Read Jinghpaw Hanson Version Bible HPAJI NINGLI 12 Bible Online

HPAJI NINGLI 12 - Jinghpaw Hanson Version Bible bible

HPAJI NINGLI 12

¹Na a brang ram prat e, na a Hpan Wa Ningsang hpe mung adum nga u: “Dai nhtoi ni hpe ngai n ra ni ai,” nga nna myit ru myit ra ai nhtoi ni garai n du ai hte, shaning ni garai n ni wa yang;

²ajan hte ahtoi, shata hte shagan ni, garai n sin mat nna, sumwi ni marang jahtu ai hpang e garai n mung wa yang, shi hpe dum u:

³Dai nhtoi ni hta nta sin ai ni gari wa nna, n-gun ja ai ni hkum htingkung na mara ai; mam rin ai ni n law ai majaw sim mat nna, hkuwawt hku kaw na mada azi yu ai ni sin mat na mara ai;

⁴Lam chyinghka ni la da nga nna, mam rin ai nsen yawm nga ai; dai shaloi masha gaw, u ngoi ai nsen na jang, rawt nna, mahkawn mangoi ai shayi ma ni a nsen kaji wa na ra ai;

⁵Gaja wa, masha gaw dai shaloi e tsaw ai shara hpe hkrit nna, lam hkan e hkrithpa hkrum na tsang na mara ai; lahkyang hpun pu hpraw wa nna, hkagrit garu ai n ji ai hte, shi myit kayut ai lam sim wa na ra ai: kaning rai nme law, shinggyim masha gaw shi a htani htana prat dingsa nta de sa wa magang nna, sharung shayawt ai ni gaw, mare lam hkan e kahkrang hkawm nga ma ai:

⁶Gumhpraw sumri sumdam garai n dut mat nna, aja gawm garai n grawp mat yang, hka hpawk makau e dibu garai n waw mat nna, hka htung gawng garai n daw mat yang;

⁷ga nhpu gaw ga de garai n htang wa ai hte, wenyi gaw, wenyi jaw ya ai Karai Kasang hpang de garai n wa wa gaw, Hpan Wa Ningsang hpe dum nga u law.

⁸Kaman lila, kaman lila, yawng mayawng kaman lila hkrai rai nga ai, nga nna Tara Hkaw Sara nan tsun nga ai.

⁹Dai hta n-ga, Tara Hkaw Sara gaw, hpaji rawng ai wa rai nga ai majaw, mung masha ni hpe sharin achyin ya nga ai; gaja wa, shi sumru yu nna sawk yu let, ga shagawp law law hpajang da nu ai.

¹⁰Bai Tara Hkaw Sara gaw, htaphtuk ai sumtu ga hte, kangka ai myit hte ka da nga sai, tengman ai ga hpe mung, sawk manaw yu nga ai.

¹¹Hpaji rawng ai wa a ga gaw, majawn hte bung nga ai: sagu rem wa langai sha jaw da ai hte, masha hpung ni hpe shadum jahprang chye nna, htawn tsun ai sara ni a ga gaw, dit jung da ai hpri masen hte bung nga ai.

¹²Dai hta n-ga, ngai sha e, dai zawn re ai ga hte sharin achyin hkam la u: laili laika law law hpe ka da na, n htum hkraw ai: laika law law sharin ai gaw, tinang hkum shaba ai hkrai rai nga ai.

¹³Yawng mayawng ya shapraw ngut sai; ga kanu gaw da ndai rai nga ai: Karai Kasang hpe hkrit hkungga nna, shi hkang da ai ga hpe madat mara nga u; dai gaw shinggyim masha ni a lam madung rai nga ai.

¹⁴Kaning rai nme law, Karai Kasang gaw makoi magap da ai amu yawng mayawng hpe, kaja ai rai timung, n kaja ai rai timung, tara tingnyang hta dawdan na ra ai.