Read Jinghpaw Hanson Version Bible JAW JAU 13 Bible Online

JAW JAU 13 - Jinghpaw Hanson Version Bible bible

JAW JAU 13

¹Bai Yehowa Mawshe yan Arun hpe tsun wu ai gaw,

²Masha hkum hta akawng ai rai yang mung, gyigu u ai rai yang mung, pang rai hpraw ai rai yang mung, shi a hpyi shan hta manggang kumla la ai rai yang, dai wa gaw hkinjawng Arun hpang de, shing n rai shi a shadang sha hkinjawng wa langai ngai hpang de sa dan lu na rai nna,

³hkinjawng wa gaw shi a hpyi shan hta byin ai nma yu ya na rai wu ai: dai ningma hta tu ai mun hpraw ai hte ningma hkyawk nga ai rai yang gaw manggang rai nga ai ngu nna n san n seng hku dawdan na rai wu ai.

⁴Shi a hpyi shan hta na ningma dai hpraw nhtawm, n hkyawk ai hte amun mung n hpraw yang gaw, hkinjawng wa dai ana kap ai wa hpe sanit ya tup hkum da na rai wu ai:

⁵sanit ya du ai shani hkinjawng wa gaw shi hpe yu ya nna, shi a hpyi shan hta ningma dai n yawm n jat yang gaw, sanit ya tup bai hkum da na rai wu ai:

⁶sanit ya bai du ai shani e hkinjawng wa shi hpe bai yu nna, shi a ningma n kaba jat ai sha, loi mi bai majing wa yang gaw, dai wa san seng ai ngu nna dawdan na rai wu ai: dai gaw gyi gu gu ai sha rai nga ai. Shi a hpun palawng shi hkrut nna, san seng na rai nga ai.

⁷Rai timung, shi a san seng lam matu hkinjawng wa yu ya ngut ai hpang e, shi a hpyi shan hta ningma dai hpra wa yang gaw shi hkum hkinjawng wa hpe bai sa madun na rai wu ai:

⁸shaloi hkinjawng wa bai yu ya nna, dai gyigu ningma shi a hpyi shan hta hpra wa lu yang gaw, dai wa n san n seng ai ngu nna dawdan na rai wu ai: dai gaw manggang rai nga ai.

⁹Manggang ana kap ai wa gaw hkinjawng wa hpang de sa madun lu na rai wu ai:

¹⁰shaloi hkinjawng wa gaw yu ya nna, hpyi shan hta hpraw akawng ai hte tu ai mun hpraw ai rai yang mung, ningma hta shan hkyeng dawng ai rai yang mung,

¹¹dai gaw shi a hpyi shan hta manggang dingsa rai nga ai rai nna, shi hpe n san n seng ai ngu na rai wu ai: shi n san n seng ai majaw shi hpe jahkring da shara n nga ai.

¹²Rai timung, shi a hpyi shan hta manggang dai hpra wa nna, hkinjawng wa mu ai hte maren, manggang kap ai wa a hkum ting abaw nna lagaw hkren hpraw galup nga ai rai yang;

¹³dai hpe hkinjawng wa yu yu nna, dai wa a hkum ting hta manggang hpraw galup nga lu yang gaw, shi hpe san seng ai ngu na rai wu ai: hkum ting hpraw nga lu ai majaw shi san seng nga ai.

¹⁴Rai timung, shan hkyeng bai dawng yang gaw shi n san n seng rai nga ai.

¹⁵Dai hpe hkinjawng wa bai yu yu nna, shi hpe n san n seng ai ngu na rai wu ai: shan hkyeng gaw n san n seng ai rai nga ai: dai gaw manggang rai nga ai.

¹⁶Shan hkyeng dai bai hpraw pru yang gaw, hkinjawng wa hpang de bai sa madun na rai wu ai:

¹⁷hkinjawng wa yu yu yang, ana dai bai hpraw wa lu yang gaw, ana kap ai wa hpe san seng ai ngu na rai wu ai: shi gaw san seng ai rai nga ai.

¹⁸Hpyi shan hta shakrwi tu nna, mai mat ai hpang,

¹⁹dai ningma hkang hta hpraw akawng ai, shing n rai, pang rai hkyeng ai byin pru yang, hkinjawng wa hpe madun dan na rai wu ai:

²⁰dai hpe hkinjawng wa yu yu yang, hkyawk ai hte mun hpraw ai zawn rai yang gaw, dai wa n san n seng ai ngu na rai wu ai: dai gaw shakrwi hta na byin pru ai manggang rai nga ai.

