Read Jinghpaw Hanson Version Bible PRU MAT 37 Bible Online

PRU MAT 37 - Jinghpaw Hanson Version Bible bible

PRU MAT 37

¹Bai bezalela gaw marau hpun hte dai sumpu galaw wu ai: dai gaw galu de dawng lahkawng e lahkam mi, nda dawng mi lahkam mi, tsaw de dawng me lahkam mi rai nga ai:

²dai hpe kata, ntsa ja hte kayap wu ai: de a ntsa nten grup grup ja machyi shakau wu ai.

³De a matu mung ja shanghkawng mali jaw la nna, de a jut mali hta maga mi de lahkawng hkawng shatut wu ai.

⁴Marau hpun hte kandang mung shi galaw nna ja hte sup wu ai.

⁵Dai sumpu hpe hpai na matu sumpu a maga mi hte maga mi de na shanghkawng ni hta dai kandang dinghkrawn da wu ai.

⁶Ja jet hte chyeju magap mung shi galaw wu ai; dai mung galu de dawng lahkawng e lahkam mi, nda de dawng me lahkam mi rai nga ai.

⁷Ja hte Hkerubim lahkawng mung shi galaw wu ai; chyeju magap a matu maga mi hte maga mi hte maga mi de tawk nna galaw wu ai:

⁸ndai matu de Hkerub langai mi, wora matu de Hkerub langai mi di nna, dai chyeju magap hkum hta nna, de a matu lahkawng maga hta Hkerubim lahkawng galaw shapraw wu ai.

⁹Dai Hkerubim lahkawng yan myi man hkrum rai nna, dai chyeju magap de myi man yawng let, shan a singkaw kahpyen nhtawm, chyeju magap hpe ka-up nga ma ai.

¹⁰Bai, marau hpun hte dai ku mung shi galaw wu ai: dai gaw galu de dawng lahkawng, nda de dawng mi, tsaw de dawng me lahkam mi rai nga ai:

¹¹dai hpe ja jet hte shi kayawp nna, de a grup grup ja hte htinggawt dat wu ai.

¹²Dai hta e de a matu grup grup lahpa hpa shakra da nna, dai kra ai a matu grup grup hpe mung ja hte machyi shakau wu ai.

¹³De a matu ja hte shanghkawng malli mung shi jaw nna, de a lagaw mali hta na jut mali hta e dai shanghkawng ni hpe shatut da wu ai.

¹⁴Dai ku hpai na matu dai kra ai a npu e shanghkawng ni hpe shatut da nna, dai gaw kandang dinghkrawn na shara rai nga ai.

¹⁵Dai ku hpai na matu mung marau hpun hte kandang galaw nna ja jet hte kayawp wu ai.

¹⁶Ku dai hte seng ai wan ni, chyaw ni, ang ni hte, ru jaw na gawm ni hpe, ja jet hte galaw wu ai.

¹⁷Bai, ja jet hte dai pyengdin shadun shi galaw wu ai: dai pyengdin shadun na htumpa, madung, wan ni, gumdin ni hte nampan ni hpe langai sha di nna dup wu ai.

¹⁸Dai madung hta nna maga mi de lahkying masum sum di nna lakying kru shapraw wu ai.

¹⁹dai pyengdin madung hta na pru ai maga mi a lakying langai mi hta nampan pu zawn re ai wan masum hte de a gumdin masum yep yep rai nga ai: bai maga mi de na lakying langai mi hta mung nampan pu zawn re ai wan masum hte de a gumdin masum yep yep rai nga ai; dai zawn dai pyengdin madung hta na pru ai lakying kru hte hta shing re ai hkrai rai nga ai.

²⁰Dai pyengdin madung hta mung nampan pu zawn re ai wan mali hte de a gumdin mali yep yep rai nga ai;

²¹bai lakying man shagu a matut ai npu e gumdin langai ngai rai nga ai; shing rai dai pyengdin madung na pru ai lakying man masum ting hta rai nga ai.

²²De a gumdin ni hte lakying ni hpe langai sha di nna, dup wu ai.

²³Dai hta shadun na pyengdin sanit mung, de a lakap ni hte kap bang na wan ni mung, ja jet hte galaw wu ai.

²⁴Dai pyengdin hte de a arai mahkra hpe ja jet joi shi hte galaw wu ai.

²⁵Bai, manam pyaw ai baw nat na matu hkungri mung marau hpun hte shi galaw wu ai; de a galu de dawng mi, nda de dawng mi rai nna mali maga maren di galaw wu ai: de a tsaw de dawng lahkawng rai nga ai: de a nrung ni hpe mung dai hte langai sha di wu ai.

²⁶Dai hpe ntsa maga de mung, nhkrem grup grup mung, nrung ni hta mung ja jet hte kayawp nna de a matu grup e ja htinggawt dat da wu ai.

²⁷De a matu mung, shanghkawng lahkawng galaw nna, ja htinggawt a lawu hkawt, hkungri a maga mi hte maga mi de na jut yan hta shatut wu ai; dai gaw hpai na matu kandang dinghkrawn shara rai nga ai.

²⁸De a kandang yan hpe marau hpun hte shi galaw nna ja hte sup wu ai.

²⁹Manam pyaw ai baw hpaw chye ai wa hpaw ai hku, chya na matu chyoi pra ai namman mung, jet ai manam pyaw ai baw hpe mung, shi hpaw wu ai.