Read Jinghpaw Hanson Version Bible HPAJI NINGLI 4 Bible Online

HPAJI NINGLI 4 - Jinghpaw Hanson Version Bible bible

HPAJI NINGLI 4

¹Bai, jan a npu e zingri zingrat ai lam yawng hpe ngai sumru yu nngai: zingri zingrat hkrum ai ni myi prwi pru timung, shalan shabran ai wa n nga ai; zingri zingrat ai ni adip arip di timung, shalan shabran ai wa n nga ai.

²Dai re ai majaw, moi si lai mat wa ai ni gaw, ya hkrung nga ai ni hta, ngai grau nna a ngu nngai:

³gaja wa, garai n shangai ai hte, jan a npu e byin pru ai n hkru n hkra ai amu n mu yu ai wa hpe, ngai shan lahkawng hta grau nna a ngu nngai.

⁴Bai ngai gaw, masha ni shada da manawn masham hkat ai hpaji byeng-ya amu hte maka kumla amyu myu hpe, sumru yu nngai: dai mung, kaman lila hte, nbung hpe shachyut ai hkrai rai nga ai.

⁵Angawk ai wa gaw shi a lata hkintum da nna, shi a hkum shan hpe sha nga ai.

⁶Myit pyaw let latup mi sha lu ai gaw, myit ru myit yak ai hte nbung hpe shachyut let, lata lahkawng hpring lu ai hta, akyu grau nga ai.

⁷Bai, jan a npu e kaman lila amu hpe ngai sumru yu nngai.

⁸Marai langai mi gaw kanawn manang, kashu kasha, kahpu kanau n lu timung, shi a amu n htum hkraw ai hte shi a myi sutgan hpe n yu krem nga ai. Dai rai nna shi gaw Ngai gade a matu shakut sharang ai hte, nji nmu hkrum nga nngai i? nga nna san nga ai: dai mung kaman lila hte hki ba ai amu kaba hkrai rai nga ai.

⁹Marai langai sha hta, lahkawng gaw grau mai nga ai: kaning rai nme law, shan lahkawng gaw tinang a amu majaw mai kaja ai shabrai lu la na ma ai.

¹⁰Langai mi kataw yang, langai mi shadaw na ra ai: langai sha nga ai wa kataw yang chyawm gaw, shadaw ai wa n nga nna akyu kata nga ai.

¹¹Marai lahkawng rau yup yang, lum nga ai: langai sha chyawm gaw, kaning rai lum lu a ta?

¹²Marai langai mi gaw, masha shingtai hpe dang kau lu ai rai yang, lahkawng gaw shi hpe bai dang kau na ra ai: sin masum kapyawn nna rit ai sumri hpe, aloi sha gang dut kau lu ai n rai.

¹³Sharin achyin n chye hkam ai, dingla ugut gu nna, angawk ai hkawhkam wa hta, hpaji byeng-ya rawng ai matsan mayan ma gaw, grau hpu nga ai.

¹⁴Dai ma gaw mungdan hta matsan mayan hte shangai wa timung, shi nan matsan htawng hta na pru nhtawm, hkawhkam tai wa sai.

¹⁵Bai shi gaw, kaga wa a aya hta shang lu yang, jan a npu e hkrung mahkrung ni gaw shi kaw hkan bawp nga ai hpe, ngai mu nngai.

¹⁶Shi up ai masha amyu ni gaw hti n dang law nga ai: rai timung, shi hpang e pra ai ni, shi a lam kabu shara n nga ai. Gaja wa dai mung kaman lila hte, nbung shachyut ai amu hkrai rai nga ai.