Read Jinghpaw Hanson Version Bible JAW JAU 22 Bible Online

JAW JAU 22 - Jinghpaw Hanson Version Bible bible

JAW JAU 22

¹Bai Yehowa Mawshe hpe tsun wu ai gaw,

²Arun hte shi a shadang sha ni gaw, nye a shachyoi shapra ai arai ni a majaw, nye a chyoi pra ai mying ningsang hpe n jahpoi kau mu ga, Israela kashu kasha ni a la sa ai chyoi pra ai arai hte tinang hkum hpe shatsan shagang mu, ngu nna shanhte hpe tsun mu: ngai gaw Yehowa rai nga nngai.

³Nanhte a shu mashi shu masha prat dingsa hta, Yehowa a matu Israela kashu kasha ni shachyoi shapra ai chyoi pra ai arai ni hpe, tinang hkum n san n seng da ninglen sa htep ai hkinjawng gaw, nye a man e sumri dan kau ai hkrum na wu ai, ngu nna shanhte hpe tsun mu: ngai gaw Yehowa rai nga nngai.

⁴Arun a kashu kasha ni hta na manggang gang ai, ari ri ai, kadai rai timung, garai n san n seng dingsa chyoi pra ai arai ni hta sha lu na n rai. Si mang hte seng ai n seng n pra ai arai hkra ai wa, azu tung ai wa,

⁵gumrawt hkawm ai baw dusat hta na awu asin hkra ai wa, awu asin re ai lama ma kap nna wu sin nga ai wa hpe hkra hkrup ai wa,

⁶shing re ai ni gaw shana de du hkra n san n seng nga na rai ma ai: tinang hkum hpe hka garai n shin yang, chyoi pra ai rai sha lu na n rai.

⁷Jan shang jang she shi san seng wa na rai nga ai: dai hpang chyoi pra ai arai ni sha lu na rai wu ai; dai gaw shi a lusha rai nga ai.

⁸Shi hkrai si ai hte matse labye kawa sat ai si mang sha nna, tinang hkum hpe wu sin kau mai na n rai: ngai gaw Yehowa rai nga nngai.

⁹Dai rai nna, ngai hkang da ai ga hpe n jahpoi nna, tinang yubak n hkrum sha ai hte si ai n hkrum mu ga, ngai hkang da ai ga shanhte hkan nang lu na rai mu ai: shanhte hpe shachyoi shapra nga ai Yehowa ngai rai nga nngai.

¹⁰Masha tsasam kadai rai timung chyoi pra ai arai ni sha lu na n rai: hkinjawng wa kaw shingbyi nga ai manam hte nchyang wa mung sha lu na n rai.

¹¹Rai timung, hkinjawng wa shi a gumhpraw hte mari la ai wa mai sha na rai nga ai: shi a nta hta shangai ai ni gaw mai sha na rai ma ai.

¹²Hkinjawng wa a shayi sha masha tsasam jan tai ai rai yang gaw, chyoi pra ai manawt hkungga sha lu na n rai.

¹³Rai timung madu wa si nna, shing n rai la hte hka nna, kasha n kap ai, kawa a nta de bai wa ai rai yang gaw, kaji yang na zawn kawa a lusha bai sha lu na rai nga ai: masha tsasam wa chyawm gaw gaja wa sha lu na n rai.

¹⁴Masha langai ngai n dum n chye nna chyoi pra ai arai sha hkrup ai rai yang, shi sha hkrup ai chyoi pra ai arai hte nawng htam manga hta htammi hkinjawng wa hpe wa lu na rai wu ai.

¹⁵Shanhte gaw tinang hte seng ai chyoi pra ai arai ni sha yang, ari hkrum ging ai yubak n lawm na matu,

¹⁶Israela kashu kasha ni Yehowa hpe jaw jau ai chyoi pra ai arai ni hpe hkum jahpoi kau mu ga: kaning rai nme law shanhte hpe shachyoi shapra nga ai Yehowa ngai rai nga nngai, ngu wu ai.

¹⁷Bai Yehowa Mawshe hpe tsun wu ai gaw,

¹⁸Arun hte shi a shadang sha ni, Israela kashu kasha ni yawng hte hpe ning ngu tsun mu: Israela kashu kasha ni hta na rai timung, Israela amyu kaw shingbyi nga ai amyu kaga wa rai timung, ga shaka kumhpa rai yang rai, mayu kumhpa rai yang rai, wan nat ai hku Yehowa hpe jaw jau na rai yang gaw,

¹⁹hkap la ra hkra, ra n rawng ai usu rai tim, sagu la rai tim, nam la rai tim, jaw lu na rai mu ai.

²⁰Lama ma ra ai gaw jaw lu na n rai; jaw myit timung hkap la ya na n rai.

²¹Yehowa hpe mahku hkungga hku, sagu, bainam, dumsu hte ga shaka kumhpa shing n rai mayu kumhpa jau na rai yang gaw, hkap la ra hkra, hkrang hkum ai jaw lu na rai mu ai: ra ai lama mi muk rawng lu na n rai.

²²Myi hten ai, lagaw daw ai, hkum hten ai, bum akawng ai, u chyit chyit ai, nma hpye ai re ai ni gaw Yehowa hpe jaw lu na n rai; tawn hkungri ntsa e mung Yehowa a matu nat nawng lu na n rai.

²³Rai timung, hkrang shan jan ai, shing n rai hkrang n hkum ai sagu, dumsu gaw mayu hkungga jaw na mai nga ai: ga shaka hte seng ai rai yang gaw, hkap la ya na n rai.

²⁴Tawk ai, arin ai, gang je ai, gadoi kau ai rai nna dawn kau sai baw Yehowa hpe jaw lu na n rai: nanhte a mungdan hta mung, dai zawn galaw lu na n rai.

²⁵Dai baw gaw hten ai hte ra rawng sai majaw, amyu kaga ni a lata na rai timung, nanhte a Karai Kasang a lusha matu jaw lu na n rai: jaw timung hkap la ya na n rai, ngu wu ai.

²⁶Bai Yehowa Mawshe hpe tsun wu ai gaw,

²⁷Sagu bainam, dumsu ni kasha hkrat ai shaloi sanit ya laman e kanu hte jahka lu na n rai: matsat ya nhtoi kaw nna, Yehowa hpe wan hte nawng ai hkungga di na matu ram nga ai.

²⁸Dumsu hpe rai timung, sagu hpe rai timung kanu kasha nawng lani jan sha sat lu na n rai.

²⁹Yehowa hpe chyeju dum hkungga jaw jau na rai yang gaw, hkap la ra na hku jaw jau mu.

³⁰Dai shani jang sha lu na rai nga ai: hpang shani du hkra ngam da lu na n rai: ngai gaw Yehowa rai nga nngai.

³¹Dai re ai majaw nye a tara matsun ni hpe nanhte hkan nang lu na rai myit dai: ngai gaw Yehowa rai nga nngai.

³²Nye a chyoi pra ai mying ningsang hpe nanhte jahpoi kau ya lu na n rai: ngai chyoi pra nga nngai hpe, Israela kashu kasha ni dum nga lu na rai ma ai: nanhte a Karai Kasang tai na matu, Egutu mung na nanhte hpe woi shaw wa nna,

³³nanhte hpe shachyoi shapra nga ai Yehowa rai nga nngai: ngai gaw Yehowa nan rai nga nngai, ngu wu ai.