Read Jinghpaw Hanson Version Bible HPAJI NINGLI 3 Bible Online

HPAJI NINGLI 3 - Jinghpaw Hanson Version Bible bible

HPAJI NINGLI 3

¹Yawng mayawng a matu du hkra ladaw nga nna, sumsing lamu npu e ra mara matu aten nga nga ai:

²shangai ai aten hte si wa na aten mung nga ai; gat hkai ai aten hte gat hkai ai hpe baw kau na aten mung nga ai;

³sat kau ai aten hte, nma shamai ai aten mung nga ai; run kau ai aten hte, nta gap na aten mung nga ai;

⁴hkrap ngu hkrap ngoi ai aten hte, mani ai aten mung nga ai; sharung shayawt ai aten hte, ka manawt na aten mung nga ai;

⁵nlung hpe kabai kau ai aten hte, nlung hpe mahkawng da ai aten mung nga ai; ginshum ai aten hte n ginshum ai aten mung nga ai;

⁶tam mai ai aten hte sum mat ai aten mung nga ai; kyem da ai aten hte kabai kau ai aten mung nga ai;

⁷gang je kau ai aten hte chywi ai aten mung nga ai; atsin sha nga ai aten hte, ga tsun na aten mung rai nga ai;

⁸tsawra ai aten hte n dawng n yawt ai aten mung nga ai; hpyen gasat ai aten hte hpyen sim ai aten mung nga ai.

⁹Amu bungli galaw ai wa gaw, shi shakut sharang ai hta, hpa akyu lu la a ta?

¹⁰Shinggyim masha ni hki ba na matu, Karai Kasang jaw da ai ruyak ai amu hpe ngai mu se ai.

¹¹Shi gaw yawng mayawng hpe tinang a ahkying aten hte htuk tsawm ai hku galaw da nu ai: shinggyim masha hpe htani htana prat dingsa nga nga na marit shangun timung, shi gaw Karai Kasang hpajang da ai magam bungli hpe npawt ndung hkren gawn yu lu ai n rai.

¹²Shanhte pyaw pyaw nga lu na hte, naw hkrung nga ai laman e, mai kaja ai amu galaw na hta, shanhte a matu grau kaja ai lam hpa mung n nga ai gaw, ngai chye nngai.

¹³Dai hta kaga, langai hte langai lusha nna, tinang a amu bungli a akyu hta pyaw nga lu ai gaw, Karai Kasang a chyeju kumhpa rai nga ai.

¹⁴Karai Kasang galaw ai lam yawng mayawng htani htana prat dingsa agrin nga ai hpe, ngai chye nngai: dai hta hpa mung galaw jat lu ai, n rai, hpa mung shayawm lu ai, n rai; shinggyim masha ni shi a man e hkrit gari nga na lam, Karai Kasang dai hpe galaw da nu ai.

¹⁵Ya nga ai gaw, moi chyaloi nhkoi e byin ai hkrai rai nga ai; byin na ra ai mung, moi chyaloi nhkoi e byin ngut sai rai nga ai: lai mat wa sai lam ni mung, Karai Kasang bai hkan tam nga ai.

¹⁶Dai hta kaga, tara tingnyang a malai tara n lang ai, dinghpring ai a malai n ding n hpring ai, jan a npu e rai nga ai hpe, ngai mu nngai.

¹⁷Shaloi ngai gaw, Maw mawn ai lam shagu hte amu bungli shagu a matu, san da ai aten rai nga ai majaw, Karai Kasang gaw dinghpring ai wa hte tara n lang ai wa hpe dawdan na ra ai, nga nna nye a kraw e tsun nngai.

¹⁸Bai ngai gaw, Shinggyim masha ni ashu ashan hte bung nga ai hpe, shanhte nan chye lu hkra, Karai Kasang shanhte hpe chyam yu nga ai majaw, ning rai nga ai, nga nna nye a kraw e sumru yu nngai.

¹⁹Kaning rai nme law, shinggyim masha ni hta byin ai gaw, ashu ashan ni hta mung byin nga ai; shanhte gaw lam langai sha hkrum nna, langai mi si ai zawn, kaga mung si nga ai; yawng hte gaw nsoi nsa langai sha rawng nga ai rai nna, masha wa gaw ashu ashan hta grau ai n rai: yawng hte gaw kaman lila rai nga ai.

²⁰Yawng hte gaw shara langai sha hta, du na mara ai; yawng hte gaw ga nhpu na rai nga ai hte ga nhpu de bai nhtang wa na mara ai.

²¹Shinggyim masha a wenyi gaw ntsa de lung wa ai kun, ashu ashan a wenyi gaw katsan ga de yu wa ai kun, kadai wa chye lu a ta?

²²Dai re ai majaw, masha gaw tinang a amu bungli hta pyaw nga ai hta, grau kaja ai n nga ai hpe ngai mu chye nngai; dai gaw shi a kumhtaw rai nga ai; kaning rai nme law, shi a hpang e byin na lam mu chye lu hkra, shi hpe kadai woi nhtang wa na rai ta?