Read Jinghpaw Hanson Version Bible JAW JAU 17 Bible Online

JAW JAU 17 - Jinghpaw Hanson Version Bible bible

JAW JAU 17

¹Bai Yehowa Mawshe hpe tsun wu ai gaw,

²Arun hte shi a shadang sha ni hpe mung, Israela kashu kasha ni hpe mung ning ngu tsun mu: Yehowa ning nga hkang da ai:

³Israela kashu kasha ni hte marai langai ngai, dumsu, sagu, bainam re ai hpe dap kata e sat ai rai timung, dap shinggan e sat ai rai timung, Yehowa a sum man e

⁴Yehowa hpe nawng na matu, dai shawa sum chyinghka de n la sa ai rai yang, dai wa gaw asak sat ai mara lu ai wa ngu na rai nga ai: shi gaw sai jahkaw ai wa rai nga ai: shing re ai wa gaw shi a amyu hta na sumri dan kau ya ai hkrum lu na wu ai:

⁵ndai gaw, Israela kashu kasha ni nam ga e naw rai yang jaw jau ai kumhpa ni hpe shawa sum chyinghka a man e Yehowa kaw hkinjawng wa hpang de la wa nna, Yehowa hpe mahku hkungga jaw na matu, dan da ai lam rai nga ai.

⁶Hkinjawng wa gaw dai hkungga a sai hpe shawa sum chyinghka makau na Yehowa a tawn hkungri hta lapri nna, sau man hpe mung Yehowa a manam pyaw ai sangau matu nat na rai wu ai.

⁷Dai hta kaga, namla hpe tinang a hkungga sa jaw nna, hpye ai amu hkan galaw ai zawn, htawm hpang de galaw lu na n rai. Dai gaw, shanhte a shu mashi shu masha prat dingsa madat mara nga na ga matsun rai nga ai.

⁸Bai shanhte hpe ning ngu mu: Israela kashu kasha ni hta na rai timung, nanhte kaw shingbyi nga ai amyu kaga wa rai timung, wan nat hkungga hte kaga hkungga hpa baw mung, nawng jau ai rai yang,

⁹Yehowa hpe jaw jau na matu shawa sum chyinghka makau de n la sa a yang gaw, dai wa gaw shi a amyu hta na sumri dan kau ya ai hkrum na rai nga ai.

¹⁰Israela kashu kasha ni hta na rai timung, nanhte kaw shingbyi nga ai amyu kaga ni hta na rai timung, marai langai ngai lama ma a sai lusha ai rai yang gaw dai wa hpe ngai ate nna, shi a amyu hta na sumri dan kau ya na we ai.

¹¹Kaning rai nme law, hkum shan a asak gaw asai hta rawng nga ai: nanhte a myit masin matu htingrai htingrat ya na, dai asai hpe tawn hkungri ntsa e ngai nanhte hpe jaw da se ai; asak rawng ai a majaw, asai gaw htingrai htingrat ya lu ai.

¹²Dai re ai majaw, Nanhte kadai mung asai sha lu na n rai; nanhte kaw shingbyi nga ai amyu kaga wa mung, asai sha lu na n rai, ning nga Israela a kashu kasha ni hpe ngai tsun nga nngai.

¹³Shing rai, Israela kashu kasha ni hta na rai timung, nanhte kaw sa shingbyi nga ai amyu kaga ni hta na rai timung, marai langai ngai jaugawng gawng nna, sha mai ai ashu ashan, a-u re ai lu yang, de a asai hpe hkaw kau nna aga hte kaput na rai mu ai.

¹⁴Kaning rai nme law, hkum shan ngu ai baw a asak hkrung lam gaw asai hta rawng nga ai re ai majaw, Nanhte gaw hpa baw hkum shan a asai mung sha lu na n rai, ning nga Israela kashu kasha ni hpe ngai tsun nga nngai: hkum shan ngu ai baw a asak jahkai asai hta rawng nga ai; dai rai nna asai sha ai wa kadai mung sumri dan kau ya ai hkrum na ra ai.

¹⁵Nanhte hta na rai timung, shingbyi nga ai wa rai timung, shi hkrai si ai, shing n rai matse labye e kawa sat ai si mang hpya sha ai wa gaw, tinang a hpun palawng hkrut kau nna hka shin na rai wu ai: shana de du hkra n san n seng rai nga ai; dai hpang san seng na ra ai.

¹⁶Shi hpun palawng n hkrut, hkum hka n shin yang gaw, dai wa gaw, tinang a yubak hkrum lu na rai wu ai, ngu wu ai.