Read Jinghpaw Hanson Version Bible ESAIA 6 Bible Online

ESAIA 6 - Jinghpaw Hanson Version Bible bible

ESAIA 6

¹Hkawhkam Uzia si ai shaning hta, Madu gaw, galu kaba nna tsaw htum ai tingnyang hta dung nga ai hpe ngai mu nngai; shi lawai ai hpun nba gaw nawku Htingnu ting hpring nga ai.

²Shi a ntsa e Serahpim tsap nga ma ai: langai hte langai singkaw kru kru tu ma ai; singkaw lahkawng hte tinang myi man magap; lahkawng hte tinang lagaw magap; lahkawng hte pyen ma ai.

³Langai wa mi langai wa hpe, “Zaw nawng zaw wa up ai Yehowa gaw, chyoi pra, chyoi pra, chyoi pra, rai nga ai; ginding aga ting shi a hpung shingkang hte hpring nga ai law,” nga nna tsun jahtau ma ai.

⁴Shing nga tsun jahtau ai wa a nsen majaw, chyinghka hkinbawng ni ashun awam nga nna, nta ting wan hkut hte hpring nga ai.

⁵Dai rai nna ngai gaw, “Ngai wa dingnye lu nngai; ngai htum mat ni ai; ngai nan n san n seng ai n-gup tu ninglen, n san n seng ai n-gup tu ai amyu ka-ang e dè nga timung, Zaw nawng zaw wa up ai Yehowa ngu ai, Hkawhkam wa hpe, nye myi hte nan mu lu se hka,” nga nna tsun nngai.

⁶Shaloi Serahpim langai mi gaw, tawn hkungri ntsa na, lakap hte matep la ai wan n-ga, shi a lata hta lang let, ngai hpang de pyen sa nhtawm, dai hte nye a n-gup ahtawk let, “Yu u, dai gaw na a nten hpe hkra sai; na a mara hpe yeng seng kau sai; na a yubak hpe mung raw dat kau nu ai,” nga ai.

⁸Bai ngai gaw, “Ngai kadai hpe shangun dat na i? anhte a matu kadai wa sa na i?” nga nna Madu san ai nsen hpe na nngai. Dai rai nna ngai gaw, “Ngai nga nga nngai, ngai hpe shangun dat e,” ngu nna htan we ai.

⁹Shi gaw, Ndai amyu hpang de sa nhtawm, “Nanhte na ninglen n chye na lu na mu ai; mu ninglen n mu lu na mu ai,” ngu nna tsun mu.

¹⁰Shanhte gaw, tinang myi hte n mu lu na hte, na hte n na lu nna, myit hte n chye na lu mu ga she, myit n kayin nna, shamai shatsai ai n hkrum lu hkra, shanhte a myit masin hpe shamak kau ya nna, shanhte a na hpe lahpang kau ya ai hte, shanhte a myi hpe pat kau ya mu, nga ai.

¹¹Shaloi ngai gaw, “Madu e, gade wa na na rai ta?” ngu nna san we yang, shi gaw, “Mare ni hte nta ni hta masha n nga hkra shaza kau ai hkrum ai hte, mungdan ting atsai awai katsi katsang rai nga nna,

¹²Yehowa gaw mung masha ni hpe sumtsan mung de jahtawt kau nna, shingran katsi ai shara ni dai mungdan ka-ang e law wa ai du hkra, na na ra ai.

¹³Dai mungdan hta htamshi na htammi naw ngam nga timung, dai pyi shaza kau ai hkrum na ra ai: rai timung, magyeng hpun hte wamyi hpun hpe kran kau nna, hpun du naw tu nga ai zawn, dai hpun du hta chyoi pra ai aru arat naw prut na ra ai.”