Read Jinghpaw Hanson Version Bible JAW JAU 27 Bible Online

JAW JAU 27 - Jinghpaw Hanson Version Bible bible

JAW JAU 27

¹Bai Yehowa Mawshe hpe tsun wu ai gaw,

²Israela kashu kasha ni hpe ning ngu tsun u: Kadai rai timung ga shaka da ai hte jaw jau ai rai yang, nang tawn da ai manu hte maren, dai wa gaw Yehowa a gun rai tai na rai nga ai.

³Gade de hku tawn da na gaw: lasha rai yang, asak hkun ning kaw nna kru shi ning lapran na ni hpe, nawku nta na joi hku hkan nna gumhpraw shekela manga shi manu tawn na rai ndai:

⁴numsha rai yang gaw, shekela sumshi manu tawn na rai ndai.

⁵Manga ning kaw nna hkun ning lapran na ni hpe gaw, lasha rai yang shekela hkun, numsha rai yang shekela shi, manu tawn na rai ndai.

⁶Shata mi kaw nna manga ning lapran na ni hpe, lasha rai yang shekela manga, numsha rai yang shekela masum manu tawn na rai ndai.

⁷Kru shi ning lai sai rai yang gaw, lasha hpe shekela shi manga, numsha hpe shekela shi, manu tawn na rai ndai.

⁸Nang tawn ai manu hku n dang hkan ai wa hpe gaw, hkinjawng wa hpang de sa dat nna, hkinjawng wa gaw shi a manu tawn ya na rai wu ai: ga shaka da ai wa shi dang lu ai made hkinjawng wa sawn yu nna tawn ya na rai wu ai.

⁹Yehowa hpe yamnga hkungga jaw ai rai yang, jaw majaw gaw Yehowa a matu chyoi pra sai rai nga ai.

¹⁰Tsawm ai a matu rai timung, n tsawm ai a matu rai timung, langai mi a malai langai mi hte galai lu na n rai: gaja wa galai na rai yang gaw, dai yamnga lahkawng yan hpe chyoi pra ai ngu na rai nga ai.

¹¹Yehowa hpe n jau mai ai, n san n seng ai baw yamnga rai yang gaw, hkinjawng wa hpe sa madun nna,

¹²tsawm yang tsawm ai hku, n tsawm yang n tsawm ai hku manu tawn na rai wu ai: hkinjawng wa manu tawn ai hte maren, manu daw na rai nga ai.

¹³Dai yamnga hpe hkrang la mayu yang gaw, myi tawn ai manu hta share run htam manga hta na htammi jat jaw na rai wu ai.

¹⁴Masha langai ngai tinang a nta hpe Yehowa a matu shachyoi shapra da ai rai yang, hkinjawng wa yu yu nna, hkik yang hkik ai hku, n hkik yang n hkik ai hku manu tawn na rai wu ai: hkinjawng wa tawn ai hte maren manu daw na rai nga ai.

¹⁵Dai hpe shachyoi shapra ai wa bai hkrang la mayu yang gaw, myi tawn ai manu hta share run htam manga hta htammi jat jaw nna, tinang a nta bai la na rai wu ai.

¹⁶Masha langai ngai tinang a yi hkauna hpe Yehowa a matu shachyoi shapra ai rai yang, muk-yaw mam gat lu ai shadang hkan nna, manu tawn na rai ndai: nli homa mi shang ai yi hkauna hpe shekela manga shi manu tawn na rai ndai.

¹⁷Pahtau garu ai shaning kaw nna shachyoi shapra ai rai yang gaw, manu dai hku daw na rai nga ai.

¹⁸Pahtau garu shaning lai ai hpang e she tinang a yi hkauna hpe shachyoi shapra ai rai yang gaw, hkinjawng wa sawn yu nna, bai du na pahtau garu shaning a laman na shaning nhtoi ni hpe hti la nhtawm, daw nga sai manu hta shayawm nna tawn ya na rai wu ai.

¹⁹Dai hpe shachyoi shapra ai wa bai hkrang la mayu yang gaw, myi tawn ai manu hta share run htam manga hta htammi jat nna, tinang a yi hkauna bai madu na rai wu ai.

²⁰Shing n rai, n shaw n hkrang mayu ai rai yang mung, masha kaga hpe dut kau ai rai yang mung, yi hkauna dai hpe galoi mung hkrang la lu na n rai:

²¹pahtau garu shaning du yang, yi hkauna dai gaw san da ai rai zawn Yehowa matu chyoi pra nga ai rai nna, dai gaw hkinjawng wa a yi hkauna tai na rai nga ai.

²²Tinang madu a n re ai, mari la ai yi hkauna hpe Yehowa a matu shachyoi shapra ai rai yang,

²³hkinjawng wa gaw pahtau garu shaning du hkra na nhtoi hti yu nna, manu tawn na rai wu ai: ndai gaw Yehowa a matu chyoi pra ai arai re ai ngu nna, dai shani jang manu tawn na rai wu ai.

²⁴Pahtau garu shaning du yang, yi hkauna dai gaw nnan shawng dut ai madu bai la lu na rai wu ai.

²⁵Manu tawn shagu nawku nta a shekela hkan nna tawn na rai wu ai; shekela langai mi gaw gera hkun rai nga ai.

²⁶Yamnga hta na Yehowa a matu tawn sai alat hpe kadai mung shachyoi shapra san da lu na n rai: dumsu rai timung, sagu bainam rai timung, Yehowa a chyalu rai nga ai.

²⁷N san n seng ai baw yamnga rai yang gaw manu tawn ai hte maren hkrang la nna htam manga hta htammi mung jat jaw na rai wu ai: n hkrang mayu yang gaw tawn ai manu hte dut na rai wu ai.

²⁸Rai timung, Yehowa hpe dagam ai hte san da kau sai, masha, yamnga, yi hkauna re ai hpa hpe mung, bai dut bai hkrang la lu na n rai: shing rai san da sai arai hpa rai timung Yehowa a matu chyoi pra htum ai rai nga ai.

²⁹Masha nan rai timung dagam ai hte san da kau sai gaw bai hkrang la lu na n rai: teng teng sat kau lu na rai wu ai.

³⁰Nai mam rai timung, namsi namsaw rai timung, ga hta nna ngai ai nsi naisi yawng a htamshi hta htammi gaw, Yehowa a jahkawn rai nga ai: dai gaw Yehowa a matu chyoi pra nga ai rai nga ai.

³¹Dai htamshi hta na htammi hpe hpa hpa hkrang la mayu yang gaw, de a manu hte htam manga hta htammi jat jaw na rai wu ai.

³²Dumsu rai timung, sagu bainam rai timung, shingna npu na lai wa ai yamnga ngu ai baw hta na, htamshi hta na htammi gaw Yehowa a matu chyoi pra ai rai na, rai nga ai.

³³Tsawm ai n tsawm ai nga nna gawn lu na n rai; langai mi a matu langai mi galai lu na n rai: galai mayu yang gaw lahkawng yan chyoi pra ai rai na rai nga ai: hkrang hkrang gaw, hkrang la lu na n rai, ngu wu ai.

³⁴Dai hte gaw Sina bum e Mawshe a lata hte, Israela kashu kasha ni a matu Yehowa jaw da ai hkang da ai ga ni rai nga ai.