Read Jinghpaw Hanson Version Bible PRU MAT 39 Bible Online

PRU MAT 39 - Jinghpaw Hanson Version Bible bible

PRU MAT 39

¹Bai, Yehowa Mawshe hpe hkang da ai hte maren, dai chyoi pra ai shara e daw jau yang bu hpun na matu reng hkik ai hpun palawng mung, Arun bu hpun na chyoi pra ai hpun palawng mung, sawm tsit ai, hkyeng mang ai, hkyeng tsawm ai sumpan hte shanhte galaw mu ai.

²Dai hpa hkai lawng hpe aja hte sawm tsit ai, hkyeng mang ai, hkyeng tsawm ai hte kaboi ngut sai mani ai lachyit ri hte galaw wu ai.

³Dai ja hpe dup apa la nna sumri di zen la nhtawm, sawm tsit ai, hkyeng mang ai, hkyeng tsawm ai hte mani ai lachyit ri hte kayau nna, maka chye ai ni ka ai hku galaw mu ai.

⁴Matut na matu gade de na shakung lahkawng hta nna lahpa mahkai lahkawng shanhte galaw mu ai.

⁵Yehowa Mawshe hpe hkang da ai hte maren, kyit ma matu dai hte seng ai reng ai shingkyit mung, dai hpa hkai lawng hte langai sha di nna, aja, sawm tsit ai, hkyeng mang ai, hkyeng tsawm ai ri hte, kaboi ngut sai mani ai lachyit ri a galaw mu ai.

⁶Dai unuk lungseng lahkawng mung shanhte shatsawm la nna, dazik hta ka shakap ai zawn, Israela kashu kasha ni a amying ka shakap nhtawm, ja hkalawk hta bang mu ai.

⁷Shing rai Israela kashu kasha ni a matu masat dingsat nlung tai nga na, dai nlung yan hpe hpa hkai lawng a matut ai hpa hkai ntsa e shakap wu ai: dai gaw Yehowa Mawshe hpe hkang da ai hte maren rai nga ai.

⁸Bai, hpa hkai lawng galaw ai hku, maka chye ai masha galaw ai hkan nna, aja, sawm tsit ai, hkyeng mang ai, hkyeng tsawm ai ri hte kaboi ngut sai mani ai sachyit ri a sinda magap mung shi galaw wu ai.

⁹Dai gaw dingdung dingda maren jut mali rai nna, lahkawng hpan rai nga ai: de a galu maga lahkam mi nda maga lahkam mi rai nga nna, dai sinda magap gaw lahkawng hpam rai nga ai.

¹⁰Dai hta lungseng lam mali hkrep da mu ai: langai ngu na lam hta, patemya, utahpaya, mya;

¹¹lahkawng ngu na hta, lung hkyeng, nila, sin;

¹²masum ngu na hta wakintu, mahoya, htitun nila;

¹³mali ngu na hta, myek-yoi unuk, nagahtoi rai nga ai: langai hte langai ja hkalawk hta hkrep da mu ai.

¹⁴Israela kashu kasha ni a amyu shi lahkawng rai nga ai hte maren, dai lungseng ni mung shanhte a amying hkan nna shi lahkawng rai nga ai; dazik hta tawk ka ai zawn langai hte langai hta mying kap nna amyu shi lahkawng a matu gu gu rai nga ai.

¹⁵Sinda magap hta hkri ngut sai jinghkri zawn di nna ja jet hte saidawng galaw wu ai.

¹⁶Bai, ja hte hkalawk lahkawng hte ja shanghkawng lahkawng shanhte galaw nna dai shanghkawng yan hpe sinda magap a ntsa jut lahkawng hta e shatut nhtawm;

¹⁷dai ja saidawng lahkawng hpe sinda magap a ntsa na shanghkawng lahkawng hta noi mu ai.

¹⁸Dai saidawng lahkawng a matu yan hpe hpa hkai lawng a hpa hkai ntsa na hkalawk yan hta noi da mu ai.

¹⁹Bai, ja hte shanghkawng lahkawng shanhte galaw nna, dai sinda magap htap lahkawng hta na, hpa hkai lawng de jahtum ai htap a htumpa jut lahkawng hta shatut da wu ai.

²⁰Bai ja hte shanghkawng lahkawng galaw nna, hpa hkai lawng a man maga nshang matu ang, dai reng ai shingkyit a ntsa hkawt e gade de na matut ai a makau e da yan hpe shatut wu ai.

