Read Jinghpaw Hanson Version Bible HPAJI NINGLI 1 Bible Online

HPAJI NINGLI 1 - Jinghpaw Hanson Version Bible bible

HPAJI NINGLI 1

¹Dawi a kasha, Yerusalem hkawhkam, Tara Hkaw Sara a mung sumtu gaw, da ndai rai nga ai:

²‘Kaman lila, kaman lila,’ nga nna Tara Hkaw Sara nan tsun nga ai. Kaman lila, kaman lila, yawng mayawng kaman lila hkrai rai nga ai.

³Shinggyim masha gaw jan a npu e shachyen ai amu bungli yawng hta na, hpa akyu hkam la lu a ta?

⁴Masha a ban mi lai wa nna, ban mi bai paw pru nga ai: ginding aga chyawm gaw, dinggrin anga nga ai.

⁵Ajan mung, pru pru shang shang rai nna, shi pru wa ai shara de bai nhtang gat nga ai.

⁶Nbung gaw dingda maga de ang wa nna, dingdung maga hku bung pru wa ai: dai gaw tutnawng bung kayin nga nna, myi na lam de bai nhtang wa ai.

⁷Hka nu ni yawng nammukdara hta lwi ju nga timung, nammukdara gaw hpring wa ai n rai: hka nu ni ang wa ai shara de, n sim n sa lwi wa nhtawm, bai nhtang htang rai nga ai.

⁸Yawng mayawng gaw, masha n tsun lu hkra, hki ba shangun ai amu hkrai rai nga ai; myi gaw mu mada timung, mu jin ai, n rai; na gaw na lu timung, na tsu ai n rai.

⁹Byin na ra ai amu gaw, byin ngut sai amu hkrai rai nga ai; ya galaw ai amu gaw, galaw ngut sai amu hkrai rai nga nna, jan a npu e amu ningnan hpa mung n nga ai.

¹⁰Yu u, da ndai gaw amu ningnan rai nga ai, nga nna tsun dam yang, dai gaw moi chyaloi nhkoi, anhte a shawng e, byin ngut sai hkrai rai nga ai.

¹¹Lai wa sai aprat ni hpe, kadai mung n dum lu ai; htawm hpang e du na ra ai ni mung, hpang na aprat ni hpe chye matsing lu na ma ai n rai.

¹²Ngai Tara Hkaw Sara gaw, Yerusalem mare hta, Israela ntsa e hkawhkam rai nga nngai.

¹³Ngai gaw, sumsing lamu npu e nga manga pra mapra hpe, hpaji byeng-ya hte sawk manaw yu na nga, myit shada da nngai: Karai Kasang shinggyim masha ni hpe jaw da ai amu bungli gaw, yak la ai amu hkrai rai nga ai.

¹⁴Jan a npu e shachyen ai amu amyu shagu hpe ngai mada mu ni ai; yu u, yawng hte gaw kaman lila hte nbung hpe shachyut ai hkrai rai nga ai.

¹⁵Magaw ai hpe malan lu ai n rai; yawm ai hpe hti shalawm lu ai n rai.

¹⁶Ngai gaw, Yerusalem mare hta e, nye a shawng e nga nga ai ni mahkra hta hpaji byeng-ya grau lu la nngai; gaja wa nye a myit masin gaw, zai byeng-ya, hpaji hparat hte chye chyang kaba rawng li ai, nga nna nye a kraw e ngai tsun nngai.

¹⁷Shing rai ngai gaw hpaji byeng-ya hpe mung, myit n su ai hte angawk ai lam hpe mung chye ginhka lu n ga, ngai myit makun nga nngai: dai mung nbung hpe shachyut ai hkrai rai nga ai gaw, ngai myit dum nngai.

¹⁸Kaning rai nme law, hpaji byeng-ya law yang, myit ru lam law wa ai; chye chyang jat ai wa gaw, yawn hkyen ai hpe shajat nga ai.