Read Jinghpaw Hanson Version Bible PRU MAT 36 Bible Online

PRU MAT 36 - Jinghpaw Hanson Version Bible bible

PRU MAT 36

¹Shing rai Bezalela yan Aholiaba hte Yehowa e hpaji hparat hte zai byeng-ya jahpring ai myit su ai ni nlang hte gaw, Yehowa hkang da mada hte maren, dai chyoi pra ai shara a daw jau lam hte seng ai amu lam shagu hte hpe galaw na maru ai,” ngu wu ai.

²Bai Mawshe gaw Bezalela yan Aholiaba hte, Yehowa hpaji hparat jaw bang nna, tinang myit hta dai amu galaw na myit katu ai, myit su ai ni nlang hte hpe shaga la nna,

³shanhte gaw, dai chyoi pra ai Nta hte seng ai daw jau na arai ni galaw na matu, Israela kashu kasha ni la sa ai kumhpa rai yawng Mawshe a lata na hkap la mu ai. Dai hta kaga kumhpap kumhpa jaw mayu ai ni jahpawt shagu naw la sa nga ma ai.

⁴Hpaji rawng nna dai chyoi pra ai nta a daw jau rai galaw ai ni mung, langai hte langai tinang galaw ai amu hta na pru sa nna,

⁵Yehowa hkang da ai hte galaw law na hta n-ga jan hkra la sa masai, ngu nna Mawshe hpe tsun dan mu ai.

⁶Shaloi Mawshe gaw, Dai chyoi pra ai nta hte seng ai daw jau na lam matu amu galaw ai numsha lasha kadai mung, hkum bai galaw jat manit, nga nna dai dap ting hpe ga shana dat ai hte, amyu masha ni kumhpa la sa ai lam hpe shadim kau wu ai.

⁷Lu la sai rai ni mung, dai amu mahkra hpe galaw ngut na matu law nna jan nga ai.

⁸Shing rai myit hpaji rawng nna dai amu galaw ai ni gaw dai sumpan nta hpe nba grang shi hte galaw mu ai: dai nba grang ni gaw kaboi ngut sai mani ai lachyit ri, sawm tsit ai, hkyeng mang ai, hkyeng tsawm ai ri hte ka chye ai masha galaw ai hku Hkerubim sumla hte galaw ai rai malu ai.

⁹Nba grang langai mi a galu de dawng hkun matsat, nda de dawng mali rai nna, nba grang langai mi a shadawn hte maren mahkra hte a rai nga ai.

¹⁰Bai shi gaw nba grang manga hte hpe langai hte langai matut wu ai: bai nba grang manga hte hpe langai hte langai matut wu ai.

¹¹Shing rai matut ai nba grang a shakung hku, sawm tsit ai ri hte shangwang hku shakau wu ai: nba grang kaga a shakung hku mung dai hte maren di wu ai.

¹²Nba grang langai mi hta shangwang hku manga shi; bai matut nga ai kaga langai mi a shakung lam mi hta shangwang hku manga shi di nna, dai shangwang hku shada hkrum hkrum rai nga ai.

¹³Ja jet chyinghkyi manga shi mung shi galaw nna, dai chinghkyi hte nba grang yan hpe mahkai matut wu ai rai nna, dai sumpan sum gaw langai sha rai nga ai.

¹⁴Bai, dai sumpan sum galup na matu, bainam mun hte nba grang shi langai shi galaw wu ai.

¹⁵Nba grang langai mi a galu de dawng sumshi, nda de dawng mali di nna, nba grang shi langai hte ting maren rai nga ai.

¹⁶Bai nba grang manga hte hpe, langai sha di nna matut wu ai; nba grang kru hpe mung langai sha di nna matut wu ai.

¹⁷Matut ngut sai nba grang langai mi a shakung lam mi hta, shangwang hku manga shi, bai langai mi a shakung lam mi hta shangwang hku manga shi di nna galaw wu ai.

