Read Jinghpaw Hanson Version Bible JAW JAU 25 Bible Online

JAW JAU 25 - Jinghpaw Hanson Version Bible bible

JAW JAU 25

¹Bai Yehowa Mawshe hpe Sina bum e tsun wu ai gaw,

²Israela kashu kasha ni hpe ning ngu tsun u, Nanhte hpe ngai jaw ai mung de nanhte du ai shaloi, dai mung gaw Yehowa a matu laban shang lu na rai nga ai.

³Kru ning tup na a yi hkauna nang galaw lu na hte na a tsabyi sun lajang nna, nsi naisi shu la na rai ndai:

⁴sanit ning nhtoi gaw, Yehowa a matu ban sa shaning, mung ting simsa nga nna, laban shang na shaning rai nga ai: dai shaning hta yi hkauna galaw lu na n rai, tsabyi sun mung lajang lu na n rai.

⁵Yi hkauna hta shi chyu tu ai nhpan pyi dan la lu na n rai: n lajang sai yi sun na asi mung di sha lu na n rai: kaning rai nme law, mung ting gaw simsa nga lu na shaning rai nga ai.

⁶Dai mung a ban sa ai shaning na shi chyu si pru ai nsi naisi gaw, nang hkum dai hte na a mayam num mayam la, na a nchyang hte manam sha na matu:

⁷na a mung hta nga ai uni uzai yawng a shahpa tai na rai nga ai.

⁸Bai, laban shaning sanit du hkra hti nhtawm, sanit ning sanit lang ngu na mali shi jahku ning hta,

⁹shata sanit a nhtoi shi ya e, nanhte pahtau dum garu shangun na rai myit dai: dai htingrai htingrat nhtoi hta, nanhte a mung ting hta pahtau dum garu shangun na rai myit dai.

¹⁰Shing rai, manga shi du ai shaning hpe nanhte shachyoi shapra nna, mung ting na mung masha nlang hpe lawt lu ahkang a lam kajai gara shana na rai myit dai; dai gaw nanhte a matu pahtau garu shaning rai nga ai; kadai mung myi na tinang a lamu ga hte myi na dum nta de bai wa lu na rai nga ai.

¹¹Dai manga shi ngu na shaning gaw nanhte a matu pahtau garu shaning rai nga ai: dai shaning hta nanhte nai mam dat lu na n rai; shi chyu tu ai nhpan pyi dan la lu na nrai; n lajang sai sun a tsabyi si mung, di sha lu na n rai.

¹²Kaning rai nme law, dai gaw pahtau garu poi shaning rai nga ai: dai gaw nanhte a matu chyoi pra nga ai; shi hkrai tu ai nhpan a asi gaw nanhte sha lu na rai myit dai.

¹³Pahtau garu shaning hta kadai mung myi na tinang a ga de bai wa na rai myit dai.

¹⁴Nanhte shada rai dut rai mari ai hta, manang hpe dip zingri lu na n rai.

¹⁵Na a manang wa a yi hkauna sun nang mari yang rai timung, shi nang hpe dut yang rai timung, bai du na pahtau garu shaning laman hpe sawn ya nna manu tawn da na rai wu ai:

¹⁶shaning naw law yang gaw law ai hku, n law yang gaw n law ai hku manu shalun shayu rai lu na rai wu ai: kaning rai nme law, nsi naisi jasi la na shaning hkan nna nsi dut ai sha rai nga ai.

¹⁷Nanhte shada map sha hkat lu na n rai; na a Karai Kasang hpe nang hkrit hkungga na rai ndai: ngai gaw nanhte a Karai Kasang Yehowa rai nga nngai.

¹⁸Shing rai, nye a ga matsun hte nye a tara ni hpe nanhte hkan shatup nga na rai myit dai. shaloi dai mungdan hta ngwipyaw ai hte nanhte nga sha lu na rai myit dai.

¹⁹Nanhte a lamu ga mung nsi naisi jasi ya nna nanhte hkru hkru kat kat sha nga let ngwipyaw ai hte nga sha lu na marin dai.

