Read Jinghpaw Hanson Version Bible ESAIA 3 Bible Online

ESAIA 3 - Jinghpaw Hanson Version Bible bible

ESAIA 3

¹Kaning rai nme law, yu mu, Zaw nawng zaw wa up ai Madu Yehowa gaw, Yerusalem mare hte Yuda mung na, myit manoi shara hte shamyet shanat shara hpe dawm kau na ra ai: lusha jarit yawng hpe mung, hka lu yawng hpe mung,

²n-gun atsam rawng ai wa, hpyen majan chye ai wa, tara agyi wa, myihtoi wa, nwawt wa, salang wa;

³hpyen manga shi up ai du, arawng lu ai wa, hpaji daw chye ai wa, hpaji maka pru ai wa, mandan chye bau ai ni yawng hpe, jahtum kau na ra ai.

⁴Shanhte a ntsa e ma kaji ni hpe ngai du shatai nna, shanhte gaw chyu chyu ai ma a myit hte, shanhte a ntsa e up na mara ai.

⁵Mung masha ni langai hte langai, htingbu ni langai hte langai shada da adip arip na mara ai: ma kaji gaw dingla wa hpe, hpa n hkaw ai wa gaw, arawng lu ai wa hpe, gumrawng gumtawng di na ra ai.

⁶Masha langai mi gaw kawa a nta hta shi a kanau wa hpe dun la let, “Nang gaw hpun palawng naw lu ndai; nang anhte a du tai nna, ndai hten rum ai hpe na a lata hte sharai u ga,” nga nna tsun yang, kanau wa gaw,

⁷Ngai nan sharai lu nngai n rai; nye a nta hta muk mung, hpun palawng mung, n nga ai: mung masha ni a du ngai hpe hkum shatai myit, nga nna dai shani e dan dan tsun na ra ai.

⁸Kaning rai nme law, Yehowa a hpung rawng ai myi hpe kamau shangun na matu, shanhte a tsun ai ga hte arawn alai shi hte nhtan shai nga ai majaw, Yerusalem mare gaw hten run mat sai; Yuda mung gaw kadawng mat sai.

⁹Shanhte a myi man nsam, shanhte a lam sakse hkam nga ai; shanhte gaw tinang a yubak hpe Sodom masha ni zawn dan dan galaw nna, makoi magap ma ai n rai; shanhte gaw tinang hkum hpe shaza kau ma ai majaw, tinang a myit masin dingnye hkrum mu ga.

¹⁰Dinghpring ai wa gaw, shi shapraw ai si sha lu ai majaw, shi hta a nga ai, ngu nna tsun mu.

¹¹Tara n lang ai wa gaw, dingnye hkrum u ga; shi lata galaw ai amu, shi nan hkrum sha ai majaw, shi hta yak la nga ai.

¹²Nye a amyu masha ni hpe chyawm gaw, ma kaji ni shanhte hpe adip arip di nna, num ni shanhte a ntsa e up ma ai. Nye a amyu e, nanhte hpe lam madun ai ni, nanhte hpe lam shadam nna, nanhte sa wa ai lam hpe, jahten kau ma ai.

¹³Yehowa gaw mung masha ni hpe dawdan na matu, rawt tsap nga ai.

¹⁴Yehowa gaw shi amyu a du salang ni hte dawdan hkat nga ai; dai tsabyi sun sha kau ai ni, nanhte nan rai nga myit dai: matsan mayan ni kaw na kashun la ai rai ni hpe, nanhte a nta ni hta mahkawng da manu ai:

¹⁵nye a amyu masha ni hpe adip arip di kau nna, matsan mayan ni hpe myi man jasum ai gaw, hpa majaw rai ta? nga nna Zaw nawng zaw wa up ai, Madu Yehowa tsun nga ai.

¹⁶Bai Yehowa gaw, Ziun shayi sha ni myit kaba ai hte, tinang du shadap let myi le le rai nawt hkawm nna, tinang lagaw lahkawn sharat ma ai majaw,

¹⁷Madu gaw, Ziun shayi sha ni a baw pungding hpe hpye shakan kau ya ai hte, Yehowa gaw shanhte a hpun palawng sharun kau ya nna, kaya jahkrum na mu ai.

¹⁸Dai shani e Madu gaw, shanhte a tsawm ai lagaw lahkawn ni, htanbam awa ni, gumrit ni,

¹⁹lakan ni, lahkawn ni, myi man magap ni,

²⁰baw chyawp ni, hkarutum saidawng ni, shingkyit ni, lawban yep ni, lakhpoi ni,

²¹lachyawp ni, ladi shanghkawng ni,

²²nhpau lawng ni, hpajawng ni, baw htinggrum ni, tingsan ni,

²³jam na ni, kata palawng ni, bunghkaw ni hte myi man awa ni hpe, htawm kau na ra ai.

²⁴Dai shaloi e manam pyaw ai baw a malai yat manam ai, shingkyit a malai sumri, kara hkri ai a malai baw hpye kan ai, lawai ai nba a malai lachyit sumding, tsawm htap ai a malai wan hkru ai hkang pru na ra ai.

²⁵Na a lasha ni ri nhtu hte, na a share ninghkrin ni, hpyen majan hta, si mat na mara ai.

²⁶Shi a chyinghka ni gaw hkrap ngu hkrap ngoi let sharung shayawt na mara ai: shi gaw shingran katsi ai shara e ga hta dung nga na ra ai.