Read Jinghpaw Hanson Version Bible HPAJI NINGLI 11 Bible Online

HPAJI NINGLI 11 - Jinghpaw Hanson Version Bible bible

HPAJI NINGLI 11

¹Na a lusha hpe hka hta shayawng dat u; nhtoi gade n na yang, dai hpe bai mu na rin dai.

²Marai sanit sha n rai, marai matsat hpe karan jaw u; kaning rai nme law, ga ntsa e n hkru ai hpa byin na hpe nang n chye ndai.

³Sumwi ni ntsin hte hpring jang, ga ntsa de htu hkrat wa ai; hpun gaw dingda maga de daw wa tim, dingdung maga de daw wa tim, daw wa ai maga e taw nga ai.

⁴Nbung madat ai wa gaw nli gat lu ai, n rai; sumwi mada ai wa gaw mam dan lu ai, n rai.

⁵Nbung bung wa ai lam hte, gawng li ai num a hkritung e nrut nra ni kaning rai byin wa ai hpe, nang n chye lu ai zawn, yawng mayawng hpe hpan da ai Karai Kasang a magam bungli hpe mung, nang n chye lu ndai.

⁶Jahpawt jau jau e nli gat u; shana aten hta mung, n gat ai, hkum nga et; kaning rai nme law, gara mahtang tu na n tu na kun, dai lahkawng yan maren tu kaba wa na kun, nang n chye ndai.

⁷Gaja wa, nhtoi gaw dwi nga ai; myi gaw jan a nsam mu yang, pyaw lam rai nga ai.

⁸Rai sa, masha wa gaw law law ning hkrung nga yang, dai yawng hte hta shi kabu gara nga mai ai rai timung, du na ra ai nsin sin ai nhtoi ni hpe naw dum nga u ga; dai nhtoi ni gaw law nga ai. Du na ra ai yawng hte gaw kaman lila rai nga ai.

⁹Shabrang wa e, na a brang ram prat e kabu gara nga u; brang ram aten e na a myit masin ngwipyaw nga nna, nang myit sharawng awng ai hte, na a myi madun ai de, hkan sa u; rai timung, dai lam yawng mayawng a matu, Karai Kasang nang hpe tara dara na ra ai, adum nga u.

¹⁰Dai re ai majaw, na a myit masin hta na yawn hkyen ai hpe, na a hkumhkrang hta na aru ara hpe, yeng kau u: kaning rai nme law, brang ram aprat hte chyang ai kara gaw, kaman lila rai nga ai.