Read Jinghpaw Hanson Version Bible PRU MAT 7 Bible Online

PRU MAT 7 - Jinghpaw Hanson Version Bible bible

PRU MAT 7

¹Dai re ai majaw Karai Kasang gaw Mawshe hpe, “Yu u, Ngai nang hpe Hpara-u a ntsa e Karai Kasang zawn san da sade ai rai nna, na nhpu Arun gaw na a myihtoi tai na ra ai.

²Ngai nang hpe tsun matsun nang hti bang nna, Israela a kashu kasha ni hpe Hpara-u shi a mung na dat ya na lam na nhpu Arun gaw shi kaw tsun na rai wu ai.

³Ngai mung Hpara-u a masin shaja ya nna, Egutu mung e nye a lamik kumla hte mauhpa ningsam shalaw na we ai.

⁴Hpara-u chyawm gaw nan a ga n madat ya na ra ai rai nna, ngai mung nye a lata Egutu mung ntsa e dawn nna, ari kaba hte nye a wunawng wuwa, nye a amyu Israela a kashu kasha ni hpe, Egutu mung na woi shapraw la na we ai.

⁵Shing rai Egutu mung a ntsa e nye a lata dawn nna, shanhte a kata na Israela a kashu kasha ni hpe ngai shapraw wa ai shaloi, ngai Yehowa rai nga nngai gaw, Egutu masha ni chye na mara ai,” ngu wu ai.

⁶Mawshe yan Arun mung Yehowa shan hpe hkang dat ai hte maren galaw ma ai.

⁷Shan gaw Hpara-u kaw shang tsun ai shaloi, Mawshe a asak matsat shi ning rai sa lu ai; Arun a asak matsat shi masum ning rai sa lu ai.

⁸Bai Yehowa Mawshe yan Arun hpe tsun wu ai gaw:

⁹“Hpara-u nan hpe, Nan di lu ai mauhpa lam madun yu mi, nga yang, Na a dawhkrawng Hpara-u a man e kabai tawn u, ngu nna Arun hpe tsun u; shaloi dai gaw lapu tai na ra ai,” ngu wu ai.

¹⁰Mawshe yan Arun mung Hpara-u kaw shang nna, Yehowa hkang dat ai hte maren galaw ma ai: Arun gaw shi a dawhkrawng hpe Hpara-u a man e mung, shi a agyi salang ni a man e mung kabai tawn wu ai rai nna, dai gaw lapu tai lu ai.

¹¹Shaloi Hpara-u gaw shi a hpaji sara ni hte mandan bau ai ni hpe shaga la nna, Egutu mung na lakle sara ni mung tinang a lakle hte dai hte maren galaw ma ai:

¹²langai hte langai tinang a dawhkrawng hpe kabai tawn nna dai gaw lapu tai malu ai: Arun a dawhkrawng chyawm gaw shanhte a dawhkrawng ni hpe mayu kau ya wu ai.

¹³Shing rai, Yehowa tsun ai hte maren, Hpara-u a masin ja nga lu ai rai nna, shan a ga hpe n madat ya wu ai.

¹⁴Bai Yehowa gaw Mawshe hpe, Hpara-u masin ja nga lu ai rai nna, dai amyu hpe dat dat na shi n hkraw nga ai.

¹⁵Hpawt de Hpara-u kaw sa su; yu u, shi dai hka nu de pru sa na ra ai; shi hte jahkrum na dai hka hkin-gau e nang sa tsap lu na rai ndai; lapu tai ai dawhkrawng mung na a lata hta lang da u.

¹⁶Shi hpe ning ngu u, Nam e ngai hpe sa naw jau lu mu ga, nye a amyu hpe da dat ya mi, nga nna Hebre masha ni a Karai Kasang Yehowa gaw nang kaw ngai e shangun dat nngai: rai timung, yu u, ya du hkra nang n madat nga ndai.

¹⁷Yehowa tsun ai gaw, Ngai Yehowa rai nga nngai gaw ndai lam hta nang chye lu na ndai; yu u, nye a dawhkrawng hte ndai hka nu hpe kayat nna dai hka gaw asai tai na ra rai:

¹⁸hka hta rawng ai nga ni mung si ma na mara ai; dai hka mung manam hkying mat na ra ai; Egutu masha ni mung dai hka lu na matsat na mara ai, ngu nna hkap tsun u, ngu wu ai.

¹⁹Dai hta kaga Yehowa Mawshe hpe tsun wu ai gaw, “Arun hpe, Na a dawhkrawng la nna, Egutu mung na hka ngu ai hka shi hka nu, hka lawng hka nawng ni a ntsa e na a lata ladawn u; dai yawng gaw asai tai mu ga; shing rai hpun lawtawk ni hta rai timung, nlung yam ni hta rai timung, Egutu mung ting hta e asai tai na ra ai, ngu u,” ngu wu ai.

²⁰Shing rai Mawshe yan Arun gaw Yehowa hkang da ai hte maren galaw nna, shi gaw shi a dawhkrawng hte Hpara-u a man e mung, shi a agyi salang ni a man e mung, dai hka nu hpe kayat nna, hka nu na hka yawng gaw asai tai mat wa ai.

²¹Hka hta rawng ai nga ni mung si mat ma ai rai nna, dai hka manam hkying nga ai majaw, Egutu masha ni hka dai hpe n lu lu mu ai: Egutu mung ting gaw asai hkrai pri rai nga ai.

²²Egutu lakle sara ni mung shanhte a lakle hte dai zawn galaw ma ai: shing rai Yehowa tsun ai hte maren Hpara-u a masin ja nga lu rai nna shan a ga n madat ya wu ai.

²³Hpara-u gaw shi a nta de wa nna dai lam hpe myit gun da wu ai n rai.

²⁴Shaloi Egutu masha ni yawng hte gaw, dai hka nu hka n lu lu ai majaw, hka lu lu na matu dai hka nu hka kau hkan e htu ma ai.

²⁵Yehowa dai hka hpe kayat ari jaw ai hpang sanit ya lai hkra rai nga ai.