Read Jinghpaw Hanson Version Bible ESAIA 22 Bible Online

ESAIA 22 - Jinghpaw Hanson Version Bible bible

ESAIA 22

¹Shingran kadit hta ang ai myihtoi ga: Na a mare ting gaw hpa lam majaw nta ni a ntsa e lung dè ma ta?

²Jahtau marawn ai hte hpring nna, kaming kamawng let ngwipyaw dum ai mare e, nang hta hkala nba hkrum ai ni gaw, ri nhtu hte hkala nba hkrum ai n rai; na a si mang ni gaw, hpyen majan hta si ma ai n rai.

³Na a agyi ni yawng, rau hprawng mat ma ai; ndan gap ai ni shanhte hpe gyit la mu ai; mu hkrup ai, na a masha ni nlang hte gaw, tsan tsan hprawng timung, gyit hkang da ai rai hkrum ma ai.

⁴Dai re ai majaw, “Ngai hpe hkum yu et; ngai ja ja hkrap na nngai; nye amyu a shayi sha hten byak hkrum nga yang me, ngai hpe shalan shabran na hkum tin myit,” nga nna ngai tsun nngai.

⁵Kaning rai nme law, Zaw nawng zaw wa up ai Madu Yehowa a majaw, dai shani gaw, Shingran kadit hta e, kaming kamawng, kabye kau da nna, shoihpa shoirang hkrum ai hte, mare bunghku ni hpe run kau nna, bum ni hpe jahtat ai shani, rai na ra ai.

⁶Elam amyu gaw pala ndum hte hpawn, hpyen leng ni hte gumra jawn ai ni hpe shangun nna, Kira amyu gaw n-gang shapraw dan wu ai.

⁷Shing rai, na a pyaw htum ai kadit ni hta hpyen leng hte hpring chyat nga nna, gumra jawn ai ni gaw, mare chyinghka lam e dap jung nga ma ai.

⁸Shi gaw Yuda magap hpe gun kau nna, nang gaw dai shani e nam mali nta e rawng ai ri nhtu ni hpe mada yu ndai.

⁹Dawi a mare bunghku ni run waw ai shara law nga ai hpe nanhte matsing nga nna, lawu na hka lawng hta hka sha-ing da mu ai.

¹⁰Nanhte gaw Yerusalem mare na nta ni hpe hti matsing nna, bunghku hpe shangang na matu nta ni hpe run kau mu ai.

¹¹Hka lawng dingsa na hka hpe shalen na matu, bunghku lahkawng a lapran e nanhte hka lawng ningnan galaw myit dai: rai timung, dai lam shabyin ai wa hpe nanhte n dum nna, moi chyaloi nhkoi kaw nna dai lam hpajang da ai wa hpe, n gawn n sawn di kau mu ai.

¹²Dai shani e Zaw nawng zaw wa up ai Madu Yehowa gaw, hkrap ngu hkrap ngoi ai, sharung shayawt ai, kara doi ai hte lachyit nba lawai na lam htet da timung,

¹³yu mu, shanhte gaw, pyaw pyaw ngawn ngawn, kabu gara nga let, “Sha ga, lu ga, hpawt ni she si na ga ai,” nga nna sagu dumsu sat ai hte shan sha, tsabyi jahku lu rai ma hka.

¹⁴Shing rai, Zaw nawng zaw wa up ai Yehowa gaw, Gaja wa, nanhte si ai nhtoi du hkra, ndai yubak tsai mat na n rai, nga nna nye a na hta madun dan ai: dai gaw Zaw nawng zaw wa up ai Madu Yehowa tsun ai ga rai nga ai.

¹⁵Bai Zaw nawng zaw wa up ai Yehowa gaw, Hkawhkam a nta ntsa e up ai, ndai kunhting wa Shebna hpang de sa nna,

¹⁶“Nang gaw nang e hpa galaw n ta? nang e, lup tawk da na lam, nang hpe kadai ahkang jaw a ta? ataw, tsaw ai shara e lupwa, tinang moi mang a matu, lunghkrung hta shanu shara, tawk da a hka!

¹⁷Yu u, Yehowa gaw, n-gun ja ai wa zawn, nang hpe gumpye kau na ra ai; gaja wa, nang hpe magra la nhtawm,

¹⁸gumdin tarin nna dam lada ai mung de kabai kau na ra ai: na madu a nta ntsa e kaya kahpa shapraw ai wa e, dai mung hta nang si na ndai; dai yang e na a arawng sadang leng ni chyai na ra ai.

¹⁹Ngai nang hpe aya jahkrat kau na de ai; nang gum-yu yu mat na rin dai.

²⁰Dai shani e, ngai gaw nye a mayam Hilkia a kasha Eliakim hpe shaga nna,

²¹na a palawng galu shi hpe jahpun kau na we ai; nang kyit ai shingkyit ngai shi hpe shakyit nna, nang up ai ahkang shi a lata hta ap ya na we ai: shi gaw Yerusalem masha ni hte Yuda mung a kawa tai na ra ai.

²²Dawi dap nta a sumsaw hpe ngai shi a lahpa ntsa e mara da nna, shi gaw, kadai n la da lu hkra hpaw da na ra ai, kadai n hpaw lu hkra la da na ra ai.

²³Grin nga ai shara hta ngai shi hpe hpri maina zawn dit da nna, shi gaw kawa nta dap ni a matu arawng sadang tingnyang tai na ra ai.

²⁴Shanhte gaw kawa nta a arawng sadang hte, aru arat, matu mara hte hpawn, n-gawt hte ndum du hkra, arung arai kaji kaba yawng, shi hta noi da na mara ai.

²⁵Zaw nawng zaw wa up ai Yehowa chyawm gaw, “Grin nga ai shara hta dit da ai hpri maina gaw, dai shani e malaw mat nna, agrawp kau hkrum ai hte hkrat mat na ra ai; shi hta noi da ai lit gaw, gun kau ai hkrum na ra ai,” nga ai: kaning rai nme law, ndai lam Yehowa tsun da sai.