²¹Rai timung hkinjawng wa yu yu yang, mun n hpraw, hpyi hta mung n hkyawk ai sha, majing na zawn rai lu yang gaw, dai wa hpe sanit ya tup hkum da na rai wu ai.

²²shi a hpyi shan hta hpra wa lu yang gaw, hkinjawng wa shi hpe n san n seng ai ngu na rai wu ai: dai gaw manggang rai nga ai:

²³dai pang rai hkyeng ai ningma mung n jat, hpra mung n hpra wa ai rai yang gaw, dai gaw shakrwi hkang rai nga ai: hkinjawng wa mung shi hpe san seng ai ngu na rai wu ai.

²⁴Masha a hpyi shan hta wan hkru hkang hkang nna, dai hkang a shan hta pang rai hkyeng ai, shing n rai pang rai hpraw ai byin pru yang,

²⁵hkinjawng wa yu yu nna, dai pang re ai hta mun hpraw ai hte hkyawk ai zawn rai yang gaw, wan hkru hkang na pru ai manggang rai nga ai: hkinjawng wa mung dai wa hpe n san n seng ai ngu na rai wu ai: dai gaw manggang ana rai nga ai.

²⁶Hkinjawng wa yu yu yang, ningma na mun n hpraw, hpyi shan mung n hkyawk, majing na zawn sha rai yang gaw, dai wa hpe hkinjawng wa sanit ya tup hkum da na rai wu ai.

²⁷Sanit ya du ai shani e hkinjawng wa yu yu nna, ningma jat maden wa lu yang gaw, dai wa n san n seng ai ngu na rai wu ai: dai gaw manggang ana rai nga ai.

²⁸Rai timung, ningma hkang dai n jat, hpyi shan hta mung n hpra wa ai sha, majing na zawn rai yang gaw, wan hkru hkang akawng ai sha rai nga ai rai nna, hkinjawng wa gaw dai wa hpe san seng ai ngu na rai wu ai: dai gaw wan hkru ai ningma hkang san san she rai nga ai.

²⁹Numsha, lasha kadai mung, baw hta shing n rai nmun hta ana pru ai rai yang,

³⁰dai hpe hkinjawng wa yu yu nna, mun shinggawng kaji ai hte, htoi htoi nu nu re ai rai yang gaw, hkinjawng wa dai wa hpe n san n seng ai ngu na rai wu ai: dai gaw kara hta rai tim, nmun hta rai tim, pungsaw manggang rai nga ai.

³¹Hkinjawng wa dai pungsaw ana hpe yu yu yang pung shan mung n hkyawk, kara mung n chyang yang gaw, hkinjawng wa dai ana kap ai wa hpe sanit ya tup hkum da na rai wu ai:

³²sanit ya du ai shani e hkinjawng wa bai yu yu nna, ana dai n jat wa ai hte amun mung n htoi, pung shan mung hkyawk ai zawn n rai yang gaw,

³³ana kap ai hte shawan da nna, gale de na mun yawng hpe shangun kau ya nhtawm, ana kap ai wa hpe sanit ya tup bai hkum da yu na rai wu ai:

³⁴sanit ya bai du ai shani, ana dai hpe hkinjawng wa bai yu yu nna, dai ana hkang n hkyawk yang gaw, hkinjawng wa dai wa hpe san seng ai ngu na rai wu ai: shing rai shi a hpun palawng hkrut nna, san seng na rai nga ai.

³⁵Shi hpe jasan jaseng ai hpang, dai pungsaw ana pung shan hta maden jat wa ai rai yang gaw,

³⁶hkinjawng wa bai yu yu nna, ana hkang jat maden wa ai rai yang, amun htoi n htoi gawn shara n nga ai; shi n san n seng ai, rai nga ai.

³⁷Ana dai n maden jat ai hte amun mung chyang wa lu yang gaw, dai pungsaw ana mai wa sai rai nna, shi san seng sai rai nga ai: hkinjawng wa mung shi hpe san seng ai ngu na rai wu ai.

³⁸Numsha, lasha kadai mung, hpyi shan hta pang rai hpraw pru yang,

³⁹hkinjawng wa yu yu nna, dai hpyi shan pang re ai hta mut mut san yang gaw, dai gaw hpyi shan hta na byin pru ai maru sha rai nga ai: shi gaw san seng nga ai.

