Read Jinghpaw Hanson Version Bible ESAIA 7 Bible Online

ESAIA 7 - Jinghpaw Hanson Version Bible bible

ESAIA 7

¹Yuda hkawhkam, Uzia a kashu, Yohtam a kasha Ahaza a lakhtak e, Suri hkawhkam Rezin hte, Israela hkawhkam Remalia kasha Peka gaw, Yerusalem hpe lung gasat timung, dai hpe dang kau lu mu ai n rai.

²Shing rai, Suri mung gaw Ehprim mung hte matut nga ai, ngu nna Dawi dap na wa hpe tsun shana mu yang, nam maling na hpun lap gaw nbung e shamu shamawt ai zawn, shi a myit masin hte mung masha ni a myit masin gari nga malu ai.

³Shaloi Yehowa gaw Esaia hpe, “Nang hte rau na nsha Sheara-yashub pru mu; hpun nba jaw ai wa a ga dachyawk lam a lahta singgat baw e Ahaza hpe tau la nhtawm,

⁴Sadi let, asim sha nga u; wan hkut sha mawng ai, ndai wanhtaw daw lahkawng ngu ai, Suri mung na Rezin hte Remalia kasha pawt sindawng bu ai a majaw, hkum hkrit et, gawng hkum run et.

⁵Suri mung, Ehprim mung hte Remalia kasha, na a lam n hkru ai hpaji daw nna,

⁶Anhte gaw Yuda mung hpe lung shatsang ga; dai hpe shang gasat la nna, Tabela kasha hpe de a hkawhkam shatai ga, nga nna tsun timung,

⁷Madu Yehowa gaw, Dai lam grin lu na n rai, gaja wa byin lu na n rai;

⁸kaning rai nme law, Suri mung a baw Damasku, mare, Damasku mare a baw Rezin;

⁹Ehprim mung a baw Samari mare, Samari mare a baw Remali kasha rai nga timung, Ehprim mung hta amyu n tai hkra, kru shi manga ning laman e agrawp kau ai hkrum na ra ai. Nanhte n kam myit yang gaw, gaja wa grin lu na n rai,” nga nna tsun ai.

¹⁰Dai hta kaga Yehowa gaw Ahaza hpe,

¹¹“Na a Karai Kasang Yehowa kaw lamik kumla hpyi u; sung ai shara e rai timung, matsaw lahta tang e rai timung, hpyi u,” ngu wu ai.

¹²Ahaza chyawm gaw, “Ngai n hpyi na nngai; Yehowa hpe n chyam yu na nngai,” nga ai.

¹³Shaloi shi gaw, “Dawi a dap ni e, madat mu: nanhte gaw masha hpe n kaw n law di na, hpa n nawn ai hta n-ga, nye a Karai Kasang hpe mung, n kaw n law di na myit ni?

¹⁴Dai re ai majaw Madu shi nan nanhte hpe lamik kumla madun dan na ra ai: yu mu, shayi hkawnsek gaw gawng li nga nna, shadang sha shangai na ra ai; shi a amying hpe, Emanuela shamying ya na ru ai.

¹⁵Shi gaw n kaja ai hpe chye gang kau nna, kaja ai hpe chye lata la jang, htawbat hte lagat jahku sha lu na ra ai:

¹⁶kaning rai nme law, dai ma gaw n kaja ai hpe gang kau na, kaja ai hpe lata la na, garai n chye ai laman e, nang hkrit gari ai hkawhkam yan a mungdan gaw, gram mat na ra ai.

¹⁷Ehprim amyu gaw Yuda amyu hte hka wa ai shani kaw nna, ya du hkra n byin yu ai shani nhtoi ni, Yehowa gaw na a ntsa e mung, na a amyu baw a ntsa e mung, na nwa a nta ntsa e mung, shapraw na ra ai: dai gaw Asuri hkawhkam nan rai nga ai.

¹⁸Dai shani e Yehowa gaw, Egutu hka gai ni htum ai maga de nga ai jinu hte, Asuri mung e nga ai lagat hpe lahpyaw shaga ai majaw,

¹⁹shanhte nlang sa du nna, mahkra gaw shingran katsi ai kadit ni hta mung, lungbra shara ni hta mung, ju hpun nhpan ni yawng hta mung, udat shara ni yawng hta mung, shanu nga na mara ai.

²⁰Dai shani e, hka kaba wora hkran e nga ai, Asuri hkawhkam ngu ai, shap la ai kara nhkyi hte; Madu gaw baw kara hte lagaw mun hpe shangun kau nna, n-gup mun hpe pyi shakrin kau na ra ai.

²¹Dai shani e masha wa gaw, dumsu langai mi hte sagu yi lahkawng rem da yang,

²²shi nga chyu nhpaw n-ya lu la ai majaw htawbat sha lu na ra ai: kaning rai nme law, dai mung hta ngam nga ai ni nlang hte gaw, htawbat hte lagat jahku sha lu na mara ai.

²³Dai shani e, gumhpraw lap hkying mi ging ai, tsabyi ru hkying mi tu ai sun shagu hta e, ju hpun hte tsing hkrai tu na ra ai.

²⁴Mungdan ting hta ju hpun hte tsing hkrai ka-up nga ai majaw, ndan hte pala lang let, dai de sa na mara ai.

²⁵Shanghkawp hte chye kapun ai hkai bang mahkra hta, ju hpun hte tsing hkrai tu ai majaw, kadai n shang lu nna, dai yang dumsu ni a udat shara, sagu ni a kabye shara, tai na ra ai,” nga nna tsun ai.