Read Jinghpaw Hanson Version Bible PRU MAT 40 Bible Online

PRU MAT 40 - Jinghpaw Hanson Version Bible bible

PRU MAT 40

¹Bai, Yehowa gaw Mawshe hte ga tsun nna,

²Shata langai ngu na hta nnan shani e, dai shawa sum a sumpan nta nang sharawt na rai ndai.

³Dai sum a kata e, dai sakse sumpu nang shawn da nna, nba shinggang hte grang da na rai ndai.

⁴Mukku mung nang shawn nna, dai hta tawn da na arai ni hpe hpajang da na rai wu ai: dai pyengdin shadun mung nang shawn nna, pyengdin ni hpe mung shatu tawn na rai ndai.

⁵Manam pyaw nat ai ja hkungri hpe mung, dai sakse sumpu a man ang e nang tawn da nna, dai sumpan nta na chyinghka lam e dai chyinghka grang grang da na rai wu ai.

⁶Dai wan nat hkungga a hkungri hpe mung, shawa sum a sumpan nta a chyinghka lam ang ang e nang tawn da na rai wu ai.

⁷Dai ntsin htung hpe mung, shawa sum hte tawn hkungri a lapran e nang shadun da nna, dai hta ntsin ja bang na rai wu ai.

⁸Dai wang grup dai wanggrang nang sharaw nna, wang chyinghka lam e chyinghka grang grang da na rai wu ai.

⁹Chya na namman mung nang la nna, sumpan nta hte dai hta rawng ai rai nlang hpe chya ai hte, dai sumpan nta hte dai hta rawng ai rai nlang hte hpe shachyoi shapra na rai wu ai: shing rai dai hte gaw chyoi pra nga na ra ai.

¹⁰Wan nat hkungga tawn hkungri hte de arai nlang hte hpe mung nang chya nna dai hpe shachyoi shapra ai hte, dai tawn hkungri gaw chyoi pra htum ai hkungri rai nga na ra ai.

¹¹Dai ntsin htung hte, de a shadun ku hpe mung nang chya nna shachyoi shapra na rai wu ai.

¹²Arun hte shi a shadang sha ni hpe mung shawa sum chyinghka lam de nang woi la nna shanhte hka shin na rai mu ai.

¹³Arun hpe mung dai chyoi pra ai hpun palawng nang jahpun nna, nye a man e hkinjawng amu gun nga na matu, shi hpe namman chya ai hte shachyoi shapra na rai wu ai.

¹⁴Shi a shadang sha ni hpe mung nang woi la nna, hpun palawng jahpun nhtawm,

¹⁵nye a man e hkinjawng amu gun hpa nga lu na matu, shanhte a kawa hpe chya ai zawn shanhte hpe mung namman chya na rai wu ai: shanhte hpe namman chya ai lam gaw shanhte a shu mashi shu masha prat dingsa na hkinjawng lam a hkringhtawng rai malu ai, ngu wu ai.

¹⁶Mawshe mung, Yehowa shi hpe hkang da mada hte maren shing rai galaw wu ai.

¹⁷Shing rai ni ning shaning, shata langai a nnan shani hta Mawshe gaw dai sumpan nta sharawt wu ai.

¹⁸Mawshe gaw dai sumpan nta sharawt wu yang, de a machyaw ni bang da nna, hpunpyen ni hpe shadun nhtawm, htinggrang ni dinghkrawn ai hte de a shadaw ni sharawt da wu ai.

¹⁹Dai sumpan nta ntsa e dai sum shi kahpyen galup nna, dai sum ntsa e mung de a magap bai galup wu ai: dai gaw Yehowa Mawshe hpe hkang da ai hte maren rai nga ai.

²⁰Bai, dai sakse lungpa shi la nna dai sumpu hta bang nhtawm, dai sumpu hta kandang dinghkrawn nna de a chyeju magap hte dai hpe magap tawn wu ai:

²¹dai sumpu hpe sumpan nta nhku e shi shawn da nna, dai sakse sumpu hpe shinggang da na matu, nba shinggang grang da wu ai: dai gaw Yehowa Mawshe hpe hkang da ai hte maren rai nga ai.

²²Muk ku hpe mung dai shawa sum a sumpan nta a nhku e, dai nba shinggang a shinggan, dingdung maga de tawn da wu ai:

²³dai ku hta Yehowa a man e madun dan ai muk mung shi mara da wu ai: dai gaw Yehowa Mawshe hpe hkang da ai hte maren rai nga ai.

²⁴Pyengdin shadun mung, dai shawa sum a sumpan nta a nhku, dingda maga, muk ku hte tawtap e shi tawn da nna,

²⁵Yehowa a man e pyengdin ni hpe shatu tawn wu ai: dai gaw Yehowa Mawshe hpe hkang da ai hte maren rai nga ai.

²⁶Ja hkungri hpe mung shawa sum a sumpan nta nhku, dai nba shinggang a shinggan e tawn da nna,

²⁷dai hkungri hta manam pyaw ai baw nat da wu ai: dai gaw Yehowa Mawshe hpe hkang da hte maren rai nga ai.

²⁸Dai sumpan nta a chyinghka lam e mung, dai chyinghka grang shi grang da wu ai.

²⁹Wan nat hkungga a tawn hkungri hpe mung, shawa sum a sumpan nta chyinghka lam ang e tawn da nna, dai tawn hkungri hta wan nat hkungga hpe mung, shadung kumhpa hpe mung nat nawng wu ai: dai gaw Yehowa Mawshe hpe hkang da ai hte maren rai nga ai.

³⁰Ntsin htung hpe mung shawa sum hte tawn hkungri a lapran e shi tawn da nna, kashin kamun rai na matu, dai hta e ntsin bang da wu ai.

³¹Mawshe mung, Arun hte shi a shadang sha ni mung dai hta lagaw lata shin ma ai:

³²shawa sum nhku de shang na rai yang mung, tawn hkungri de sit sa na rai yang mung, shanhte shin ma ai: dai gaw Yehowa Mawshe hpe hkang da ai hte maren rai nga ai.

³³Dai sumpan nta hte tawn hkungri a grup yin e dai wang shi sharawt nna, dai wang a chyinghka lam e chyinghka grang grang da wu ai. Shing rai Mawshe gaw dai amu hpe shangut wu ai.

³⁴Shaloi dai sumwi gaw shawa sum hpe ka-up nna Yehowa a hpung shingkang dai sumpan nta hta hpring nga ai.

³⁵Shing rai dai sumwi gaw shawa sum hpe ka-up nga ai hte Yehowa hpung shingkang dai sumpan nta hta hpring nga ai majaw dai kata de Mawshe n shang lu wu ai.

³⁶Dai sumpan nta ntsa na sumwi shalun la jang, Israela kashu kasha ni gaw shanhte hkawm sa wa na lam de hkawm sa wa wa rai ma ai:

³⁷dai sumwi n shalun la yang gaw, shalun la ai shani du hkra n hkawm n sa ai nga nga rai ma ai.

³⁸Kaning rai nme law, Israela nta masha ni hkawm sa wa ai lam dingdung hta, shanhte mahkra a man e Yehowa a sumwi gaw sumpan nta ntsa e, shani e jung nga nna, shana e dai nhku hta wan htoi nga ai.