Read Jinghpaw Hanson Version Bible JAW JAU 20 Bible Online

JAW JAU 20 - Jinghpaw Hanson Version Bible bible

JAW JAU 20

¹Bai Yehowa Mawshe hpe tsun wu ai gaw,

²Israela kashu kasha ni hpe ning ngu naw tsun mu: Israela amyu hta na rai timung, Israela masha ni kaw shingbyi nga ai amyu kaga wa rai timung, tinang a kasha Molok hpara hta nawng jau ai wa gaw teng teng si lu na rai wu ai: mung masha ni dai wa hpe nlung hte kabai sat na rai mu ai.

³Nye a chyoi pra ai nta hpe awu asin rai nna, nye a chyoi pra ai mying ningsang jahpoi na, tinang kasha hpe Molok hpara hta nawng jau ai majaw, dai wa hpe ngai ate nna, shi a amyu hta na sumri dan kau ya na we ai.

⁴Molok hpara hta kasha nawng jau ai wa hpe, mung masha ni n yu n gawn ai hte shi hpe n sat ai nga ma yang gaw,

⁵Shing rai nga nga ai wa hte shi a nta masha ni hpe ngai matsing nna, shi hpe mung, shi hte rau Molok hpara hta shut hpyit ai ni yawng hpe mung, tinang a amyu hta na sumri dan kau ya na mawe ai.

⁶Nat myihtoi ni hte gumhpan hpan ai ni a lam hkan nna, shut hpyit ai wa hpe ngai ate nna shi a amyu hta na sumri dan kau ya na we ai.

⁷Dai re ai majaw nanhte hkum shachyoi shapra nna chyoi pra nga mu: ngai gaw nanhte a Karai Kasang Yehowa rai nga nngai.

⁸Nye a ga matsun nanhte hkan nga na rai myit dai: ngai gaw nanhte hpe shachyoi shapra ai Yehowa rai nga nngai.

⁹Tinang a kanu kawa hpe matsa ai wa kadai mung, sat kau ai teng teng hkrum lu na wu ai: shi gaw kanu kawa hpe matsa ai majaw si ging ai yubak lu nga ai.

¹⁰Masha wa a num shaw ai wa gaw, shi shaw ai num hte rau sat kau ai teng teng hkrum lu na rai mu ai. Tinang kawa a madu jan hte nga sha ai wa gaw, dai jan hte rau sat kau ai teng teng hkrum na rai ma ai: shan lahkawng gaw si ging ai yubak lu ma ai.

¹²Tinang kanam hte nga sha ai rai yang, dai yan gaw sat kau ai teng teng hkrum lu na rai mu ai: shan lahkawng gaw kayau kaya re ai matsat shabat lam galaw ma ai majaw, si ging ai yubak lu ma ai.

¹³Numsha hte kanawn ai zawn lasha shada kanawn ai rai yang, dai yan gaw matsat shabat amu galaw ma ai majaw, sat kau ai teng teng hkrum na rai mu ai: shan gaw si ging ai yubak lu ma ai.

¹⁴Masha langai ngai kasha hte kanu hpawn madu jan shatai ai rai yang, dai gaw ladu lai nna n shawp ai lam rai nga ai majaw, nanhte hta dai zawn re ai n nga lu u ga, shanhte masum hpe wan hta nat kau na rai mu ai.

¹⁵Dusat dumyeng hte kanawn ai wa gaw sat kau ai teng teng hkrum lu na wu ai: dai dusat hpe mung sat kau na rai mu ai.

¹⁶Numsha mung tinang hkum hta dusat dumyeng a kanawn hkam sha ai rai yang, dai numsha hte dusat gaw sat kau ai teng teng hkrum lu na rai nga ai: si ging ai yubak nga nna, sat kau ai teng teng hkrum ging ma ai.

¹⁷Masha langai ngai tinang a kawa a shayi sha, shing n rai tinang a kanu a shayi sha ngu ai tinang kajan hte jaiwawng wawng ai rai yang, dai gaw kaya kahpa lam rai nga ai majaw, shan gaw tinang a amyu masha ni a man na sumri dan kau ya ai hkrum lu na rai mu ai: kayung kajan jaiwawng wawng ai majaw tinang yubak hkrum sha lu na rai ma ai.

¹⁸Masha langai ngai nba lang ai num hte kanawn ai rai yang, dai yan gaw shada myit hkrum nna sai su ai lam shadawng shadan mu ai majaw, shan lahkawng tinang amyu hta na sumri dan kau ya ai hkrum lu na rai mu ai.

¹⁹Tinang kawa a kajan, shing n rai kanu a kanau kana hte nga sha lu na n rai: shing rai kamoi kanu ni hte nga sha ai rai yang, shan gaw tinang a yubak hkrum sha lu na rai nga ai.

²⁰Tinang a kawa di kawa doi a madu jan hte nga sha ai rai yang, kawa di kawa doi hte sha seng ai num hpe shut hpyit ai majaw, shan gaw tinang yubak hkrum sha nna kashu kasha n lu ai si htum na rai ma ai.

²¹Tinang a kahpu kanau a madu jan hte nga sha ai rai yang, dai gaw nsan n seng ai lam rai nga ai: hpunau wa hte sha seng ai num hpe shut hpyit ai majaw, shan gaw kashu kasha n lu ai nga na rai ma ai.

²²Shing rai, ngai nanhte hpe woi wa nna madu shangun ai mung gaw, nanhte hpe n nhpat kau u ga, ngai tawn da ai ga matsun yawng hte nye a tara mahkra hpe, nanhte hkan galaw lu na rai myit dai.

²³Nanhte a shawng na ngai gawt kau ai masha amyu ni a htung hking lam hkum hkan myit: shanhte gaw dai zawn re ai lam shagu hkan galaw ma ai majaw ngai shanhte hpe matsat kau mawe ai.

²⁴Dai majaw, nga chyu hte lagat jahku lwi ai shanhte a mung hpe, nanhte dagraw la na sali wunli shatai na matu nanhte hpe jaw na ngu nna ngai tsun se ai: ngai gaw nanhte hpe amyu gale ni hte jahka la ai, nanhte a Karai Kasang Yehowa rai nga nngai.

²⁵Dai re ai majaw san seng ai ashu ashan, n san n seng ai ashu ashan, san seng ai ntsa malen u, n san n seng ai u re ai ni hpe ginhka chye lu na rai myit dai: n san n seng ngu nna ngai jahka da ai ashu ashan, ntsa malen u, ga ning tsa e gumrawt hkawm ai dusat amyu re ai lama ma hte tinang hkum hpe matsat shabat di lu na n rai.

²⁶Ngai Yehowa chyoi pra nga nngai rai nna, nanhte nye a ni tai na matu, amyu kaga ni hte jahka da masade ai majaw, nye a chyoi pra ai ni nanhte tai nga lu na rai myit dai.

²⁷Myihtoi htoi ai, shing n rai gumhpan hpan ai numsha lasha kadai rai timung sat kau ai teng teng hkrum lu na rai nga ai: shing re ai wa hpe nlung hte kabai sat na rai mu ai: shing re ai ni gaw si ging ai ni rai ma ai.