Read Jinghpaw Hanson Version Bible GA SHAGAWP 11 Bible Online

GA SHAGAWP 11 - Jinghpaw Hanson Version Bible bible

GA SHAGAWP 11

¹Yehowa gaw n man ai joi jang hpe matsat nna, Tengman ai joi si hpe, ra sharawng nga ai.

²Gumrawng gumtawng yang, kaya kahpa pru; Myit shagrit ai ni, hpaji byeng-ya lu.

³Tengman ai ni a malang ai myit, shanhte hpe awn wa nga ai; Myit magaw ai ni a hkalem ai myit chyawm gaw, shanhte hpe shaza kau nga ai.

⁴Sindawng kahtet ai shani e sutgan gaw hpa akyu n nga ai; Dinghpring ai lam chyawm gaw, si ai kaw na mawai la nga ai.

⁵Hkum tsup ai wa a dinghpring ai myit shi hpe woi awn na ra ai; Tara n lang ai wa chyawm gaw tinang n hkru ai hta kadawng mat na ra ai.

⁶Myit malang ai ni a dinghpring ai gaw, shanhte hpe mawai la na ra ai; Hkalem hkalau ai ni chyawm gaw tinang maw sha ai hta hkang mat na mara ai.

⁷Tara n lang ai wa si yang, shi myit mada ai lam htum mat nna, N hkru ai ni a marit ai lam hten mat na ra ai.

⁸Dinghpring ai wa gaw, nni nkri kaw na lawt wa nna, Tara n lang ai wa, shi a malai hkrum sha na ra ai.

⁹N shawp ai wa a n-gup gaw, htingbu wa hpe shayuk kau nga ai; Dinghpring ai wa chyawm gaw, chye chyang ai hte lawt lu na ra ai.

¹⁰Dinghpring ai ni ngamu ngamai yang, mare ting kabu nga ai; Tara n lang ai wa, hten byak hkrum yang chyawm gaw, garu jahtau nga ma ai.

¹¹Myit malang ai ni a shaman ai hte mare gaw galu kaba nga ai; Tara n lang ai ni a n-gup hte dai hpe jahten kau nga ai.

¹²Myit n su ai wa gaw, htingbu wa hpe n kaw n law rai nga ai; Nyan rawng ai wa chyawm gaw, atsin sha rai nga ai.

¹³Nwan hkawm nna shi htawn ai wa, ip da mai ai lam sha brawng dat ai; Kangka myit rawng ai wa chyawm gaw, makoi magap da nga ai.

¹⁴Hpaji daw chye ai nyan n rawng yang, mung masha ni sum wa ma ai; Hpaji daw chye ai ni law nga yang, lawt pru shara nga ai.

¹⁵Tsasam wa matu pahkam hkam ai wa gaw, yawn hpa hkrum na ra ai; Pahkam n hkam hkraw ai wa chyawm gaw, myit tsang shara n nga ai.

¹⁶Ra sharawng mai ai num gaw, arawng sadang lu, Daru magam rawng ai wa gaw sut su nga ai.

¹⁷Matsan dum chye ai wa gaw, shi hkum hpe lanu lahku nga ai; Sheng mareng re ai wa chyawm gaw, shi hkum shan hpe pyi sharu nga ai.

¹⁸Tara n lang ai wa gaw, maw sha map sha ai shabrai lu la nga ai; Dinghpring ai nli gat ai wa chyawm gaw, grin nga ai shabrai lu la na ra ai.

¹⁹Shing rai dinghpring ai gaw asak lam rai nga ai; yubak hpe hkan tam ai wa gaw, shi si na hpe hkan tam nga ai.

²⁰Yehowa gaw myit magaw ai ni hpe matsat nga ai; Hkum tsup ai lam hkan ai ni hta shi awng sharawng nga ai.

²¹N hkru ai ni shada matut timung, mara lawt lu na, n rai; Dinghpring ai ni a aru arat chyawm gaw lawt lu na mara ai.

²²Tsawm htap timung, sari n rawng ai num gaw, Wa kanu a nnaw hta noi ai ja shanghkawng hte bung nga ai.

²³Dinghpring ai ni a marit ai hku, mai kaja ai hkrai rai nga ai; Tara n lang ai ni a myit mada ai lam chyawm gaw, pawt sindawng ai hkrai rai nga ai.

²⁴Jaw kau timung, sut su wa ai wa mung, nga ai; N taw n tsang mahkawng da timung, matsan hkrum ai wa mung nga ai.

²⁵N daw n hta jaw ai wa gaw, hpum wa na ra ai; Ntsin jaw bun ai wa gaw, jaw bun ai bai hkrum na ra ai.

²⁶Mam n dut hkraw ai wa gaw, dagam dala hkrum na ra ai; Dut ya ai wa chyawm gaw, shaman ai lu la na ra ai.

²⁷Mai kaja ai hpe tam shakut ai wa gaw, akyu hkam la na ra ai; N hkru ai hpe hkan shachyut ai wa gaw, dai hpe hkrum na ra ai.

²⁸Tinang sutgan hta hpa ai wa gaw, kadawng mat na ra ai; Dinghpring ai wa chyawm gaw, tsit lali ai hpun lap zawn prut wa na mara ai.

²⁹Tinang a dinghku hpe sharu shatsang ai wa gaw, nbung sali hkam la na ra ai; Nyan tang ai wa gaw, hpaji rawng ai wa kaw yam na ra ai.

³⁰Dinghpring ai wa a asi gaw, asak hpun a asi rai nga ai; Masha myit masin hpe woi awn lu ai wa gaw, hpaji lu ai wa rai nga ai.

³¹Yu u, dinghpring ai wa pyi, ga ntsa e ari hkrum nga ai rai yang, Tara n lang ai wa hte yubak kap ai wa grau nna hkrum na, n rai ni?