Read Jinghpaw Hanson Version Bible HPAJI NINGLI 8 Bible Online

HPAJI NINGLI 8 - Jinghpaw Hanson Version Bible bible

HPAJI NINGLI 8

¹Hpaji byeng-ya rawng ai wa kadai rai ta? Sumtu ga lachyum kadai chye shapraw a ta? Hpaji byeng-ya gaw, masha a myi man jahtoi ya nga ai; shi myi man a ahpraw nsam galai mat nga ai.

²Karai Kasang man e dagam ai ga hpe tau yu nna, hkawhkam a hkang da ai ga hpe hkan u.

³Shi kaw na alawan hkum pru mat wa u; gumlau gumle lam hkum hkan et; shi galaw mayu ai hte maren galaw na ra ai.

⁴Hkawhkam a ga gaw hpung shingkang rawng nga ai: Nang hpa galaw n ta? Ngu nna kadai tsun lu a ta?

⁵Hkang da ai ga hkan ai wa gaw, mara kap na n rai? Hpaji rawng ai wa a myit masin gaw ahkying ladaw hte tara dawdan ai lam chye ginhka nga ai:

⁶Kaning rai nme law, masha wa gaw shoihpa shoirang grai wa hkrum nga ai majaw, shi maw mawn ai lam a matu, ahkying ladaw hte galaw na ginshan hku nga ai:

⁷Htawm hpang e hpa byin na shi n chye ai; kaning rai na kun, shi hpe kadai tsun lu a ta?

⁸Kadai mung wenyi ntsa e up nna, jahkring da lu ai, n rai; si nhtoi hpe mung, kadai up lu ai, n rai: ndai hpyen majan hta lawt lu na lam n nga ai: tara n lang ai amu gaw, galaw ai wa hpe hkrang la lu ai, n rai.

⁹Ndai yawng mayawng hpe ngai mu mada nna, nye a myit masin gaw, magam bungli shagu hpe sumru yu nga ai: masha gaw manang wa hpe hkying ladaw mi sha adip arip lu na ahkang nga ai.

¹⁰Shing rai, tara n lang ai wa gaw, makoi mayang hkrum nna, masha ni shi a lup de sa de ma ai; tengman ai amu galaw ai ni hpe chyawm gaw, chyoi pra ai shara de na pru ngut jang, mare hta e malap mali di kau hkrum ma ai, ngai mu nngai: dai mung kaman lila rai nga ai.

¹¹N tara ai amu gaw, alawan dawdan n hkrum ai majaw, mung masha ni a myit masin gaw, n hkru ai amu galaw na hpe, grau nna shaja nga ma ai.

¹²Yubak galaw ai wa gaw, n hkru ai amu latsa lang galaw nna, shi a asak galu timung, Karai Kasang a man e hkrit kamyin nga ai ni mahtang, mai kaja ai hkrum na mara ai hpe, gaja wa ngai chye nngai:

¹³Tara n lang ai wa chyawm gaw, Karai Kasang hpe n hkrit kamyin ai majaw, mai kaja ai kata nga ai: shingnip hte bung ai, shi asak a nhtoi ni mung, galu kaba wa lu na, n rai.

¹⁴Bai, dinghta ga ntsa e kaman lila lam langai mi byin pru nga ai; dinghpring ai ni nkau mi gaw, tara n lang ai amu galaw ai ni zawn ari ahpri hkrum ma ai; tara n lang ai ni nkau mi gaw, dinghpring ai amu galaw ai ni zawn, mai kaja ai hkrum ma ai; ngai gaw, Dai mung kaman lila rai nga ai, tsun nngai.

¹⁵Shaloi ngai gaw pyaw daw lam shakawn nga nngai: kaning rai nme law, lusha na hte pyaw pyaw nga ai hta kaga, shinggyim masha gaw jan a npu e grau kaja ai lam n chye nga ai: dai gaw, jan a npu e, shi hkrung nga ai prat tup matu, Karai Kasang shi hpe jaw da ai amu bungli agrin nga ai akyu rai nga ai.

¹⁶Shing rai, hpaji hparat hpa rai nga ai hte, ga ntsa e shakut sharang ai majaw, masha law law wa shani shana n yup lu ai hpe, ngai myit sumru yu yang,

¹⁷jan a npu e Karai Kasang a magam bungli byin mabyin hpe shinggyim masha n dang chye lu ai gaw, ngai chye na nngai: dai hpe chye na lu hkra, shi gade shakut shaja timung, dang chye lu ai n rai: hpaji rawng ai wa gaw, dai hpe ngai chye lu na we ai, myit nga timung, dang myit hkawn lu ai n rai.