Read Jinghpaw Hanson Version Bible JAW JAU 16 Bible Online

JAW JAU 16 - Jinghpaw Hanson Version Bible bible

JAW JAU 16

¹Arun a shadang sha yan Yehowa man de sit sa nna si mat ai hpang, Yehowa Mawshe hpe tsun wu ai gaw,

²Na nhpu Arun si ai n hkrum u ga, chyoi pra htum ai shara kata sumpu ntsa na chyeju magap hpe shinggang ai nba grang a kata de pagawn hkum shang rit, ngu nna shi hpe tsun u; kaning rai nme law, dai chyeju magap a ntsa na summwi hta ngai dan pru nga na ring ngai.

³Chyoi Pra ai shara de Arun ning rai shang lu na gaw: htingrai hkungga di na usu uram langai mi, wan nat hkungga di na sagu la langai mi lawm ra na rai nga ai.

⁴Dai chyoi pra ai sumpan palawng, sumpan bu hkung bu hpun nna, sumpan shingkyit kyit, sumpan bunghkaw hkaw rai na rai wu ai: dai gaw chyoi pra ai hpun palawng ni rai nga ai; shi hkum hka shin kau nna she dai hpe bu hpun na rai wu ai.

⁵Bai, htingrai hkungga matu nam la lahkawng, wan nat hkungga matu sagu la langai mi, Israela shawa hpung kaw na la na rai wu ai.

⁶Shing rai Arun gaw shi hte seng ai, shi a htingrai hkungga a usu nawng jau nna, shi hte shi a nta masha ni a matu htingrai htingrat na rai wu ai.

⁷Bai dai nam la lahkawng mung, la nna shawa sum chyinghka makau, Yehowa a man e tawn da na rai wu ai.

⁸Bai Arun gaw dai bainam lahkawng hpe, Yehowa a matu langai mi, dat kau na matu langai mi di nna, hpaida hte lata na rai wu ai.

⁹Shing rai Arun gaw, Yehowa a matu ang ai bainam hpe htingrai hkungga di nna nawng na rai wu ai.

¹⁰Dat kau na ang ai bainam hpe gaw Yehowa a man e ahkrung nawng nna, de a ntsa e htingrai htingrat nhtawm, nam de dat kau na rai wu ai.

¹¹Bai Arun gaw shi hte seng ai htingrai hkungga a usu la tawn nna, shi hte shi a nta masha ni a matu htingrai htingrat na, shi hte seng ai htingrai hkungga a usu hpe sat na rai wu ai.

¹²Bai shi gaw Yehowa a man e nga ai tawn hkungri na grung ai wan n-ga wan ban hta jahpring la nhtawm, mani ai lawban latup lang let nba shinggang kata de la shang wa na rai wu ai:

¹³Shaloi, shi si ai n hkrum na matu, dai lawban a sangau sakse sumpu a ntsa na chyeju magap hpe mawng bun hkra Yehowa a man e lawban dai hpe wan ban hta bang nat na rai wu ai:

¹⁴Usu sai mung la nna chyeju magap a sinpraw maga hpe layung hte lapri na rai wu ai: dai chyeju magap a man e mung shi a layung hte sanit lang lapri na rai wu ai.

¹⁵Dai hpang amyu masha ni hte seng ai htingrai hkungga bainam sat nna, de a sai hpe nba shinggang kata de la shang nhtawm, usu sai lapri ai zawn chyeju magap ntsa e mung, de a man e mung lapri na rai wu ai:

¹⁶Shing rai Israela a kashu kasha ni a n san n seng ai hte tara tawt lai ai yubak mara yawng a majaw, dai chyoi pra ai shara a matu htingrai htingrat ya na rai wu ai; bai, shanhte a nsan n seng ai a ka-ang e nga ai shawa sum a matu mung, shing rai galaw na rai wu ai.

¹⁷dai chyoi pra ai shara de htingrai htingrat na nga shang wa ai shaloi, tinang a matu hte shi a nta masha ni a matu mung, Israela shawa hpung a matu mung htingrai htingrat ngut nna bai pru wa ai du hkra shawa sum kata e kadai mung nga lu na nrai.