²¹Shing rai, dai sinda magap hpa hkai lawng a reng ai shingkyit a ntsa e rai nga nna hpa hkai lawng hte n hka na matu, sinda magap a ja shanghkawng yan hte hpa hka lawng a shanghkawng yan hpe sawm tsit ai sumri hte dun mu ai: dai gaw Yehowa Mawshe hpe hkang da ai hte maren rai nga ai.

²²Bai dai hpa hkai lawng hte seng ai ntsa palawng hpe sawm tsit ai ri hte sha da mu ai:

²³dai hta lawng du dat nna, n je wa na matu, hpyen palawng hta na hpri lawng du zawn di hkawp wu ai.

²⁴Dai ntsa palawng a htumpa matu grup e sawm tsit ai, hkyeng mang ai, hkyeng tsawm ai ri hte lachyit ri a galaw ai hkainu si hte,

²⁵ja jet hte dingsi galaw nna, ntsa palawng a htumpa grup e, hkainu si langai hta ja dingsi langai din din di nna noi da wu ai:

²⁶daw jau yang hpun na palawng hpe ja dingsi langai mi, hkainu si langai mi din din di nna shangut mu ai: dai gaw Yehowa Mawshe hpe hkang da ai hte maren rai nga ai.

²⁷Bai, Arun hte shi a shadang sha ni a matu, da la ai mani ai lachyit sumpan hte palawng mung,

²⁸lachyit sumpan bunghkaw mung, mani ai lachyit sumpan hte tsawm htap ai baw chyawp mung, mani ai lachyit sumpan hte bu hkung labu mung,

²⁹maka chye ai ni da ai kaboi ngut sai lachyit ri, sawm tsit ai, hkyeng mang ai, hkyeng tsawm ai ri hte da ai shingkyit mung galaw ya mu ai; dai gaw Yehowa Mawshe hpe hkang da ai hte maren rai nga ai.

³⁰Ja jet apa hte dai chyoi pra ai htan bam mung shanhte galaw nna, dazik hta tawk ka ai zawn, Yehowa a matu chyoi pra nga ai, nga nna dai hta e ka shakap nhtawm,

³¹sawm tsit ai sumpan yan hta shakap nna bunghkaw a ntsa e gyit da wu ai: dai gaw Yehowa Mawshe hpe hkang da ai hte maren rai nga ai.

³²Shing rai Yehowa mawshe hpe hkang da ai hte maren Israela kashu kasha ni galaw nna dai shawa sum hte seng ai amu mahkra hpe galaw shangut mu ai: shing rai shanhte galaw ma ai.

³³Israela kashu kasha ni gaw dai sumpan nta hte de a Sum, dai hte seng ai arai mahkra hte hte, chyinghkyi ni, hpunpyen ni, htinggrang ni, shadaw ni, machyaw ni;

³⁴jaw shahkyeng ai sagu la hpyi magap, tahkisha hpyi magap, kata e grang na nba shinggang;

³⁵sakse sumpu hte de a kandang, de a chyeju magap;

³⁶muk ku hte dai hte seng ai rai ni, dai hta madun da na muk;

³⁷jet ai pyengdin shadun hte, de a matu shading da ai pyengdin ni hte dai hte seng ai arai nlang, dai hta shatu na sau;

³⁸ja hkungri, chya na namman, nat na manam pyaw ai baw, dai Sum a chinghka grang;

³⁹magri tawn hkungri de a magri magrang, de a kandang hte dai hte seng ai rai nlang ntsin htung hte de a shadun ku;

⁴⁰wanggrang, wang shadaw, de a machaw, wang chyinghka grang matu chinghka grang hte de a sumri ni, mailak ni hte shawa sum kata na ngu ai sumpan ni; sumpan nta na daw jau ai amu hte seng ai arai ni;

⁴¹chyoi pra ai shara e daw jau yang bu hpun na hkik ai hpun palawng mung, hkinjawng amu gun hpai yang hkinjawng Arun bu hpun na chyoi pra ai hpun palawng mung, shi a shadang sha ni bu hpun na hpun palawng mung,

⁴²Yehowa Mawshe hpe hkang da mada hte maren, Israela kashu kasha ni galaw ngut nna Mawshe kaw la sa ma ai.

⁴³Dai amu mahkra hpe Mawshe yu yu nna, Yehowa hkang da ai hte maren shanhte galaw ngut manu ai gaw, shi mu wu ai: dai rai nna Mawshe gaw shanhte hpe shaman ya wu ai.