Read Jinghpaw Hanson Version Bible PRU MAT 38 Bible Online

PRU MAT 38 - Jinghpaw Hanson Version Bible bible

PRU MAT 38

¹Bai, marau hpun hte wan nat hkungga nawng na tawn hkungri mung shi galaw wu ai: de a tsaw de dawng masum rai nga ai.

²De a jut mali hta nrung mung shatut wu ai: dai nrung ni gaw kanu hte langai sha rai nga ai; dai hte hpe magri hte kayawp wu ai.

³Dai tawn hkungri hte seng ai, di ni, shingban ni, angdung ni, shan chyinghkyi ni, wan ban pa ni mahkra hpe magri hte galaw wu ai.

⁴Dai tawn hkungri a ka-ang hkup madawn a npu tup di nna, magrang na matu magri awa hte magrang mung, shi galaw wu ai.

⁵Kandang dinghkrawn na matu dai magri magrang a jut mali hte hta e shatut na shanghkawng mali mung shi jaw wu ai.

⁶Kandang yan hpe marau hpun hte shi galaw nna magri hte sup wu ai.

⁷Tawn hkungri hpe hpai na matu, gade de na shanghkawng ni hta dai kandang yan hpe dinghkrawn da wu ai; dai hkungri hpe kata de kaman hpungkraw di nna hpunpyen hte galaw wu ai.

⁸Bai, daw jau amu a majaw shawa sum chyinghka lam e sa hpawng hpawng re ai numsha ni a magri jamna la nna, dai ntsin htung hte de a shadun ku shi galaw wu ai.

⁹Dai wang mung shi galaw wu ai: dai wang a maga mi na matu, dingda maga ngu na de, kaboi ngut sai mani ai lachyit ri hte dawng latsa galu ai wanggrang langai mi galaw wu ai:

¹⁰de a shadaw hkun hte de a magri machyaw hkun shi galaw nna, chyinghkyi ni hte ngaugran ni hpe gaw gumhpraw hte galaw wu ai.

¹¹Dai hte maren dingdung maga ngu na de mung, dawng latsa galu ai wanggrang hte shadaw hkun, magri machyaw hkun galaw nna chyinghkyi hte ngaugran ni hpe gumhpraw hte galaw wu ai.

¹²Bai sinna maga ngu na dai wang a nda de na matu, dawng manga shi galu ai wanggrang hte shadaw shi, machyaw shi galaw wu ai: shadaw ni a chyinghkyi ni hte ngaugran ni gumhpraw rai nga ai.

¹³Sinpraw maga ngu na de mung dawng manga shi gang nga ai.

¹⁴Dai wang chyinghka a maga mi de na wanggrang dawng shi manga hte shadaw masum, machyaw masum rai nga ai:

¹⁵bai maga mi de na mung dai hpe maren rai nga ai; dai wang a chyinghka lam a maga mi hte maga mi de, wanggrang dawng shi manga nga, shadaw masum sum, machyaw masum sum rai nga ai.

¹⁶Dai wang grup na nba grang nlang hte gaw mani ai lachyit ri hte da ai hkrai rai nga ai.

¹⁷Shadaw a machyaw ni magri, chyinghkyi ni hte ngaugran ni gumhpraw rai nga ai; shadaw a matu ni hpe mung gumhpraw hte sup wu ai: dai wang na shadaw ni a ngaugran ni yawng gumhpraw rai nga ai.

¹⁸Dai wang chyinghka e grang na matu, sawm tsit ai, hkyeng mang ai, hkyeng tsawm ai, kaboi ngut sai mani ai lachyit ri hte ka chye ai masha da ai chyinghka grang rai nga ai: dai gaw galu de dawng hkun rai nna tsaw de gaw wanggrang kaga ni hte marendawng manga rai nga ai.

¹⁹De a shadaw mali magri machyaw mali hte, de a chyinghkyi ni mung gumhpraw, shadaw matu ni hte ngaugran ni mung gumhpraw rai nga ai.

²⁰Sumpan sum hte wang a mailak ni yawng magri rai nga ai.

²¹Ndai hte gaw, Mawshe hkang da ai hku hkan nna, dai sakse sumpan sum hte Lewi masha ni daw jau na amu a matu, hkinjawng Arun a kasha Ihtama hti tawn ai hte maren, sumpan sum hte seng ai arai ni a jahpan rai nga ai.

²²Yehowa Mawshe hpe hkang da mada hte maren, Yuda lakung hta na Uri a kasha Hura a kashu Bezalela galaw wu ai.

²³Dan a lakung hta na Ahasimak a kasha Aholiaba mung shi hpe shingtau wu ai; dai wa gaw nlung ka ai, lata maka rawng ai, sawm tsit ai, hkyeng mang ai, hkyeng tsawm ai, kaboi ngut sai mani ai lachyit ri hte maka chye ka ai wa rai nga ai.

²⁴Dai chyoi pra ai shara na amu mahkra a matu ma ai ja gaw, dai chyoi pra ai shara na joi hku hkan yang, joi ni tsa jahku shi sanit e hkan masum rai nga ai.

²⁵Sahawa jahpan hta lawm ai ni jaw ai gumhpraw yawng gaw, dai chyoi pra ai shara na joi hku hkan yang, hkying me joi shi sanit e hkan sanit lap manga rai nga ai.

²⁶Jahpan hta lawm ai hkun ning kaw nna dai hta jan ai ni yawng, sen kru e hkying masum, manga tsa manga shi rai ma ai hte maren shanhte langai hte langai jaw ai gaw, chyoi pra ai shara na joi hku hkan yang, beka ngu ai, gumhpraw gyap gyap rai malu ai.

²⁷Dai chyoi pra ai sum a machyaw ni hte nba shinggang a machyaw ni jaw na matu, gumhpraw joi hkying mi shang nga ai: machyaw langai mi hta joi shi shi shang ai rai nna machyaw latsa rai nga ai.

²⁸Bai ngam ai joi shi sanit e hkan sanit lap manga hte, shadaw a chyinghkyi ni hte de a matu ni kayawp nna ngaugran ni hpe galaw wu ai.

²⁹Magri kumhpa chyawm gaw joi sanit tsa e hkun mali rai nga ai.

³⁰Magri dai hte shawa sum chyinghka a machyaw ni, magri tawn hkungri, magri magrang hte dai tawn hkungri hte seng ai rai nlang:

³¹wang grup a machyaw ni, wang chyinghka a machyaw ni, sumpan sum a mailak nlang hte hte, wang grup yin na mailak nlang hte hpe mung, shi galaw wu ai.