Read Jinghpaw Hanson Version Bible PRU MAT 8 Bible Online

PRU MAT 8 - Jinghpaw Hanson Version Bible bible

PRU MAT 8

¹Bai Yehowa gaw Mawshe hpe, Hpara-u kaw shang nna, Yehowa ning nga ai, ngu u: “Nye a amyu ngai hpe sa naw jau lu mi ga, shanhte hpe dat dat ya e:

²n dat ya na nga, nang ndang n yang gaw, yu u, na a mung ting hpe shu hte ngai ari jaw na de ai:

³dai hka na shu kanawng pru na ra ai rai nna, dai ni gaw na a nta e mung, na a yup ra hta mung, na a agyi salang ni a nta e mung, na amyu masha ni hta mung, na a muk kabaw na wan htung ni hta mung, na a shadung gumrin ai n-gawt ni hta mung lung wa na mara ai:

⁴dai shu ni gaw nang hta mung, na amyu masha ni hta mung, na agyi salang ni yawng hta mung lung wa na mara ai, ngu u,” ngu nna tsun wu ai.

⁵Bai Yehowa Mawshe hpe tsun wu ai gaw, “Arun hpe, Egutu mung hta shu shalun na matu, hka nu ni a ntsa e, hka shi ni a ntsa e, hka lawng ni a ntsa e, na lata sharawt nna dawhkrawng hte dawn u, ngu nna tsun u,” ngu wu ai.

⁶Shing rai Arun gaw Egutu mung ting na hka ntsa e shi a lata dawn wu ai rai nna, shu ni lung wa ai hte Egutu mung ting hprwi rai nga ai.

⁷Lakle sara ni mung shanhte a lakle hte dai zawn galaw nna, Etutu mung hta shu shalun la mu ai.

⁸Shaloi Hpara-u gaw Mawshe yan Arun hpe shaga la nna, “Yehowa kaw ngai hte nye a amyu masha ni kaw na shu seng kau ya na hpyi nem ya e; shing rai ndai amyu gaw Yehowa hpe hkungga jaw na matu, ngai shanhte hpe dat dat na mawe ai,” ngu wu ai.

⁹Shaloi Mawshe gaw, “Nang hte na a nta na shu ni hpe seng kau nna, hka nu hta sha ngam nga hkra, nang hte na a agyi salang ni a matu, na a amyu masha ni a matu ngai hpyi nem ya na ahkying nang nan ngai hpe daw dat ya e,” ngu nna Hpara-u hpe tsun wu ai.

¹⁰Shi gaw, “Hpawt de rai u ga,” ngu wu ai. Mawshe mung, “Anhte a Karai Kasang Yehowa zawn re ai Karai Kasang n nga ai gaw nang chye lu na matu, na a ga hte maren rai na ra ai.

¹¹Shaloi shu ni gaw, nang hte na a nta na mung, na agyi salang ni hte na a amyu masha ni kaw na mung pru mat wa nna dai hka nu hta sha ngam nga na mara ai,” ngu wu ai.

¹²Shaloi Mawshe yan Arun gaw Hpara-u kaw na pru wa nna, Hpara-u a ntsa e Yehowa shalun da ai shu ni a majaw, Mawshe Yehowa kaw hpyi nem ya wu ai.

¹³Yehowa mung Mawshe hpyi ai ga hte maren galaw wu ai rai nna, dai shu ni gaw, nta ni hte nta wang hkan na mung, yi hkauna hkan na mung si mat ma ai.

¹⁴Dai shu si ni hpe shanhte hta sumpum da mu ai rai nna, mung ting manam hkying nga ai.

¹⁵Hpara-u chyawm gaw nsa awai la lu nu ai rai nna, Yehowa tsun ai hte maren, shi a masin shaja ai hte shan a ga n madat ya ai nga nga ai.

¹⁶Bai Yehowa Mawshe hpe tsun wu ai gaw, “Arun hpe, Na a dawhkrawng sharawt nna, Egutu mung ting na ga nhpu machyi tai na matu, dai ga nhpu hta gayat u, ngu nna tsun u” ngu wu ai.

¹⁷Dai hte maren shan galaw nna, Arun gaw shi a lata hte dawhkrawng sharawt nna, ga nhpu hta kayat wu ai: shaloi jang masha hta mung, yamnga hta mung machyi hkrai rai nga ai: Egutu mung ting na ga nhpu yawng machyi tai nga ai.

