Read Jinghpaw Hanson Version Bible JAW JAU 26 Bible Online

JAW JAU 26 - Jinghpaw Hanson Version Bible bible

JAW JAU 26

¹Nanhte gaw tinang a matu sumla galaw lu na n rai; tawk ai sumla rai timung, nlung hpun du rai timung, shadun tawn lu na n rai; nawku na matu sumla kap ai nlung nanhte a mung hta shadun tawn lu na n rai: kaning rai nme law, ngai gaw nanhte a Karai Kasang Yehowa rai nngai.

²Nye a laban nhtoi ni hpe nanhte matsing nna, nye a chyoi pra ai nta hpe hkungga lara na rai myit dai: ngai gaw Yehowa rai nga nngai.

³Nanhte nye a ga matsun hkan nang nna ngai hkang da ai lam hkan shatup myit yang gaw,

⁴shi ten du yang ngai nanhte a matu lamu marang jahtu nna, nanhte a lamu ga gaw nsi naisi shakat ya nna, sun na namsi hpun ni asi si na mara ai.

⁵Mam kabye ai ten gaw tsabyi si shup ai ten du hkra, tsabyi si shup ai ten gaw mam dan ai ten du hkra hkap na ra ai: shing rai nanhte hkru hkru kat kat sha lu ai hte, tinang a mungdan hta ngwipyaw let nga lu na marin dai.

⁶Nanhte a mungdan hta hpyen majan ngai shasim ya nna, jahkrit shama ai wa n nga ai sha myit mu let yup lu na marin dai: n hkru ai matse labye mung ngai yeng kau ya nna, nanhte a mung ri nhtu hta na lawt na ra ai.

⁷Masha bu hpyen ni hpe nanhte jahtaw kau lu nna, nanhte a ri nhtu hta shanhte kadawng ma na mara ai.

⁸Nanhte hta na marai manga gaw hpyen latsa hpe jahtaw lu na ra ai; marai latsa gaw mun mi hpe jahtaw kau lu nna, nanhte a ri nhtu hta hpyen ni kadawng mat na mara ai.

⁹Ngai nanhte hpe sha-awng nna mayat maya shangun na hte shalaw jahtam na made ai; nanhte hte na ga shaka hpe mung ngai shagrin na we ai.

¹⁰Nanhte na na wa htun da ai mam nsa sha nna, garai n ma ai hta mam ningnan kahtap ai majaw nsa hpe htawk kau na marin dai.

¹¹Ngai nanhte hpe n matsat ai sha, nye a nawku sum nanhte hta tawn da na we ai.

¹²Nanhte hta ngai rau hkawm rau sa nna, nanhte a Karai Kasang tai na nngai; nanhte mung nye a amyu tai na marin dai.

¹³Egutu masha ni a mayam tai nga ai kaw na lawt lu hkra, Egutu mung na nanhte hpe woi shapraw ai, nanhte a Karai Kasang Yehowa ngai rai nga nngai: nanhte a hkapgan ngai daw kau ya nna, nanhte hpe jan rai tsap shangun masade ai.

¹⁴Dai n rai nanhte mahtang nye a ga n madat nna, ngai hkang da mada hpe n hkan galaw ai sha,

¹⁵nye a ga matsun hpe lale nna, ngai tawn da ai ga shaka sharun na, ngai hkang da ai lam ni hpe n gawn n sawn re ai hte nye a tara lam ni hpe matsat kau myit yang;

¹⁶nanhte hpe ngai di na lam gaw, nanhte a myi man jasum na hte minla byaw mat ai jahkrum na, hkrit kajawng ai, mang shakrwi krawi ai, a li awaw waw ai ana ngai nanhte a ntsa e dat dat na we ai: nanhte dat ai nli mung kaman rai mat na malit dai; hpyen ni gaw nanhte a nsi naisi shu sha na maru ai.

¹⁷Nanhte hpe ngai maza nna, hpyen ni a man e jasum na made ai: nanhte hpe n dawng n yawt ai ni a byeng sha ai nanhte hkrum nna, kadai n shachyut timung hprawng na marin dai.

¹⁸Dai hte hkrum sha timung nye a ga n madat ai naw nga myit yang gaw, yubak htam sanit naw kahtap jaw na made ai.

¹⁹Nanhte a gumrawng kawng ngai daw kau ya na made ai: lamu hpe hpri zawn aga hpe makri zawn ngai shaja kau nna,

²⁰nanhte kaman lila n-gun dat na myit dai; kaning rai nme law, nanhte a lamu ga gaw nsi naisi shakat ya na ra ai n rai; namsi hpun ni mung asi si jaw na n rai.

²¹Nanhte nye a ga n madat ai, ngai hte nhtan shai myit yang gaw, nanhte a mara hte maren ari zinli htam sanit ngai nanhte a ntsa e dat dat na we ai.

²²Nanhte a kashu kasha ni hpe la sha mat wa nna, nanhte a yamnga ni hpe shagrawm kau na hte, nanhte hpe shayawm kau na matu nam na matse labye ni hpe ngai dat dat nna, nanhte sa na hkrun lam ni katsi mat shajang na ra ai.

²³Dai hte hkrum sha timung myit malai n lu ai sha ngai hte nhtan naw shai myit yang gaw,

²⁴ngai mung nanhte hte nhtan jashai nna, nanhte a mara majaw ari htam sanit naw jaw na made ai.

²⁵Nye a ga shaka maga de nga nna nanhte hpe deng na ri nhtu, nanhte a ntsa de ngai shangun dat na we ai: nanhte a mare kata hkan e nanhte shinggyin rawng yang, dai hta ari zinli ngai shangun dat nna hpyen ni a lata de ap kau na made ai.