⁴⁰Kara raw ai wa gaw, baw krin hkra rai timung shi san seng rai nga ai.

⁴¹Pung man kara raw ai wa pung man krin hkra rai timung, shi san seng rai nga ai.

⁴²Rai timung, shi a krin ai baw hta, shing n rai krin ai pung man hta pang rai hkyeng hpraw pru yang, dai gaw shi a pung krin hta, shing n rai pung man hta byin pru ai manggan rai nga ai.

⁴³Shaloi hkinjawng wa shi hpe yu yu nna, hkum a hpyi shan hta na manggang zawn pung krin, shing n rai pung man krin hta hkyeng hpraw akawng ai rai yang,

⁴⁴dai wa manggang kap nga ai rai nna, n san n seng rai nga ai: hkinjawng wa mung shi hpe n san n seng ngu na wu ai: shi a baw hta ana kap nga ai.

⁴⁵Manggang kap ai wa gaw je ai hpun palawng bu hpun let, kara hpyan ayai kau nna, lahta nten magap kau nhtawm, N san n seng ai, N san n seng ai, ngu nna jahtau na rai wu ai.

⁴⁶Ana dai, n mai dingsa gaw shi hta awu asin arai nga ai: shi gaw n san n seng rai nga ai: shi hkrai nga nga na rai nna, shi a nga shara gaw dap shinggan e rai na rai nga ai.

⁴⁷Manggang ana kap ai hpun nba gaw, sagu nba, shing n rai lachyit nba

⁴⁸ri madung hta rai timung, ri majan hta rai timung, shanhpyi hta rai timung, shanhpyi hte galaw ai rai hpa baw hta rai timung, dai ni hta kap ai ana dai,

⁴⁹tsit tsit hkyeng hkyeng re ai rai yang gaw, manggang rai nga ai majaw hkinjawng wa hpe madun na rai wu ai:

⁵⁰hkinjawng wa gaw ana kap ai hpe yu yu nna, sanit ya tup dai arai hpe la tawn da na rai wu ai:

⁵¹sanit ya nhtoi hta bai yu nna, ana dai ri madung hta, ri majan hta, shanhpyi hta, shanhpyi hte galaw ai rai hta maden wa yang gaw, dai gaw sha wa ai manggang rai nga ai: dai gaw n san n seng rai nga ai.

⁵²Shing rai, sagu, lachyit nba a ri madung hta, shing n rai majan hta, shanhpyi arai hta, sha wa ai manggang kap ai majaw, hpun nba dai hpe wan hta nat kau na rai wu ai: gaja wa nat kau na rai wu ai.

⁵³Bai hkinjawng wa yu yu yang, dai hpun nba hta na ri madung, ri majan hte shanhpyi rai hta ana n maden wa yang gaw,

⁵⁴ana kap ai arai hpe hkinjawng wa hkrut kau shangun nna, sanit ya tup bai tawn da na rai wu ai.

⁵⁵Shing rai hkrut kau ai hpang hkinjawng wa bai yu yu yang, ana n maden wa timung, ahpraw n lai yang gaw, n san n seng rai nga ai; wan hte nat kau na rai wu ai: dai gaw kata maga, shing n rai shinggan maga tsam mat ai ana rai nga ai.

⁵⁶Bai hkinjawng wa yu yu yang, hkrut kau ai hpang e ana dai majing na zawn rai yang gaw, dai hpun nba, shanhpyi, ri madung hte majan hta na ana kap ai hte gang je kau na rai wu ai:

⁵⁷rai timung, dai nba hta, ri madung, ri majan hte shanhpyi rai hta naw byin pru yang gaw, sha maden wa ai ana rai nga ai majaw ana kap ai arai hpe wan hta nat kau na rai wu ai.

⁵⁸Hpun nba a ri madung, ri majan hte shanhpyi rai hpa baw rai timung, hkrut kau nna ana mai ai hpang, lang mi bai hkrut ai hta san seng na rai nga ai.

⁵⁹Dai hte gaw san seng ai hte n san n seng ai lam yu yu na matu, manggang kap ai sagu hpun nba, lachyit hpun nba a ri madung, ri majan hte shanhpyi rai ni hte seng ai tara rai nga ai, ngu wu ai.