Read Jinghpaw Hanson Version Bible JAW JAU 12 Bible Online

JAW JAU 12 - Jinghpaw Hanson Version Bible bible

JAW JAU 12

¹Bai Yehowa Mawshe hpe tsun wu ai gaw,

²Israela a kashu kasha ni hpe ning ngu tsun u: Numsha gaw, num hking lang ai shaloi sanit ya tup n san n seng hta nga nga ai hte maren, na-um nasin rai nna shadang sha shangai yang mung, sanit ya tup n san n seng hta nga nga na rai wu ai.

³Matsat ya du ai shani e dai shadang sha hpe matu gadoi ya na rai wu ai.

⁴Dai hpang kanu gaw jasan jaseng ai ladaw hte seng ai asai a majaw sumshi masum ya tup naw rawng nga na rai nna, chyoi pra ai arai hpa mung n hkra ai sha, jasan jaseng nhtoi garai n gu dingsa chyoi pra ai nta de shang lu na n rai.

⁵Numsha shangai ai rai yang gaw num hking lang yang na zawn, nhtoi shi mali ya tup n san n seng hta nga nga nna jasan jaseng ai ladaw hte seng ai asai a majaw kru shi e kru ya naw rawng nga na rai wu ai.

⁶Shadang sha shangai ai rai timung, shayi sha shangai ai rai timung, jasan jaseng ai nhtoi gu sayang gaw, wan nat hkungga di na matu ladu hkrum sai sagu kasha langai mi, htingrai hkungga di na matu, hkrudu shing n rai u ra langai mi, shawa sum chyinghka de hkinjawng wa kaw la sa na rai wu ai:

⁷hkinjawng wa mung Yehowa a man e dai la nawng ya nna, dai numsha a matu htingrai ya na rai wu ai: shaloi shi gaw sai su ai hta na chyoi pra wa na ra ai. Dai gaw shayi, shadang shaprat yang na ma kanu hte seng ai tara rai nga ai.

⁸Sagu kasha n dang yang gaw, u ra lahkawng, shing n rai hkrudu lahkawng, wan nat hkungga a matu langai mi, htingrai hkungga a matu langai mi la sa lu na rai nna, hkinjawng wa gaw shi a matu htingrai htingrat ya na rai wu ai: shaloi shi chyoi pra wa na ra ai, ngu wu ai.