Read Jinghpaw Hanson Version Bible ESAIA 8 Bible Online

ESAIA 8 - Jinghpaw Hanson Version Bible bible

ESAIA 8

¹Bai Yehowa gaw, Hpunpyen kaba la nhtawm, dai hta e, “Mahera-shalala-hash-bat a matu,” ngu nna masha ka ai hku ka da u;

²sakse hkam na matu kangka re ai sakse ngai shaga na nngai; dai gaw hkinjawng Uria hte Yeberehki a kasha Zehkaria yan rai nga ma ai, nga nna ngai hpe tsun ai.

³Dai hpang myihtoi jan kaw ngai shang nna, shi na-um nasin re ai hte shadang sha shangai wu ai. Shaloi Yehowa gaw, “Dai ma hpe Mahera-shalala-hash-bat,” ngu nna shamying u.

⁴Kaning rai nme law, dai ma gaw, “Nu e, wa e, nga nna garai n chye shaga yang, Damasku mare na sutgan hte, Samari mung na kashun la ai lanep hpe, Asuri hkawhkam magawn la kau na ra ai,” nga ai.

⁵Bai Yehowa ngai hpe tsun ai gaw,

⁶“Ndai amyu gaw angwi sha lwi ai Shilo hkaraw na hka hpe gang kau nna, Rezin hte Remalia kasha hta kabu ma ai majaw,

⁷yu mu, Madu gaw, Asuri hkawhkam hte shi a hpung shingkang ting ngu ai, galu kaba ai hte hpungla ja la ai hkanu hpe, shanhte a ntsa e lwi shangun nna, dai gaw hka hkin-gau hte daru ni hpe lim kau ai hte,

⁸Yuda mung du hkra dep nhtawm, dai hpe mung lwi ka-up nna, adu du hkra dep na ra ai: Emanuela e, de a singkaw ni kahpyen dat nna, na a mung ting ka-up nga na ra ai law,” nga ai.

⁹Amyu baw ni e, kabring kabrawng nga timung, agrawp kau ai hkrum mu; sumtsan mung na ni e, madat mara nga mu; shingkyit kyit timung, agrawp kau ai hkrum mu;

¹⁰Hpaji daw mu, dai gaw byak mat na ra ai; hpajang da mu, dai gaw grin lu na n rai: kaning rai nme law, Karai Kasang anhte hte rau rai nga ai.

¹¹Ndai amyu masha ni a lam hta n hkan hkawm hkra, Yehowa nan n-gun ja ai lata hte ngai hpe sharin let tsun ai gaw,

¹²“Gumle gumlau re ai, nga nna ndai amyu masha ni tsun ai lam shagu hta, Gumle gumlau hkum tsun lawm myit: shanhte hkrit ga ai lam hpe hkum hkrit myit, hkum kajawng myit.

¹³Zaw nawng zaw wa up ai Yehowa hpe hkungga lara mu; shi hpe hkrit kamyin mu, shi a lam kajawng nga mu.

¹⁴Dai rai yang shi gaw chyoi pra ai shingbyi shara tai na ra ai: rai timung, Israela dap lahkawng a matu, ahtu kataw na nlung hte, myit kataw shangun ai lunghkrung, Yerusalem masha ni a matu, mahkam hte ndaw, shi tai na ra ai:

¹⁵law law wa dai hta ahtu kataw nna, kadawng hkrat ai, agrawp kau ai, mahkam hte ndaw hta lu ai, hkrum na mara ai,” nga ai.

¹⁶Nye a sape ni kaw, ndai sakse ga hpe kyem da u, ndai tara hpe dazik shakap da u.

¹⁷Ngai mahtang, Yaku a nta hpe myi man makoi kau ai Yehowa hpe ala nga nna, shi hpe myit mada na nngai.

¹⁸Yu u, ngai mung, Yehowa jaw ai ngai sha ni mung, Ziun bum e shanu nga ai Zaw nawng zaw wa up ai Yehowa kaw na, Israela amyu hta, lamik kumla hte mauhpa lam tai nga ga ai.

¹⁹Nat shung ai ni hte, mandan bau jawp kahte ai ni hpe tam mu, nga nna nanhte hpe tsun myit yang, masha amyu gaw tinang a Karai Kasang hpe tam mai na, n rai ni? hkrung nga ai ni a amu, si mat ai ni hpe mai san na rai ni?

²⁰Tara hte sakse ga hpe madat mara mu; shanhte tsun ai lam ndai ga hte nbung yang, gaja wa, shanhte a matu jahpawt manap n nga ai.

²¹Shanhte gaw hki ba ai hte kawsi hkrum let lai mat wa na mara ai: kawsi hkrum yang, shanhte myit kahtet nna, ntsa de dap mada yu let, tinang a hkawhkam wa hte, tinang a Karai Kasang hpe dagam kau na mara ai:

²²ga de mada yu yang, yu mu, ru tsang ai, nsin sin ai hte myit htum ai sin mang hkrai rai nga ai: shanhte gaw nsin htat ai shara de gawt kau ai hkrum na mara ai.

²³Rai timung, myit htum hkrum ai mung hta, ya gaw sin mang n nga sai: moi shawng de Zebulun mung hte Naphtali mung hpe shagrit kau timung, htawm hpang e, nawng makau lam, Yawdan hka wora hkran na, amyu kaga ni nga ai Galile mung, hpe, arawng sadang hte hpring shangun wu ai.