Read Jinghpaw Hanson Version Bible JAW JAU 19 Bible Online

JAW JAU 19 - Jinghpaw Hanson Version Bible bible

JAW JAU 19

¹Bai Yehowa Mawshe hpe tsun wu ai gaw

²Israela kashu kasha ni a shawa hpung ting hpe ning ngu tsun u: Nanhte a Karai Kasang, ngai Yehowa, chyoi pra nga nngai majaw, nanhte mung chyoi pra nga mu.

³Nanhte hkum shagu tinang a kanu kawa hpe hkungga lara rai lu na myit dai: ngai tawn da ai laban nhtoi ni hpe mung dum nga lu na rai myit dai: ngai gaw nanhte a Karai Kasang Yehowa rai nga nngai.

⁴Gawngngu sumla hkum naw mu; tinang a matu shachyaw ai hpara hkum galaw myit: ngai gaw nanhte a Karai Kasang Yehowa rai nga nngai.

⁵Yehowa hpe mahku hkungga jaw ai rai yang gaw, shi hkap la ra na hku nawng lu na rai myit dai.

⁶Hkungga lang ai shani hte hpang shani e sha na rai myit dai: masum ya ngu na shani du hkra ngam ai hpe gaw nat kau na rai wu ai.

⁷Masum ya shani hta kaji sha mi sha ai rai timung, dai gaw matsat shabat lam rai nga ai rai nna, hkap la ya na n rai:

⁸Sha ai wa gaw Yehowa a chyoi pra ai arai hpe awu asin di kau nu ai majaw, yubak hkrum lu na rai nna, dai wa hpe shi a amyu hta na sumri dan kau ya na rai wu ai.

⁹Tinang a yi hkauna hta ngai ai nai mam shu la yang, njut nnaw hkan na atsai awai dan la lu na n rai; hkauling hta na ngam ai nlim mung gut la lu na n rai.

¹⁰Na tsabyi sun hta na nlim mung bai di la lu na n rai; shi hkrai hkrat ai mung hta la lu na n rai; dai gaw matsan mayan re ai ni hte hkrun lam manam ni a matu ngam da lu na rai myit dai. Ngai gaw nanhte a Karai Kasang Yehowa rai nga nngai.

¹¹Masha arai hkum lagu myit; masha hpe maw sha map sha ai hte shada masu magaw ga hkum tsun myit.

¹²Na a Karai Kasang a mying ningsang n jahpoi myit ga nye mying gang nna n teng n man ai lam hkum dagam myit: ngai gaw Yehowa rai nga nngai.

¹³Na a htingbu manang wa hpe adip akrip di lu na n rai, shi a arai hpe mung hpya sha lu na n rai, nchyang ma a shabrai hpe shana tup nhtoi htoi hkra shadang da lu na n rai.

¹⁴Na lahpang ai wa hpe matsa kau lu na n rai; myit hten ai wa a man de ahtu kataw hpa tawn ya lu na n rai: na a Karai Kasang hpe nang hkrit hkungga lu na rai ndai: ngai gaw Yehowa rai nga nngai.

¹⁵Tara jeyang ai lam hta n sun n ang ai hku dawdan ya lu na n rai; matsan jahkrai hpe mung n maga, kaba ai wa a myi man mung n tau ai sha, tengman ai hku hkan nna na a baw sang lapran jeyang ya lu na rai ndai.

¹⁶Na a amyu masha ni hta shi wawn htawn hkawm ai wa nang tai lu na n rai: na a manang wa a asak nang gyam lu na ndai n rai: ngai gaw Yehowa rai nga nngai.

¹⁷Na a hpunau wa hpe n dawng n yawt rai lu na n rai: na a manang wa lu ai mara nang hta n hkra hkra, nang shi hpe teng teng shadum jahprang na rai ndai.

¹⁸Na a amyu masha ni hpe nang hkum nan matai htang lu na n rai: masin n si ai myit mung rawng nga lu na n rai: na a htingbu wa hpe na a hkum hte maren nang tsawra lu na ndai: ngai gaw Yehowa rai nga nngai.

