Read Jinghpaw Hanson Version Bible JAW JAU 3 Bible Online

JAW JAU 3 - Jinghpaw Hanson Version Bible bible

JAW JAU 3

¹Bai shi a kumhpa dai, dumsu hte mahku hkungga di na rai yang gaw, ra n rawng ai ala shing n rai ayi. Yehowa a man e sa jaw na rai wu ai.

²Shi a hkungga a baw hta tinang a lata mara nhtawm, shawa sum a chyinghka makau e sat na rai nna, Arun a shadang sha hkinjawng ni gaw, de a asai hpe tawn hkungri ntsa grup lapri na rai mu ai.

³Bai shi gaw, Yehowa man e wan hte nawng ai mahku hkungga shatai na, sau rap hte pu kan hta na sau yawng,

⁴mashi marung hta kap ai nhkyun tawng lahkawng hte dai hta kap ai sau, nhkyun tawng yan hte nawng sin hta kap ai sap sanap re ai ni hpe shaw la ngut jang,

⁵Arun a shadang sha ni gaw dai hpe tawn hkungri na wan mang e nat da ai wan nat hkungga hta nat shalawm na rai mu ai: dai gaw Yehowa hpe wan hte nat nawng ai manam pyaw sangau rai nga ai.

⁶Bai shi a kumhpa dai, Yehowa hpe sagu bainam hte mahku hkungga di na rai yang gaw, ra n rawng ai ala, shing n rai ayi, jaw na rai wu ai.

⁷Shi a kumhpa sagu kasha rai yang gaw, Yehowa a man de dai hpe sa jaw na rai wu ai.

⁸Shi jaw ai hkungga a baw hta tinang a lata mara nhtawm, shawa sum a man e sat nna, Arun a shadang sha ni gaw de a sai hpe tawn hkungri ntsa grup lapri na rai mu ai.

⁹Bai shi gaw Yehowa a man e wan hte nawng ai mahku hkungga shatai na, de a sau man hte marung tawng matu nna daw la ai sau tawng nmai; sau rap hte pu kan hta na sau yawng;

¹⁰mashi marung hta kap ai nhkyun tawng lahkawng hte dai hta kap ai sau; nhkyun tawng yan hte nawng sin hta kap ai sap sanap re ai ni hpe shaw la ngut jang,

¹¹hkinjawng wa gaw dai hpe tawn hkungri hta nat na rai wu ai: dai gaw Yehowa a matu wan hte nat nawng ai lusha kumhpa rai nga ai.

¹²Shi a kumhpa bainam rai yang gaw, Yehowa man de dai hpe sa jaw na rai wu ai;

¹³de a baw hta shi a lata mara nhtawm, shawa sum a man e sat na rai wu ai: Arun a shadang sha ni gaw de a sai hpe tawn hkungri ntsa grup lapri na rai mu ai.

¹⁴Bai shi gaw Yehowa hpe wan hte nawng ai hkungga di na matu, sau rap hte pu kan hta na sau yawng;

¹⁵mashi marung hta kap ai nhkyun tawng lahkawng hte dai hta kap ai sau; nhkyun tawng yan hte nawng sin hta kap ai sap sanap re ai ni hpe shaw la ngut jang,

¹⁶hkinjawng wa gaw dai hpe tawn hkungri hta nat na rai wu ai: dai gaw manam pyaw sangau hku wan hte nawng ai shahpa kumhpa rai nga ai: sau yawng gaw Yehowa a matu hkrai rai nga ai.

¹⁷Nanhte gaw sau man rai timung, asai rai timung, n sha lu na rai myit dai; dai gaw nanhte a nga shara shagu hta, shu mashi shu masha prat dingsa na htani htana ga matsun rai malit dai, ngu wu ai.