¹⁸Lakle sara ni mung shanhte a lakle hte machyi shatai na dai zawn di yu mu timung, n di lu mu ai: shing rai masha hta mung yamnga hta mung machyi hkrai puk rai nga ai.

¹⁹Dai rai nna lakle sara ni, “Ndai gaw Karai Kasang a lata nan rai lu ai,” nga nna Hpara-u hpe tsun ma ai: rai timung Yehowa tsun ai hte maren, Hpara-u a masin ja nga lu ai rai nna, shan a ga n madat ya ai nga nga ai.

²⁰Bai Yehowa gaw Mawshe hpe “Hpawt de jau jau rawt nna, hka de pru sa wa ai, Hpara-u a man e sa tsap nhtawm, Yehowa ning nga ai: ‘Nye a amyu masha ni ngai hpe daw jau lu mu ga, shanhte hpe dat dat mu.

²¹Nye a amyu masha ni hpe nang n dat n-yang gaw, yu u, nang hta mung, na a agyi salang ni hta mung, na a amyu masha ni hta mung, na a nta ni hta mung, ngai jinghkam shalun dat na ring ngai: shaloi Egutu masha ni a nta ni hte, shanhte nga ai ga hta, jinghkam hkrai chyat rai na ra ai.

²²Dai hta kaga, ka-ang ga e ngai Yehowa rai nga nngai gaw nang chye lu na matu, dai nhtoi hta, nye a amyu masha ni nga ai Goshen mung hpe ngai ginhka da na we ai rai nna, dai hta jinghkam nga na ra ai n rai.

²³Shing di nye a amyu hte na a amyu a lapran e ngai madin din da na we ai: dai lamik kumla hpawt ni e byin pru na ra ai,’ ngu nna tsun u,” ngu wu ai.

²⁴Yehowa shing di galaw wu ai rai nna, Hpara-u a nta hta mung, shi a agyi salang ni a nta hta mung, nachying yak la ai jinghkam wunawng ni du ma ai: Egutu mung ting gaw dai jinghkam ni a majaw hten mat magang wa nga ai.

²⁵Shaloi Hpara-u gaw Mawshe yan Arun hpe shaga la nna, “Ndai mung e nanhte a Kari Kasang hpe hkungga sa jaw mu,” ngu wu ai.

²⁶Mawshe gaw, “Dai hku mai na n rai; dai hku di yang, Egutu masha ni matsat ai baw, anhte a Karai Kasang Yehowa hpe nawng na ga ai: Egutu masha ni matsat ai baw shanhte a man e nawng ya yang shanhte gaw nlung hte anhte hpe kabai sat na ma ai n rai ni?

²⁷Dai rai nna nam de masum ya sat sa nhtawm, anhte a Karai Kasang Yehowa tsun ai hte maren hkungga sa jaw na ga ai,” ngu nna tsun wu ai.

²⁸Shaloi Hpara-u gaw, “Nanhte a Karai Kasang Yehowa hpe nam e hkungga sa jaw na ngai nanhte hpe dat dat na made ai: rai timung tsan tsan sa lu na myit dai n rai: nye a matu hpyi nem ya mi,” ngu wu ai.

²⁹Mawshe mung, “Yu u, nang kaw na ngai pru wa nna, Hpara-u hte shi a agyi salang ni kaw na mung, shi a amyu masha ni kaw na mung hpawt de jinghkam hkoi mat hkra, Yehowa kaw ngai hpyi nem ya na ring ngai: rai timung dai amyu masha ni Yehowa hpe hkungga sa jaw na lam, Hpara-u bai n hkalem u ga,” ngu wu ai.

³⁰Shaloi Mawshe gaw Hpara-u kaw na pru nna, Yehowa hpe hpyi nem wu ai.

³¹Yehowa mung Mawshe a ga hte maren galaw wu ai rai nna, dai jinghkam ni hpe Hpara-u hte shi a agyi salang ni kaw na mung, shi a amyu masha ni kaw na mung, langai mi muk n ngam hkra jahkoi kau ya wu ai.

³²Hpara-u chyawm gaw shaloi na hta mung shi a masin shaja nna dai amyu hpe n dat dat ai nga ga ai.