¹⁹Nye a ga matsum nanhte hkan nang lu na rai myit dai: amyu n gadaw ai yamnga shada hpe uli shalum lu na n rai: amyu n gadaw ai hkai nli hpe na a yi hkauna hta kayau gat lu na n rai: ri baw lahkawng hte kayau da ai hpun palawng mung bu hpun lu na n rai.

²⁰Masha wa e mahtan da nna, garai n hkrang la ai hte dat kau ai garai n hkrum ai laman e, mayam num dai hte shut hpyit ai rai yang, shan lahkawng gaw ari hkrum lu na rai nga ai: rai timung dai numsha gaw shi a mayam naw rai nga ai majaw, sat kau ai hkrum lu na n rai.

²¹Mayam madu la wa gaw mara raw hkungga di na matu, sagu la langai mi shawa sum chyinghka, Yehowa a man de la sa na rai wu ai.

²²Shaloi hkinjawng wa gaw dai la wa a shut ai mara a matu, mara raw hkungga sagu la hte Yehowa a man e htingrai htingrat ya na rai wu ai: shing rai dai la wa gaw mara raw kau ya ai hkrum na ra ai.

²³Nanhte ngai jaw ai mung de du nna sha ai baw namsi hpun amyu myu hkai ngut jang, masum ning si ai gaw, matu n gadoi ai amyu hte maren re ai, ngu na rai mu ai: dai hpe sha lu na n rai.

²⁴Mali ning ngu na hta si ai yawng mayawng gaw chyoi pra na rai nna, Yehowa a chyeju shakawn na matu rai nga ai.

²⁵Manga ning ngu na hta si ai gaw nanhte sha na rai malit dai: shing rai yang namsi hpun ni grau si wa na mara ai: ngai gaw nanhte a Karai Kasang Yehowa rai nga nngai.

²⁶Asai rawng ai hpa baw shahpa mung nanhte sha lu na myit dai n rai: mandan lakle amu hte shaba wawt ai lam nanhte hkan galaw lu na n rai.

²⁷Kara ladu nanhte shangun lu na n rai; nmun mung doi lu na n rai.

²⁸Si sai wa a matu tinang hkum hpe gadoi jahpye lu na n rai; tinang hkum hta masat hkang jahkang lu na n rai: ngai gaw Yehowa rai nga nngai.

²⁹Tinang a shayi sha hpe shawa num shatai nna jahpoi lu na myit dai n rai: shing rai taw gaw mung ting hta hpye ai lam hkan nna, n hkru n shawp ai pri rai na ra ai.

³⁰Ngai tawn da ai laban nhtoi ni hpe nanhte hkan nga nna, nye a chyoi pra ai nta hpe hkungga agam lu na rai myit dai: ngai gaw Yehowa rai nga nngai.

³¹Nat lahkum ni hte gumhpan re ai ni kaw hkum sa chyu myit: nanhte a hkum hpe shayuk kau na dai zawn re ai ni hpe hkum tam myit: ngai gaw nanhte a Karai Kasang Yehowa rai nga nngai.

³²Baw hpraw sai wa a man e nang rawt tsap lu na rai ndai; dingla wa a myi man hpe hkungga lu na rai ndai; na a Karai Kasang hpe hkrit hkungga nga lu na rai ndai; ngai gaw Yehowa rai nga nngai.

³³Nanhte a mung e sa shingbyi nga ai tsasam manam hpe zingri zingrat di lu na n rai:

³⁴Nang hte rau anga nga ai tsasam manam wa hpe na a baw sang hku sawn nna, tinang hkum hte maren tsawra lu na rai ndai: kaning rai nme law, nanhte mung Egutu mung e manam tai yu manit dai: ngai gaw nanhte a Karai Kasang Yehowa rai nga nngai.

³⁵Nanhte gaw shadawn ai shadang, shen ai joi jang hte hteng ai dang hteng re ai lam ni hta n ding n man ai hku jeyang lu na n rai.

³⁶Man ai joi jang, man ai joi si, man ai dang, man ai dinghkru lang lu na rai myit dai: ngai gaw nanhte hpe Egutu mung na woi shaw wa ai, nanhte a Karai Kasang Yehowa rai nga nngai.

³⁷Nanhte gaw, ngai tawn da ai tara hte nye a ga matsun yawng mayawng shatup nga na rai myit dai: ngai gaw Yehowa rai nga nngai.