²⁰Bai nanhte gaw, Sanit ning shaning hta anhte hpa sha na ga ta? yi hkauna galaw lu ga ai n rai, nsi naisi shu la lu ai mung n rai, nga na myit dai:

²¹dai gaw, kru ning shaning hta ngai nanhte hpe shaman ya nna, dai shaning hta masum ning na matu nsi naisi shangai ya na made ai:

²²nanhte gaw matsat ning shaning hta she nli dat nna, jahku ning ngu na hta nsi naisi shu la ai du hkra, nai mam nsa sha nga lu na myit dai.

²³Lamu ga hpe tutnawng madu nga na hku dut lu na n rai: kaning rai nme law, aga gaw nye a rai nga ai: nanhte gaw ngai kaw shingbyi nga ai manam sha rai myit dai.

²⁴Nanhte aga lu la ai shara shagu hta, bai shaw bai hkrang na lam nanhte tawn da lu na rai myit dai.

²⁵Na nhpu nnau wa matsan mayan hkrum nna, shi lu ai aga kau chyen dut kau ai rai yang, shi hte ni ai kahpu kanau wa gaw dut kau sai rai hpe hkrang shaw karum na rai wu ai.

²⁶Dai hpe hkrang shaw karum lu ai masha n nga nna, ga dut ai wa shi nan gumhpraw lu ai hte hkrang shaw lu ai rai yang gaw:

²⁷myi na ga bai lu la na matu, dut kau ai shaning kaw nna, lai mat sai shaning ni hpe hti la nhtawm, naw ra ai shaning a jahpu hte mari ai wa hpe bai hkin ya na rai wu ai.

²⁸Bai n shaw la lu sayang gaw, pahtau garu shaning du hkra mari ai wa a lata hta naw nga nga na rai nga ai: dai pahtau garu shaning hta chyawm gaw myi na madu nsa hpe bai dat ya na rai wu ai.

²⁹Masha langai ngai bunghku kum ai mare na nta hpe dut kau ai rai yang, dut kau ai hpang laning mi na laman hta shaw hkrang la lu na ahkang naw da na rai nga ai.

³⁰Dai shaning laman e n shaw la lu sayang gaw, bunghku kum ai mare na nta dai gaw mari ai wa hte shi a kashu kasha prat dingsa madu nga na rai mu ai: pahtau garu shaning du timung dat ya na n rai.

³¹Bunghku n kum ai kahtawng hkan na nta chyawm gaw yi hkauna ga hpe zawn bai shaw lu na rai nga ai: pahtau garu shaning du yang mung dat ya lu na rai nga ai.

³²Rai timung, Lewi amyu ni madu ai mare hte nta ni gaw galoi rai timung hkrang shaw lu na rai nga ai.

³³Lewi amyu a mare hta na nta hpe masha wa mari ai rai yang, pahtau garu shaning du jang, dat ya lu na rai wu ai: kaning rai nme law, Israela kashu kasha ni hta Lewi amyu a matu gaw mare na nta ni sha rai malu ai.

³⁴Dai rai timung Lewi amyu a mare ginwang na yi hkauna gaw dut kau lu na n rai: dai gaw tutnawng shanhte madu nga na rai nga ai.

³⁵Na a hpunau matsan jaren hkrum nna n-gun htum mat yang, nang shi hpe shadaw na rai ndai: amyu kaga shingbyi manam hpe zawn nang shi hpe woi lahku nga na rai ndai.

³⁶Shi hta atu amyat la lu na n rai; na a hpunau wa nang kaw nga lu hkra, na a Karai Kasang hpe hkrit hkungga nga u.

³⁷Gumhpraw rai timung, shahpa rai timung hkoi ya yang, atu amyat lu la na hkum myit et.

³⁸Ngai gaw nanhte hpe Hkanan mung jaw nna, nanhte a Karai Kasang tai na matu, nanhte hpe Egutu mung na woi shaw wa ai nanhte a Karai Kasang Yehowa rai nga nngai.

