Read Jinghpaw Hanson Version Bible HPAJI NINGLI 9 Bible Online

HPAJI NINGLI 9 - Jinghpaw Hanson Version Bible bible

HPAJI NINGLI 9

¹Dai lam yawng mayawng hpe sumru dinglik yu na matu, ngai myit da ting nga nngai: dinghpring ai wa hte hpaji rawng ai wa, shan a magam bungli hte hpawn, Karai Kasang a lata hta rawng nga ma ai: sumtsaw sumra hkrum na mung, n dawng n yawt hkrum na mung, shinggyim masha n chye lu ai: yawng mayawng gaw shanhte a matu san da nga sai.

²Yawng mayawng a matu lam shagu maren byin nga ai: dinghpring ai wa hte tara n lang ai wa, kaja ai hte n kaja ai wa, san seng ai hte n san n seng ai wa, shagu hkungga nawng ya ai wa hte n nawng ya ai wa a matu, lam langai sha byin nga ai: kaja ai wa hte yubak kap ai wa, matsa mawa ga tsun ai wa hte, matsa mawa hkrit ai wa gaw, maren rai nga ma ai.

³Shing rai, yawng hte gaw maren hkrum nga ma ai majaw, dai gaw jan a npu e byin ai amu mahkra hta, n hkru ai lam rai nga ai: gaja wa, shinggyim masha ni gaw naw hkrung nga ai laman e n hkru nna angawk ai hte hpring nga ma ai: dai hpang shanhte gaw jat na ga e de nga ma ai.

⁴Kaning rai nme law, hkrung nga ai ni hte naw matut nga yang, myit mada shara naw nga ai: hkrung nga ai gwi gaw, si mat ai hkanghkyi hta grau hpu nga ai.

⁵Hkrung nga ai ni gaw, tinang si na hpe chye nga ma ai: si mat ai ni chyawm gaw hpa n chye ma ai hte, hpa shabrai mung, n hkam la lu manu ai: kadai mung shanhte hpe n dum ma ai.

⁶Shanhte a sumtsaw sumra, n dawng n yawt ai hte manawn masham gaw, moi kaw nna hkoi mat sai; jan a npu e galaw ai amu mahkra hta, shanhte ya kaw nna hpa n lawm lu ma ai.

⁷Pru wa su; Karai Kasang gaw na a amu hkap la ngut sai majaw, kabu gara ai hte shat sha u, ngwipyaw ai hte na a tsabyi jahku lu u.

⁸Na a hpun palawng tutnawng hpraw nga u ga; na a baw sau n kadawn nga u ga.

⁹Jan a npu e Karai Kasang nang hpe jaw da ai kaman lila prat a nhtoi ni hta e, nang tsawra ai madu jan hte rau, na a prat htum hkra ngwipyaw ai hte nga sha nga u: da ndai gaw, nang hkrung nga ai laman e, jan a npu e nang galaw ai amu a kamhtaw rai nga ai.

¹⁰Nang galaw ang ai amu, hpa rai timung, tsam mari galaw u; kaning rai nme law, nang yu wa na ra ai katsan ga hta e, amu bungli, maw mawn ai, chye chyang ai hte hpaji hparat hpa mung n nga ai.

¹¹Bai, jan a npu e mada yu yang, gat lawan chye ai majaw sha, gat shingjawng dang ai, n rai; n-gun ja ai majaw sha, hpyen majan dang lu ai n rai; hpaji byeng-ya majaw sha, shahpa lu ai, n rai; chye chyang ai majaw sha, sutgan lu ai, n rai; maka kumla pru ai majaw sha, myi man pa na, n rai: aten ladaw hte, ang wa ai hte maren, shanhte mahkra a matu byin ang wa ai hpe, ngai mu nngai.

¹²Kaning rai nme law, shinggyim masha gaw shi a aten ladaw n chye nga ai: anga ni gaw n hkru ai byek hta chyat nga ai hte, u ni gaw mahkam hta shang ai zawn, shinggyim masha ni gaw, byin ang ai n hkru ai aten hta, ndum shami e shang nna lu nga ma ai.

¹³Bai, jan a npu e ning re ai hpaji byeng-ya lam ngai mu nna, dai gaw nye a man e galu kaba rai sam ai:

¹⁴Masha n law ai mare kaji langai mi nga ai; hkawhkam kaba langai mi dai hpe sa wang tawn nna, grup yin e kaduk kaba htu da wu ai;

¹⁵Ya dai mare hta e matsan mayan timung hpaji rawng ai wa langai mi nga nna, shi gaw shi a hpaji hte dai mare hpe hkye la lu timung, dai matsan mayan wa hpe kadai mung n dum ma ai.

¹⁶Shaloi ngai gaw ‘Hpaji byeng-ya gaw n-gun atsam hte grau kaja nga timung, matsan mayan wa a hpaji byeng-ya gaw jahpoi asawng ai hkrum nna, shi a ga hpe madat ma ai, n rai,’ nga nna tsun nngai.

¹⁷Angawk ai ni hpe up ai wa a jahtau marawn ai ga hpe madat na hta, hpaji byeng-ya rawng ai ni a ga hpe asim sha madat na gaw, grau kaja nga ai.

¹⁸Hpaji byeng-ya gaw ri nhtu hte grau kaja nga ai: yubak kap ai wa langai mi mahtang mai kaja ai law law hpe jahten lu ai.