksama amu, sawm tsit ai, hkyeng mang ai, hkyeng tsam ai hte mani ai lachyit ri a maka ka chye ai amu, da da ai amu, hpaji lam amyu myu hte na amu, reng hkik ai hku galaw chye ai hpaji lam amyu shagu chye galaw na matu hpaji byeng-ya hte jahpring ai yan rai nga ma ai.