³⁹Bai, na a hpunau wa matsan jaren hkrum nna, shi hkum nang kaw sa dut yang, shangun mayam hpe zawn shi hpe dip yam lu na n rai.

⁴⁰Nchyang wa hte shingbyi manam zawn nang kaw nga nga nna, pahtau garu shaning du hkra nang hpe galaw jaw na rai wu ai.

⁴¹Dai shaning du jang shi gaw kashu kasha ni hte rau pru nna, myi na kanu kawa nta hte kaji kawa ni a lamu ga de bai wa na rai lu ai.

⁴²Kaning rai nme law, shanhte gaw Egutu mung na ngai shaw wa ai nye a shangun ma ni rai nga ma ai: mayam hpe zawn shanhte hpe dut lu na n rai.

⁴³Nang shanhte hpe aja awa byeng sha lu na n rai; na a Karai Kasang hpe hkrit hkungga na rai ndai.

⁴⁴Nang ya sha lu na mayam num mayam la rai yang gaw, na a grup yin na tara maigan masha ni kaw na mari lu na rai ndai.

⁴⁵Dai hta kaga nanhte kaw sa shingbyi nga ai tsasam masha ni kashu kasha ni rai timung, nanhte a mung e shanhte shaprat ai kashu kasha ni hpe rai timung, nang mari yam na rai ndai: nanhte shanhte hpe madu lu na rai.

⁴⁶Shanhte hta yam jat jat wa yang mung, nanhte hte nanhte a kashu kasha ni a sali wunli shatai nna yam sha na rai myit dai: shanhte hpe nanhte prat dingsa yam sha na rai myit dai; rai timung, tinang a hpunau ngu ai Israela kashu kasha ni hta na rai yang gaw nanhte shada aja awa byeng sha lu na n rai.

⁴⁷Nang kaw sa shingbyi nga ai tsasam manam wa gaw lu su nga mai nna, shi a makau e nga ai na a hpunau wa mahtang matsan chyaren hkrum nna, dai shingbyi nga ai tsasam wa kaw, shing n rai shi a baw sang ni kaw tinang hkum sa dut kau ai rai yang;

⁴⁸dut ngut ai hpang bai hkrang shaw lu ai ahkang da na rai nga ai: shi kahpu kanau langai ngai shi hpe hkrang shaw lu na rai nga ai;

⁴⁹kahpu kanau n lu yang, kawa doi kawa di, lawu lahta hpunau, shi hte ni ai kadai rai timung hkrang shaw lu na rai nga ai: dai laman shi sharai lu nna shi hkum dai hkarang shaw lu yang mung, hkrang shaw lu na rai wu ai.

⁵⁰Madu tai ai wa hte mayam ngu na wa gaw shi hkum dut ai shaning kaw nna pahtau garu shaning du hkra na laman hpe sawn yu nna gade ning rai yang gade ning a matu manu tawn da na rai nga ai: nchyang galaw ai nhtoi hku sawn nna tinang hku manu byat na rai wu ai.

⁵¹Galaw jaw na shaning naw law yang gaw, law ai hku sawn nna, tinang hkum jahpu hpe myi na lu la ai arang hta na daw wa na rai wu ai.

⁵²Pahtau garu shaning ni sai rai yang gaw, ni ai hku sawn nna, daw wa na rai wu ai: naw ngam ai shaning sawn nna tinang hkum a hkrang shaw la jahpu daw wa na rai wu ai.

⁵³Dai wa gaw, laning mi hte laning mi na nchyang zawn rai na rai nga ai: madu gaw na a man e dai wa hpe aja awa byeng lu na n rai.

⁵⁴Dai hku n hkrang n shaw lu yang gaw, pahtau garu shaning du yang, shi hte shi a kashu kasha ni lawt wa lu na rai ma ai.

⁵⁵Kaning rai nme law, Israela kashu kasha ni gaw nye a shangun ma ni rai nga ma ai; Egutu mung na ngai shaw wa ai, nye a shangun ma ni shanhte rai nga ma ai: nanhte a Karai Kasang Yehowa ngai rai nga nngai.