Read Jinghpaw Hanson Version Bible JAW JAU 5 Bible Online

JAW JAU 5 - Jinghpaw Hanson Version Bible bible

JAW JAU 5

¹Masha langai ngai sakse hkam ai wa rai da ninglen, dagam ya ai ga madat la nhtawm, mu ai chye ai hte n tsun ai majaw shut yang, shi mara lu nu ai.

²Bai, masha langai ngai n san n seng ai ashu ashan a si mang rai timung, n san n seng ai yamnga a si mang rai timung, n san n seng ai gumrawt hkawm ai baw a si mang hpe rai timung n dum shami hkra kau nna n san n seng rai mat yang, shi mara lu nu ai.

³Bai, shinggyim masha hta kap ai n san n seng ai hpa hpe rai timung n dum shami hkra kau nna, dai hpe bai chye jang shi mara lu nu ai.

⁴Bai masha langai ngai, shing di na nga nna, kaja ai amu n kaja ai amu a lam n myit yu ai sha, dagam ai hte ga shaka da kau nna, dai hpe hpang e bai dum jang, shing rai dagam ga shaka ai lam ni hta shut ai rawng nga la yang gaw shi mara lu nu ai.

⁵Shing re ai baw mara lu ai hkrum yang dai mara ni a matu hpyi nem tawngban lu na rai wu ai:

⁶dai shut kau sai mara a matu yubak raw ai hkungga di na, sagu yi kasha, shing n rai bainam yi kasha la sa nna, Yehowa a man de yubak raw ai hkungga matu sa jaw lu na rai wu ai; shing rai hkinjawng wa gaw, dai wa a mara matu htingrai htingrat ya na rai wu ai.

⁷Sagu kasha jaw na n lu jang gaw, dai shut ai mara a matu, yubak raw ai hkungga di na langai mi, wan nat hkungga di na langai mi di nna, hkrudu kasha lahkawng, shing n rai u ra kasha lahkawng Yehowa a man de la sa lu na rai wu ai.

⁸Dai hpe hkinjawng wa kaw shi la sa nna, hkinjawng wa gaw mara raw ai hkungga mahtang, shawng nawng ya na rai nna, dai hpe du mahti daw na rai wu ai: hkum hpe chyawm gaw ga mai na n rai.

⁹Dai mara raw ai hkungga a asai hpe tawn hkungri shakum grup lapri na rai wu ai: ngam ai hpe gaw tawn hkungri a lagaw nhpang e hkyen hkaw na rai wu ai: dai gaw htingrai hkungga rai nga ai.

¹⁰Bai langai mi hpe gaw tara hte maren wan nat hkungga di nna nawng ya na rai wu ai: shing rai hkinjawng wa gaw dai wa a shut ai mara matu htingrai htingrat ya yang, shi mara lawt na ra ai.

¹¹Hkrudu shing n rai u ra kasha lahkawng mung, n jaw lu sai rai yang, shut ai wa gaw shi a mara raw na matu mani ai shadung uma mi htingrai hkungga shatai na rai wu ai: dai gaw htingrai htingrat hkungga rai nga ai majaw, namman mung, lawban mung, dai hta mai bang na n rai.

¹²Dai hpe hkinjawng wa hpang de shi la sa na rai nna, hkinjawng wa gaw dai hta na dum ya na kumhtaw latup mi magra la nhtawm, Yehowa a matu wan hte nawng ai kumhpa hte hpawn, tawn hkungri na wan hta nat nawng na rai wu ai: dai gaw htingrai htingrat hkungga rai nga ai.

¹³Ndai lam langai ngai hta shut hkrup yang, shut ai wa a matu hkinjawng wa gaw shing rai htingrai ya na rai nna, shut ai wa gaw yubak raw dat kau ai hkrum na ra ai: ngam ai hte gaw shadung kumhpa zawn, hkinjawng wa a matu rai nga ai, ngu wu ai.

¹⁴Bai, Yehowa Mawshe hpe tsun wu ai gaw,

¹⁵Kadai rai timung Yehowa hte seng ai chyoi pra ai lam hta n dum shami shut hpyit tawt lai hkrup yang, dai shut ai mara a matu htingrai hkungga di na, chyoi pra ai shara a gumhpraw shen ai joi hku manu sawn nna, ra n rawng ai sagu la Yehowa hpang de la sa lu na rai wu ai:

¹⁶shing rai chyoi pra ai lam shut hpyit tawt lai hkrup ai hte maren, dai lam hpe bai galaw mye nhtawm, dai shut ai a htam manga hta na htammi naw kahtap jaw nna, hkinjawng wa hpe ap ya na rai wu ai: hkinjawng wa mung dai wa a matu mara raw ai sagu la hte htingrai htingrat ya na rai nna, shi yubak raw dat ai hkrum na ra ai.

¹⁷Bai masha langai ngai Yehowa hkum da ai lam lama ma galaw hkrup ai rai yang, tinang shut n dum ai rai timung ra rawng nga ai rai nna, de a yubak gun lu na rai wu ai.

¹⁸Dai rai yang mara raw na hkungga a matu sawn yu nna hkrat ang ai hte hte ra n rawng ai sagu la sa jaw lu na rai wu ai: ndum shami shut hpyit kau ai rai timung, dai shut n dum ai wa a matu hkinjawng wa gaw htingrai htingrat ya nna, shi gaw yubak raw dat kau ai hkrum na ra ai.

¹⁹Dai gaw mara raw ai hkungga rai nga ai: gaja wa teng teng dai wa gaw Yehowa a man e mara lu sai rai nga ai, ngu wu ai.