Read Jinghpaw Hanson Version Bible SHAWLUMON A MAHKAWN GA 1 Bible Online

SHAWLUMON A MAHKAWN GA 1 - Jinghpaw Hanson Version Bible bible

SHAWLUMON A MAHKAWN GA 1

¹Mahkawn mangoi ga mahkra hta, grau htum ai Shawlumon a mahkawn mangoi ga.

²Shi gaw, shi pup ai hte ngai hpe pup ya u ga; Na a sumtsaw sumra gaw, tsabyi jahku hta grau kaja nga ai.

³Na namman gaw, manam pyaw ai sau rai nga ai; Na amying shingteng gaw ru bun ai sau rai nga ai: Dai rai nna hkawnsek ni nang hpe tsawra ma ai.

⁴Ngai hpe dun la e; nang hpang de anhte hprawng na ga ai: Hkawhkam wa gaw, shi yup gawk de ngai hpe jashawn timung, Na a majaw anhte kabu gara nna pyaw wa na ga ai; Na a sumtsaw sumra hpe tsabyi jahku hta grau shakawn na ga ai: gaja wa teng teng shanhte nang hpe tsawra nga ma ai.

⁵Yerusalem a shayi sha ni e, Ngai gaw, Kedera sum ni zawn, ahpraw chyang timung, Shawlumon a nba grang ni zawn, naw tsawm nga nngai.

⁶Ngai gaw jan katen nna, ahpraw chyang nngai majaw, Ngai hpe hkum yu dingrawng mi: Nye nu a shadang sha ni gaw ngai hpe n dawng nna, Tsabyi sun ni hpe lajang shangun ma ai: Nye tsabyi sun chyawm gaw, ngai n lajang lu nngai.

⁷Nye myit masin tsawra ai, nja wa e, Na sagu ni hpe nang kanang rem ai hpe mung, ani chyingtung e, kanang hpum shangun ai hpe mung, tsun dan e. Ngai hpa majaw, na manang ni a sagu hpung ni makau e, Myi man magap ai num zawn, tam pru na rai ta?

⁸Numsha ni hta grau tsawm ai na e, nang n chye yang, Sagu hpung ni a lagaw hkang hkan sa nna, Sagu rem ai ni a sum ni makau e, na bainam kasha ni hpe rem nga u.

⁹Nye a nja jan e, Hpara-u a leng gumra hte Ngai nang hpe shadawn yu de ga.

¹⁰Na a shabyi ni lakan hte mawn nna, Na a du gaw lungseng gali nga ai.

¹¹Anhte gaw, aja lakan hte gumhpraw gawp ni Na a matu naw galaw ya na ga ai.

¹²Hkawhkam wa gaw shi a sha ku makau e naw dung nga yang, Ngai lang ai nardu sau manam mawng nga li ai.

¹³Ngai tsawra ai wa mahtang, nye sinda lapran e tsat ai Mura nhtan hte bung nga ai.

¹⁴Bai, ngai tsawra ai wa gaw, Engedi tsabyi sun e tu ai, Pan tsun nhpawng hte bung nga ai.

¹⁵Yu u, nye nja jan e, nang hpraw tsawm nga ndai; Gaja wa, tsawm htap nga ndai: Na a myi gaw hkrudu myi hte bung nga ai.

¹⁶Yu u, ngai tsawra ai wa e, nang mahtang Tsawm htap nna, tsawra mai nga ndai;

¹⁷An a yup ku mung, tsit lali ai shara rai nga ai: An a nta ngau gum ni arit hpun, Lapa ni gaw, marau hpun, rai nga ai.