Read Jinghpaw Hanson Version Bible HPAJI NINGLI 2 Bible Online

HPAJI NINGLI 2 - Jinghpaw Hanson Version Bible bible

HPAJI NINGLI 2

¹Bai ngai gaw, Sa rit, ngwi ngawn ai hte ngai nang hpe chyam yu di ga; nang mai kaja ai lam mu hkrup na ndai, nga nna nye a kraw e ngai tsun nngai: yu mu, dai mung kaman lila sha rai nga ai.

²Mani ai gaw, Myit n su ai rai nga ai; ngwipyaw ai gaw, Hpa lam la a ta? nga nna ngai tsun nngai.

³Bai, shinggyim masha ni gaw, tinang a prat dingsa e sumsing lamu npu e galaw mai na lam chye ginhka lu hkra, ngai gaw hpaji byeng-ya lam naw hkan let, nye a hkum shan hpe tsabyi jahku hte shapyaw na rai timung, angawk ai lam hpe hkan nang na rai timung, myit chyam yu nngai.

⁴Ngai gaw amu kaba hpajang da nngai: nta ni gap da nngai; tsabyi sun ni hkai da nngai:

⁵shat mai sun ni, yu chyai sun ni ngai hpajang da nna, namsi hpun amyu myu hkai sharing da nngai:

⁶hkai da ai hpun maling ni hpe ntsin jaw na matu hka lawng mung galaw da nngai:

⁷la mayam, num mayam ngai mari la nna, nye a nta hta mayam ni mayat wa ma ai; Yerusalem mare e, nye a shawng e dung nga ai ni mahkra hta, ngai gaw yamnga hpung, sagu bainam hpung grau lu nngai:

⁸aja gumhpraw mung, hkawhkam ni a sutgan hte mungdaw ni hta na hkansi hpe ngai mahkawng da nngai; mahkawn mangoi chye ai, la rai timung, num rai timung, ngai shaga la nna, masha hpe chye shapyaw ai numdung hte lashi num law law lu nngai.

⁹shing rai ngai gaw, Yerusalem mare hta e, nye a shawng e dung nga ai ni mahkra hta, grau kaba wa nngai: nye a hpaji byeng-ya mung grin nga ai.

¹⁰Nye a myi ra gasit ai hpa rai timung, ngai n gang kau nngai; ngai galaw ai amu mahkra hta, nye myit kabu nga lu ai majaw, nye myit pyaw hpa ra mara hpe ngai n dang nngai: dai gaw nye amu mahkra a amyat rai nga ai.

¹¹Shaloi nye a lata galaw ai amu mahkra hte, ngai shachyen ai bungli yawng mayawng hte hpe ngai mada yu nna, yu u, nlang hte gaw kaman lila hte, nbung hpe shachyut ai hkrai rai nga ai; jan a npu e akyu hpa mung n nga sai.

¹²Bai, hpaji byeng-ya hpe mung, myit n su ai hte angawk ai lam hpe mung, ngai kayin sumru yu nngai; kaning rai nme law, hkawhkam wa a hpang e hkan nang ai wa gaw, hpa galaw lu na rai ta? moi galaw yu ai hte maren sha, galaw lu nga ai.

¹³shaloi jang, nhtoi gaw nsin hta grau nga ai hte maren, hpaji byeng-ya gaw angawk ai hta grau nga ai gaw ngai mu chye nngai.

¹⁴Hpaji rawng ai wa a myi gaw shi a baw e tu nga ai; angawk ai wa chyawm gaw nsin hta e hkawm nga ai; rai timung, shan lahkawng lam langai sha hkrum na mara ai hpe ngai dum nngai.

¹⁵Dai rai nna, Angawk ai wa hkrum ai zawn, ngai mung hkrum na rai yang, ngai shi hta hpa majaw hpaji byeng-ya grau rawng n ta? nga nna nye a kraw e ngai tsun nngai. Bai ngai gaw, Dai mung kaman lila hkrai rai nga ai, nga nna tsun nngai.

¹⁶Kaning rai nme law, hpaji byeng-ya rawng ai wa hpe rai timung, angawk ai wa hpe rai timung, htawm hpang e kadai dum nga ai n rai; ya byin nga ai amu hpe htawm hpang prat e malap kau ai hkrai rai nga ai; dai hta n-ga, hpaji byeng-ya rawng ai wa gaw, angawk ai wa zawn, si wa a hka!

¹⁷Shing rai, jan a npu e shachyen ai amu gaw, nye a matu yak la ai amu hkrai rai nga ai majaw, ngai nye a asak hpe n dawng nngai: kaning rai nme law, yawng hte gaw kaman lila hte nbung hpe shachyut ai hkrai rai nga ai.

¹⁸Dai hta kaga, ngai shachyen ngut sai amu ni hpe, nye hpang e du na ra ai wa a matu htawng da ya ang ai majaw, jan a npu e ngai galaw ai magam bungli mahkra hpe ngai n dawng nngai:

¹⁹dai wa gaw hpaji rawng na kun, angawk ai wa tai na kun, kadai chye lu a ta? Rai timung, jan a npu e nye a hpaji byeng-ya hte ngai shangut ai magam bungli mahkra a ntsa e shi up na ra ai: dai mung kaman lila hkrai rai nga ai.

²⁰Dai re ai majaw, jan a npu e ngai shakut sharang ai magam bungli mahkra hta, gawng run shara hkrai rai nga ai, ngu nna nye myit hpe shatawng da we ai.

²¹Kaning rai nme law, marai langai mi hpaji byeng-ya, chye chyang ai hte maka kumla chye shapraw timung, dai amu hta hpa n shakut lawm ai wa a matu htawng da ya ang ai majaw, dai mung kaman lila hte yubak kaba rai nga ai.

²²Masha gaw jan a npu e amu galaw ai mahkra hte, shi a myit shakut sharang ai lam a majaw, hpa akyu lu la a ta?

²³Shi gaw shi a prat tup yawn hkyen ai hkrum sha nna, shi a amu bungli ni ruyak ai hkrai rai nga ai; gaja wa shana e pyi shi myit awai lu ai n rai. Dai mung kaman lila rai nga ai.

²⁴Masha gaw shi a amu bungli galaw let, lusha nna myit pyaw nga lu ai hta, grau kaja ai gaw nga lu ai n rai; dai mung Karai Kasang a lata kaw na rai nga ai hpe ngai mu chye nngai.

²⁵Ngai hta grau lusha nna, ngai hta grau pyaw lu ai gaw, kadai wa rai ta?

²⁶Kaning rai nme law, Karai Kasang, shi sharawng awng ai hpe hpaji byeng-ya, chye chyang ai hte kabu gara ai jaw ya let, shi sharawng awng ai wa hpe jaw na matu, lahkawn la nna mahkawng da na nga, shi gaw yubak kap ai wa hpe amu makan galaw shangun nga ai. Dai mung kaman lila hte nbung hpe shachyut ai hkrai rai nga ai.