¹⁸Bai Yehowa man na tawn hkungri de pru nna, dai tawn hkungri a matu htingrai htingrat na, usu sai hte bainam sai la nhtawm, tawn hkungri ntsa grup na nrung ni hta chya na rai wu ai.

¹⁹Dai tawn hkungri a ntsa e mung, dai sai hpe layung hte sanit lang lapri ai hte jasan jaseng nna, Israela kashu kasha ni a n san n seng ai hta na shachyoi shapra na rai wu ai.

²⁰Shing rai chyoi pra ai shara a matu, shawa sum a matu, tawn hkungri a matu htingrai htingrat ai ngut jang, bainam hkrung la tawn na rai wu ai:

²¹Arun gaw dai bainam hkrung a baw hta shi a lata lahkawng maga mara let Israela a kashu kasha ni a n hkru n hkra ai hte tara tawt lai ai yubak yawng mayawng tawngban nna dai bainam baw hta mara da nhtawm san da ai masha a lata hte nam mali de gawt kau shangun na rai wu ai:

²²bainam dai gaw shanhte a yubak nlang katsi katsang re ai shara de gun mat wa ya na rai nna, dai hpe nam mali de dat kau na rai wu ai:

²³Bai Arun gaw shawa sum kata de shang nna, dai chyoi pra ai shara de shang na rai yang shi bu hpun ai sumpan hpun palawng ni raw kau nhtawm, dai shara hta tawn da na rai wu ai:

²⁴ning rai chyoi pra ai shara langai mi hta shi hka shin kau nna, shi a hpun palawng bu hpun nhtawm, shi hte seng ai wan nat kumhpa mung, amyu masha ni hte seng ai wan nat kumhpa mung nawng jau ai hte shi a matu mung, amyu masha ni a matu mung htingrai htingrat na rai wu ai.

²⁵Htingrai hkungga sau man hpe mung, tawn hkungri hta nat na rai wu ai.

²⁶Nam mali de bainam sa dat kau ai wa mung shi a hpun palawng hkrut nna hka shin na rai wu ai; shing rai nna she dap hta shang na rai wu ai.

²⁷Chyoi Pra ai shara e htingrai htingrat na matu la shawn ai asai a htingrai hkungga usu hkum hpe mung, htingrai hkungga a bainam hkum hpe mung, dap shinggan de la shapraw nna, ahpyi, ashan ahkyi re ai ni hpe wan hta nat kau na rai wu ai.

²⁸Dai sa nat kau ai wa mung, shi a hpun palawng hkrut nna, shi hkum hka shin nhtawm, dap e shang na rai wu ai.

²⁹Nanhte tutnawng hkan nga na matsun ndai rai nga ai: nanhte hkum nan rai timung, nanhte kaw shingbyi nga ai amyu kaga wa rai timung, shata sanit hta na nhtoi shi ya e hpa amu bungli mung n galaw ai sha, tinang a myit masin hpe shagrit let ban nga na rai mu ai:

³⁰Kaning rai nme law, dai nhtoi hta, nanhte hpe jasan jaseng na, nanhte a matu htingrai htingrat na rai nga ai: shing rai Yehowa man e nanhte a yubak mara nlang san seng wa na ra ai.

³¹Dai nhtoi gaw nanhte a matu simsa laban shani rai nga ai rai nna, nanhte a myit masin hpe shagrit nga na rai myit dai: dai gaw prat dingsa na ga matsun rai nga ai.

³²Kawa a hkringhtawng dagraw na matu, namman chya ai hte aya dang hkam la ai hkinjawng wa mung, dai chyoi pra ai sumpan hpun palawng bu hpun nna htingrai htingrat na rai wu ai:

³³Dai wa gaw, chyoi pra ai shara a matu mung, shawa sum a matu mung, tawn hkungri a matu mung hkinjawng ni a matu mung, shawa hpung ting a matu mung htingrai htingrat na rai wu ai.

³⁴Ndai hte gaw Israela a kashu kasha ni a yubak mara yawng mayawng a majaw, laning mi hta lang mi htingrai htingrat na matu, nanhte tutnawng hkan nang na tara matsun rai nga ai, ngu wu ai. Shing nga Yehowa Mawshe hpe hkang da ai hte maren Aun galaw wu ai.