Read Jinghpaw Hanson Version Bible HPAJI NINGLI 5 Bible Online

HPAJI NINGLI 5 - Jinghpaw Hanson Version Bible bible

HPAJI NINGLI 5

¹Karai Kasang a nta de shang yang, na a lagaw hpe hkang nga u: kaning rai nme law, madat mara na matu sit sa ai gaw, angawk ai ni a shagu hkungga hta grau kaja nga ai: shanhte gaw tinang galaw ai mara hpe n dum ma ai.

²Na a n-gup hpe shim nga u; Karai Kasang a man e ga tsun na, na a myit masin hkum lawan et; kaning rai nme law, Karai Kasang gaw sumsing lamu e rai nga ai, nang chyawm gaw ga ntsa e rai nga ndai; dai re ai majaw ga law law hkum tsun et.

³Myit ru myit yak law yang, yup mang mu nga ai; angawk ai wa a ga gaw nsen hkrai rai nga ai.

⁴Nang Karai Kasang hpe dagam hkrup ai rai yang, alawan rap raw u; shi gaw angawk ai ni hta awng nga lu ai n rai: nang dagam da ai hte maren, rap raw u.

⁵Dagam nna rap n raw ai hta, n dagam ai nga na, grau mai nga ai.

⁶Na n-gup gaw na hkum hpe hkum shut shangun et; ngai shut ni ai, nga nna lamu kasa a man e tsun na lam hkum shapraw et: Karai Kasang gaw na nsen hpe pawt sindawng nna, na a lata amu hpe hpa majaw jahten na rai ta?

⁷Yup mang law law mu ai mung, ga law law tsun ai mung, kaman lila rai nga ai: nang chyawm gaw Karai Kasang hpe hkrit hkungga nga u.

⁸Mungdaw hkan e matsan mayan ni hpe zingri zingrat nna, adip arip re ai ni gaw tara lam hte dinghpring ai hpe shanut kau ai nang mu hkrup yang, hkum mau et: kaning rai nme law, tsaw htum ai shara hte grau tsaw nga ai wa langai mi yu matsing nga ai rai nna, shanhte hta grau tsaw ai ni mung rai nga ma ai:

⁹Dai hta kaga, lamu ga na pru ai amyat gaw yawng a matu rai nga ai; hkawhkam wa pyi yi hkauna a akyu hkam la ra ai.

¹⁰gumhpraw marin ai wa gaw, gumhpraw hte myit dik lu ai n rai; sut su mayu ai wa gaw, sutgan jat timung, myit dik lu ai n rai: dai mung kaman lila rai nga ai.

¹¹Sutgan law wa yang, sha ai ni mung law wa ma ai: sutgan madu gaw, myi hte mada yu lu ai akyu hta kaga, hpa akyu lu nga a ta?

¹²Makan galaw ai wa gaw, kaji sha sha lu timung, law law sha lu timung, yup pyaw nga ai: sut su ai wa a sutgan chyawm gaw, shi hpe yup jaren shangun nga ai.

¹³Bai, jan a npu e yak la ai lam langai mi ngai mu se ai; dai gaw, sut su ai wa gaw, tinang akyu jahten na matu, sutgan mahkawng da ai lam, rai nga ai:

¹⁴Dai baw sutgan gaw, n shawp ai lam hta ginlut mat nga ai: shi shaprat ai shadang sha pyi, lata kaman rai nga ai.

¹⁵Shing rai sut su ai wa gaw, singgu krin shangai wa ai zawn, singgu krin bai nhtang wa na ra ai rai nna, shi shakut ai amu makan hta na hpa mung shi a lata hta lang wa lu na n rai:

¹⁶Shi gaw shangai wa sai hte maren, hpa n shai ai sha nhtang wa ai lam gaw, yak la ai lam langai mi rai nga ai: nbung hpe lu la hkra, shakut sharang ai gaw, hpa akyu nga a ta?

¹⁷Shi gaw prat tup nsin e shat sha ai hte, grai wa nji nmu, machyi makaw, kahtet kamawt hkrai, hkrum sha nga ai.

¹⁸Yu u, Karai Kasang gaw masha wa hpe jan a npu e jaw ya ai, amu bungli galaw na, hkrung nga ai nhtoi mahkra hta, lu let, sha let, shi a amu bungli majaw ngamu ngamai nga lu ai gaw, mai kaja ai hte htaphtuk ai lam rai nga ai, ngai mu matsing da nngai: dai gaw shi a kamhtaw rai nga ai.

¹⁹Karai Kasang karan jaw ai majaw, aja gumhpraw hte sutgan lu ai wa kadai mung, lu lu sha sha rai nna, tinang amu makan a ngamu ngamai ai hta kabu gara nga lu ai rai yang, dai gaw Karai Kasang a kumhpaw kumhpa rai nga ai.

²⁰Karai Kasang shi hpe kabu gara ai myit jaw ya ai majaw, shi gaw hkrung nga ai nhtoi ni hpe ai n dum nga ai.