Read Jinghpaw Hanson Version Bible HPAJI NINGLI 7 Bible Online

HPAJI NINGLI 7 - Jinghpaw Hanson Version Bible bible

HPAJI NINGLI 7

¹Mai kaja ai amying shingteng gaw, manam pyaw ai sau hta grau hpu nga ai: si nhtoi gaw, shangai wa ai nhtoi hta grau kaja nga ai.

²Poi galaw ai nta de sa na hta, mang taw ai nta de sa na grau mai nga ai: kaning rai nme law, dai gaw masha yawng a jahtum ai lam rai nga nna, naw hkrung nga ai ni nlang, myit dum na mara ai.

³Yawn hkyen ai gaw mani ai hta grau kaja nga ai; kaning rai nme law, yawn hkyen ai myi man majaw, myit masin gaw kaja wa nga ai.

⁴Hpaji rawng ai ni a myit masin gaw, mang taw ai nta hta rawng nga ai; angawk ai ni a myit masin chyawm gaw, pyaw daw kadaw ai ni a nta hta rai nga ai.

⁵Angawk ai wa a mahkawn mangoi ga madat na hta, hpaji rawng ai wa a daru sharin ai ga madat na, grau mai nga ai.

⁶Kaning rai nme law, angawk ai wa a mani ai gaw, dibu npu a ju hpun hkru kahpre ai hte bung nga ai: dai mung kaman lila rai nga ai.

⁷Gaja wa, lawhpa myit gaw hpaji rawng ai wa hpe mana shangun nga ai; sake manawn mung, chye chyang ai myit hpe jahten kau lu ai.

⁸Amu a jahtum gaw, galaw hpang ai hta, grau kaja nga ai: hkam sharang ai myit gaw, gumrawng ai myit hta grau kaja nga ai.

⁹Pawt sindawng hkra myit hkum gadun et; kaning rai nme law, pawt sindawng ai gaw angawk ai wa a kraw hta e de nga ai.

¹⁰Shawng na prat gaw, ya na prat hta hpa majaw grau kaja a ta? nga nna hkum san et; shing rai san ai gaw, hpaji hku hte san ai n rai.

¹¹Hpaji byeng-ya gaw sali wunli zawn kaja nga nna, jan mu lu ai ni a matu, hpu htum nga ai.

¹²Kaning rai nme law, gumhpraw gaw makawp maga chye ai hte maren, hpaji byeng-ya mung makawp maga chye nga ai; rai timung, chye chyang ai gaw kaning rai hpu a ta, nga yang, dai hpe lu ai wa gaw, hpaji byeng-ya hte tinang a asak bau sin chye nga ai.

¹³Karai Kasang a magam amu hpe sumru yu nga u: shi hpan tawn da ai magaw chyalu hpe, kadai wa malan lu na rai ta?

¹⁴Ngamu ngamai ai aten e kabu gara nga mu; matsan mayan hkrum ai aten e sumru yu nga u; gaja wa, shinggyim masha gaw, tinang a hpang e hpa byin na ra ai hpe, n chye sawn lu hkra, Karai Kasang gaw dai lam lahkawng hpe kapyawn tawn da wu ai.

¹⁵Ngai kaman nga ai aten e, ndai lam yawng mayawng hpe ngai mu da se ai: dinghpring ai wa gaw, tinang a dinghpring ai hta htum wa ai hpe mung, tara n lang ai wa gaw tinang a tara n lang ai hta, asak galu nga ai hpe mung, ngai mu ni ai.

¹⁶Ladu lai hkra hkum dinghpring dum et; ladu lai hkra hpaji hkum rawng dum et: hpa majaw tinang hkum a akyu hpe jahten mayu n ta?

¹⁷Ladu lai hkra hkum n hkru nga et, dai hta kaga, hkum angawk et: aten garai n du yang hpa majaw si mayu n ta?

¹⁸Ndai ga hpe hta la na mai nga ai; dai hpe hkum tat kau et; Karai Kasang hpe hkrit kamyin ai wa gaw, dai lam yawng hta awng wa na ra ai.

¹⁹Hpaji rawng ai wa gaw, hpaji a majaw, mare e nga ai hpyen share shi hta n-gun grau rawng nga ai.

²⁰Gaja wa, ga ntsa e, dinghpring ai hte kaja ai amu galaw timung, n chye shut ai wa langai mi n nga ai.

²¹Masha ni tsun matsun hpe hkum matsing et; matsing yang, na mayam wa nang hpe dagam ai ga nang na na rin dai;

²²Kaning rai nme law, nang hkum nan masha kaga hpe dagam kau ai lam, na kraw e law law lang myit dum nga ai.

²³Ngai gaw dai lam yawng mayawng hpe hpaji hte dinglik yu se ai; ngai gaw, Ngai hpaji hparat hkum n ga, ngu timung, dai gaw ngai hte tsan nga ai.

²⁴Tsan tsan re ai hte, sung htum ai lam hpe, kadai sawk yu lu a ta?

²⁵Hpaji byeng-ya hte nga yawng nga pra a npawt nhpang mung, tara n lang ai lam gaw angawk ai lam, myit n su ai lam gaw mana bu ai lam, rai nga ai hpe, chye na lu hkra, ngai gaw lam shagu sagawn yu nna, nye a myit masin gaw dai hpe chye na lu na sawk yu nga ai.

²⁶Shing rai, mahkam hte sumgawn rai nna, shi a lata yan sumri hte bung ai numsha a myit masin gaw, si hkrung si htan hta grau yak la ai hpe, ngai mu hkrup nngai: Karai Kasang myi man shapa ai wa gaw, dai num a lata na lawt lu na ra ai; yubak kap ai wa chyawm gaw gyit hkang ai hkrum na ra ai.

²⁷Yu mu, Tara Hkaw Sara gaw, Dai lam ngai mu hkrup nngai, nga nna tsun ai: ngai sawk yu nna garai n mu lu ai lam ni mu lu na matu,

²⁸langai hte langai gumhpawn nna sagawn yu yang, la hkying mi hta la ngu mai ai wa langai mi sha ngai mu hkrup nngai; num hkying mi hta chyawm gaw, num ngu mai ai langai mi pyi n mu hkrup nngai.

²⁹Yu mu, dai lam langai sha ngai mu hkrup nngai: Karai Kasang gaw masha hpe dinghpring ai hku hpan da timung, shanhte gaw myit magaw ai hku amyu myu tam ma ai.