Read Jinghpaw Hanson Version Bible JAW JAU 4 Bible Online

JAW JAU 4 - Jinghpaw Hanson Version Bible bible

JAW JAU 4

¹Bai, Yehowa gaw Mawshe hpe,

²Israela kashu kasha ni e ning ngu tsun u: Masha langai ngai Yehowa hkang da ai lam lama ma hta n dum shami tawt lai nna, n di mai ai amu galaw hkrup yang na lam gaw:

³Namman chya hkam sai hkinjawng wa nan, shawa masha ni hta mara kap hkra, shut hpyit tawt lai kau ai rai yang, shi shut hpyit ai lam a matu htingrai hkungga di na, Yehowa kaw ra n rawng ai usu uram sa jaw na rai wu ai.

⁴Dai usu uram hpe shawa sum chyinghka makau, Yehowa a man de la sa nhtawm, dai usu a baw hta shi a lata mara nna Yehowa man e sat na rai wu ai.

⁵Shaloi namman chya hkam sai hkinjawng wa gaw, de a sai hpe shawa sum de la shang nna,

⁶sai dai hta hkinjawng wa gaw shi a layung kapruk la nhtawm, chyoi pra ai shara a nba shinggang shinggan, Yehowa a man e sanit lang lapri na rai wu ai.

⁷Bai hkinjawng wa gaw, dai sai hta na, shawa sum kata Yehowa a man na manam pyaw nat ai hkungri a nrung ni hta chya na rai wu ai: ngam ai asai yawng hpe gaw, shawa sum chyinghka ang na wan nat hkungri a lagaw ninghpang e ru hkaw na rai wu ai.

⁸Mahku hkungga di ai usu a sau la ai zawn, htingrai hkungga usu a sau rap hte pu kan hta na kap ai sau yawng;

⁹mashi marung hta kap ai nhkyun tawng lahkawng hte dai hta kap ai sau;

¹⁰nhkyun tawng yan hte nawng sin hta kap ai sap sanap re ai usu a sau yawng la nna, wan nat hkungri hta hkinjawng wa gaw dai hpe nat na rai wu ai.

¹¹Dai usu a ahpyi, ashan, abaw, lagaw, apu akan hte ahkyi re ai, nga hkum ting hpe gaw,

¹²dap shinggan na adap sa ru kau kau re ai shara asan de la sa nhtawm, hpun shingjawm nna nat kau na rai wu ai: wan dap ru kau kau re ai shara e dai hpe nat kau na rai wu ai.

¹³Bai Israela a shawa hpung nlang hte, Yehowa hkum da ai n galaw mai ai lam lama ma hta shut hpyit tawt lai hkrup nna, shanhte n dum n mi timung mara rawng nga ai rai yang;

¹⁴shanhte shut ai lam dan pru ai shaloi e, htingrai hkungga di na matu, shawa hpung gaw usu uram langai mi shapraw nna shawa sum a man e la sa na rai mu ai.

¹⁵Shawa hpung na agyi salang ni gaw, Yehowa a man e shanhte a lata dai usu a baw hta mara nna, dai usu hpe Yehowa a man e sat na rai mu ai.

¹⁶Shaloi namman chya hkam ai hkinjawng wa gaw dai usu sai hpe shawa sum de la shang nna,

¹⁷sai dai hta hkinjawng wa gaw shi a layung kapruk la nhtawm, nba shinggang shinggan Yehowa a man e sanit lang lapri na rai wu ai.

¹⁸Bai hkinjawng wa gaw dai sai hta na shawa sum kata Yehowa a man na hkungri a nrung ni hta chya na rai wu ai: ngam ai asai yawng hpe gaw shawa sum chyinghka ang na wan nat hkungri a lagaw ninghpang e ru hkaw na rai wu ai.

¹⁹Dai usu a asau mahkra shi la nna, hkungri hta nat na rai wu ai.