¹⁸Magri hte chyinghkyi manga shi mung shi galaw nna, dai chyinghkyi ni hpe shangwang hku ni hta mahkai matut nna, dai sum gaw langai sha rai nga ai.

¹⁹Bai, sumpan sum galup na matu jaw shahkyeng ai sagu la hpyi hte magap langai mi, de a ntsa e tahkisha hpyi hte magap langai mi shi galaw wu ai.

²⁰Bai sumpan sum a shakum matu marau hpun hte hpunpyen shadun mung shi galaw wu ai.

²¹Hpunpyen langai mi a galu de dawng shi, nda de dawng me lahkam mi rai ngai ai.

²²Dai hpunpyen ni mahkra hpe langai mi hta dawhkai lahkawng hkawng galaw bang nna, dai sumpan sum a hpunpyen mahkra hpe shing di galaw wu ai.

²³Dai sumpan sum a dingda maga de na matu hpunpyen hkun shi galaw wu ai:

²⁴dai hpunpyen hkun a htumpa de na matu, gumhpraw hte machyaw mali shi, jaw wu ai; hpunpyen langai mi hta na dawhkai lahkawng a matu machyaw lahkawng hkawng di wu ai.

²⁵Dai hte maren dai sumpan sum a kaga maga, dai dingdung maga de na matu mung,

²⁶hpunpyen hkun hte de a matu gumhpraw machyaw maili shi jaw nna, langai mi a htumpa e machyaw lahkawng hkawng di wu ai:

²⁷dai sumpan sum a nbang ngu na sinna maga a matu mung, hpunpyen kru hte galaw wu ai.

²⁸Dai sumpan sum a nbang jut lahkawng a matu mung, hpunpyen lahkawng shi galaw wu ai:

²⁹dai lahkawng hpe htumpa de kahtap nna matu de na shanghkawng du hkra maren di wu ai: shing di dai jut lahkawng hpe shangut wu ai.

³⁰Shing rai hpunpyen matsat hte de a gumhpraw machyaw shi kru rai nga ai: hpunpyen langai mi a htumpa e machyaw lahkawng hkawng rai nga ai.

³¹Bai marau hpun hte htinggrang mung shi galaw wu ai; sumpan sum a maga mi de na matu htinggrang manga nga galaw wu ai.

³²bai sumpan sum a nbang ngu na sinna mata de na hpunpyen ni a matu mung htinggrang manga galaw wu ai.

³³Ka-ang na htinggrang hpe gaw nbang npan hkren jut htuk htuk tawk nna dinghkren wu ai.

³⁴Dai hpunpyen ni hpe ja hte shi kayawp nna, htinggrang dinghkrawn na matu ja shanghkawng mung galaw shatut wu ai; dai htinggrang ni hpe mung ja sup wu ai.

³⁵Bai, sawm tsit ai, hkyeng mang ai, hkyeng tsawm ai hte kaboi ngut sai lachyit ri hte dai nba shinggang hpe shi galaw wu ai; dai hpe ka chye ai masha galaw ai hku Hkerubim sumla ka shakap wu ai.

³⁶De a matu mung marau hpun hte shadaw mali, shi galaw nna, dai hpe ja hte kayawp wu ai: de a chyinghkyi ni mung ja rai nga ai: dai shadaw matu mung gumhpraw hte machyaw mali jaw wu ai.

³⁷Bai, dai sum chyinghka a matu, sawm tsit ai, hkyeng mang ai, hkyeng tsawm ai hte kaboi ngut sai mani ai lachyit ri a ka chye ai masha da ai hku chyinghka grang langai mi mung, shi galaw wu ai:

³⁸de a shadaw manga hte dai hta na chyinghkyi ni mung shi galaw nna, shadaw matu ni hte ngaugran ni hpe ja hte kayawp wu ai: de a machyaw manga chyawm gaw magri rai nga ai.