²⁶Nanhte hpe shadaw ai shat lusha ngai dawm kau ya made yang, numsha marai shi ting wan mang langai mi hta sha nanhte a muk kabaw nhtawm, joi hte shen nna nanhte hpe karan jaw na ra ai: nanhte sha timung kan du na n rai.

²⁷Dai hte wa hkrum sha timung, nye a ga n madat ai, ngai hte nhtan naw shai myit yang gaw,

²⁸ngai nanhte hpe pawt ai hte nhtan shai ai hku galaw nna, nanhte a mara majaw ari htam sanit naw jaw na made ai.

²⁹Nanhte gaw tinang a kasha ni a shan sha ai kaw du na marin dai.

³⁰Nanhte a Tsaw ai shara ni hpe ngai run kau ya nna, nanhte a jan hpara sumla ni hpe kran daw kau ya let, nanhte a sumla ni a ntsa e, nanhte a si mang ni hpe kabai mara kau na we ai: nye a myit masin mung nanhte hpe matsat kau na we ai.

³¹Nanhte a mare ni hpe ngai nam shatai nna, nanhte a nawku nta ni hpe akrin atsai hpya kau na we ai: nanhte a manam pyaw sangau mung ngai manam ya na n rai.

³²Mung ting hpe ngai akrin atsai di aku nna, dai yang sa nga nga ai nanhte a hpyen ni pyi dai lam mau mahka nga na mara ai.

³³Maigan amyu ni hta ngai nanhte hpe shabra kau nna, nhtu shada lang let hkan shachyut na made ai: nanhte a mung gaw akrin atsai rai mat nna, nanhte a mare ni mung nam tai mat na ra ai.

³⁴Shing rai nanhte hpe hpyen ai ni a ga e nanhte nga nga ai laman e, nanhte a dai daw ga gaw a katsi katsang rai mat ai nhtoi hte ting simsa nga nna tinang a laban nhtoi hta pyaw nga lu na ra ai.

³⁵Nanhte nga nga ai hte yang, tinang a laban nhtoi ni hta n ban n sa lu ai, nanhte a dai daw ga gaw, ya a katsi katsang rai mat ai nhtoi hte ting hta ban sa lu na ra ai.

³⁶Shanhte hta na hpyen ga e naw ngam nga ai ni a myit masin hta hkrit kajawng ai myit ngai bang ya nna, lahpraw lahpra shara ai hte sha shanhte kajawng nna, ri nhtu e hprawng ai zawn hprawng na mara ai: kadai n shachyut timung shanhte kataw na mara ai.

³⁷Shachyut ai masha kata kaw ri nhtu e hprawng ai zawn, langai a ntsa e langai kataw kahtap na mara ai; hpyen ni a man e dakan lu ai n-gun kaji mi muk rawng na n rai.

³⁸Maigan amyu ni hta nanhte sum mat nna, tsasam mungdan ni gaw nanhte hpe mayu kau na mara ai.

³⁹Nanhte hta naw ngam nga ai ni gaw nanhte hpe hpyen ai ni a mung e tinang a yubak hta yawm si ma na mara ai; tinang a kaji kawa ni a yubak majaw mung yawm si ma na mara ai.

⁴⁰Shaloi shanhte tinang a yubak hpe mung, tinang a kaji kawa ni a yubak hpe mung, shanhte ngai hte nhtan shai ai hku galaw nna, nye a tara hpe tawt lai ai hku galaw nna, nye a tara hpe tawt lai ai majaw,

⁴¹ngai mung shanhte hte nhtan shai nna, masha tsasam a mung de sa kau ai hpe mung, dum nna yin la na mara ai: shing rai, shanhte a matu n gadoi ai myit hpe shagrit nna, ngai jahkrum ai ari hpe yin la ma yang gaw,

⁴²ngai mung Yaku hte, Isak hte, Abraham hte tawn da ai ga shaka hpe ngai dum na we ai; dai mungdan hpe mung ngai dum na we ai;

⁴³dai mungdan gaw shanhte a lata na lawt nna shanhte n nga ai hte a katsi katsang rai nga ai hte yang, tinang a laban nhtoi ni hta pyaw nga na ra ai: shanhte nye a ga matsun ni hpe kau da nna, shanhte a myit hta nye a hkang da ai tara ni hpe matsat kau ai mara a majaw, tinang hkrum sha ai ari hpe shanhte yin la lu na mara ai.

⁴⁴Rai timung, shanhte hte majan ai ni a ga e nga nga yang, matu htum hkra shanhte hpe jahtum kau nna, shanhte hte ngai tawn da ai ga shaka run kau ai kaw du hkra wa shanhte hpe ngai kau rap di na n rai; dai hte wa shanhte hpe matsat kau na n rai: kaning rai nme law, shanhte a Karai Kasang Yehowa gaw ngai rai nga nngai.

⁴⁵Shanhte a Karai Kasang tai na ngu nna, maigan amyu ni a man e Egutu mung kaw nna ngai woi shaw wa ai shanhte a kaji kawoi ni hte ngai tawn da ai ga shaka hpe, shanhte matu ngai dum na we ai; ngai gaw Yehowa rai nga nngai, ngu wu ai.

⁴⁶Dai hte gaw, Sina bum e Mawshe a lata hta Yehowa gaw shi hkum nan hte Israela kashu kasha ni a lapran e tawn da ai matsun maroi ga ni, hkang da ai ga ni hte jep ai tara ni rai nga ai.