²⁰Usu dai hpe shing di hkinjawng na rai wu ai; htingrai hkungga usu hkinjawng ai hku, dai hpe hkinjawng na rai wu ai; shing di shanhte a matu hkinjawng wa htingrai htingrat ya na rai nna, shanhte mara raw dat kau ya ai hkrum na mara ai.

²¹Shawng na usu hpe nat kau ai zawn, dai hpe mung dap shinggan de la sa nna nat kau na rai wu ai: dai gaw shawa hpung a matu htingrai hkungga rai nga ai.

²²Bai, du gyi wa rai timung, shi a Karai Kasang Yehowa hkum da ai lam langai ngai hta n dum shami shut hpyit tawt lai hkrup nna, mara rawng ai rai yang,

²³shi shut ai lam bai dum jang, shi a kumhpa a matu ra n rawng ai nam la langai mi sa jaw na rai wu ai.

²⁴Dai nam la a baw hta shi a lata shi mara nna, Yehowa a man na wan nat hkungga sat ai shara e sat na rai wu ai: dai gaw htingrai hkungga rai nga ai.

²⁵Shaloi hkinjawng wa gaw dai htingrai hkungga asai hpe shi a layung hte mahkai la nna, wan nat hkungri a nrung ni hta chya na rai wu ai: ngam ai hpe gaw wan nat hkungri a lagaw nhpang e ru hkaw na rai wu ai.

²⁶De a asau yawng hpe shi la nna, mahku hkungga a sau nawng ai hku tawn hkungri hta nat na rai wu ai: shing rai hkinjawng wa gaw shi a yubak a matu htingrai htingrat ya na rai nna shi mara raw dat kau ya ai hkrum na ra ai.

²⁷Yu maya masha langai ngai, Yehowa hkum da ai lam lama ma hta n dum shami shut hpyit tawt lai hkrup nna mara rawng ai rai yang,

²⁸shi shut ai lam chye lu jang, dai yubak a matu kumhpa di na ra n rawng ai nam yi sa jaw na rai wu ai.

²⁹Dai htingrai hkungga a baw hta shi a lata shi mara nna wan nat hkungga sat ai shara e dai hpe sat na rai wu ai.

³⁰Shaloi hkinjawng wa gaw de a asai hpe layung hte mahkai la nna tawn hkungri a nrung ni hta chya na rai wu ai: ngam ai asai yawng hpe gaw tawn hkungri a lagaw ninghpang e ru hkaw na rai wu ai.

³¹Mahku hkungga a sau la ai zawn, de a sau yawng shi la nna, Yehowa manam pyaw na matu hkinjawng wa gaw tawn hkungri hta dai hpe nat na rai wu ai: shing rai hkinjawng wa gaw shi a matu htingrai htingrat ya na rai nna, shi gaw yubak raw dat kau ya ai hkrum na ra ai.

³²Sagu kasha hte htingrai hkungga jaw mayu yang gaw ra n rawng ai ayi la sa na rai wu ai.

³³Htingrai hkungga, de a baw hta shi a lata shi mara nna wan nat hkungga sat ai shara e htingrai hkungga ngu nna sat na rai wu ai.

³⁴Shaloi hkinjawng wa gaw dai htingrai hkungga sai hpe shi a layung hte mahkai la nna, wan nat hkungri a nrung ni hta chya na rai wu ai: ngam ai sai hpe gaw tawn hkungri a lagaw nhpang e ru hkaw na rai wu ai.

³⁵Mahku hkungga a sagu kasha a sau shaw la ai zawn de a sau yawng hpe shi shaw la nna, hkinjawng wa gaw Yehowa hpe wan hte nat nawng ai kumhpa hte rau tawn hkungri hta nat na rai wu ai: shing rai hkinjawng wa gaw shi shut ai mara a matu htingrai htingrat ya na rai nna, shi gaw mara raw dat kau ya ai hkrum na ra ai.