Read Jinghpaw Hanson Version Bible JAW JAU 7 Bible Online

JAW JAU 7 - Jinghpaw Hanson Version Bible bible

JAW JAU 7

¹Da ndai gaw mara raw hkungga a tara rai nga ai: dai gaw chyoi pra htum ai rai nga ai.

²Wan nat hkungga sat ai shara e mara raw hkungga mung sat na rai wu ai; de a sai hpe tawn hkungri ntsa grup lapri bun na rai wu ai.

³De a sau yawng shi nawng ya na rai wu ai: dai nmai hta na sau, pu kan hta kap ai sau,

⁴mashi marung hta kap ai nhkyun tawng lahkawng hte dai hta kap ai sau, nhkyun tawng yan hte nawng sin hta kap ai sap sanap re ai hte la nna, Yehowa a matu wan hte nawng ai hkungga shatai na,

⁵hkinjawng wa gaw dai nlang hte hpe tawn hkungri hta nat nawng na rai wu ai: dai gaw mara raw hkungga rai nga ai.

⁶Dai hkungga shan hpe hkinjawng hta na lasha ni nlang sha mai na rai ma ai: dai hpe chyoi pra ai shara e sha na rai mu ai: dai gaw chyoi pra htum ai rai nga ai.

⁷Mara raw hkungga mung htingrai hkungga zawn rai nga ai rai nna tara langai sha rai nga ai: dai hte hkap htingrai htingrat ya ai hkinjawng wa gaw, dai hkungga shan mai la na rai wu ai.

⁸Masha wa langai ngai e sa jau ai wan nat hkungga hpe hkap nawng ya ai hkinjawng wa gaw, shi nawng ai hkungga hkum a ahpyi la lu na rai wu ai.

⁹Wan htung e kabaw ai shadung kumhpa rai timung, di dam, di hpyen re ai ni hta gumrin ai rai timung, hkap la nawng ya ai hkinjawng wa mai la na rai nga ai.

¹⁰Sau hte kayau ai shadung kumhpa rai timung, sau n rawng ai rai timung, Arun a shadang sha ni nlang maren jawm karan na rai mu ai.

¹¹Da ndai gaw Yehowa hpe nawng jau na mahku hkungga a tara rai nga ai.

¹²Chyeju dum na matu jaw ai rai jang gaw, chyeju dum hkungga ngu na hte rau, sau hte kayau ai matsi n rawng ai muk pa, sau galu ai matsi n rawng ai muk hkrawp, mani ai shadung hpe sau hte kayau nna galaw ai muk pa nawng ya na rai wu ai.

¹³Dai hta kaga mahku hkungga hte seng ai chyeju dum hkungga hte rau, matsi rawng ai muk mung jaw na rai wu ai.

¹⁴Dai kumhpa amyu nlang hta na muk tawng langai langai la nhtawm Yehowa a manawt kumhpa di nna, dai gaw mahku hkungga a asai lapri bun ya ai hkinjawng wa la na rai wu ai.

¹⁵Bai chyeju dum na matu nawng ai mahku hkungga a shan hpe dai shani jang sha kau na rai nga ai:

¹⁶hpang jahpawt du hkra mai ngam na n rai. Rai timung ga shaka da nna jau ai, shing n rai mayu hkungga jau ai rai yang gaw, kumhpa jaw ai shani e sha nna, hpang jahpawt du hkra ngam ai hpe mung, naw mai sha na rai nga ai:

¹⁷masum ya jahpawt du hkra ngam ai ashan hpe gaw, wan hta nat kau na rai wu ai.

¹⁸Rai timung dai mahku hkungga ashan hpe masum ya nhtoi hta sha ai wa gaw sharawng awng ya ai hkrum na n rai: jau ai wa mung chyeju lu la na n rai; dai gaw matsat shabat rai na ra ai rai nna, sha ai wa gaw tinang a yubak hkrum lu na rai wu ai.

¹⁹N san n seng ai arai e hkra sai hkungga shan hpe mai sha na n rai; wan hte nat kau na rai wu ai: san seng ai ni chyu sha dai hkungga shan mai sha na rai ma ai:

²⁰Yehowa hte seng ai mahku hkungga shan hpe n san n seng rai da ninglen sha ai wa kadai mung, shi a amyu hta na sumri dan kau ya ai hkrum na ra ai.

²¹Masha hta na wu sin ai arai, yamnga hta na matsat shabat hpa hte, n san n seng ai hpa baw matsat shabat rai timung hkra da nhtawm, Yehowa hte seng ai mahku hkungga shan sha ai wa kadai mung, shi a amyu hta na sumri dan kau ya ai hkrum lu na wu ai, ngu wu ai.

²²Bai Yehowa Mawshe hpe tsun wu ai gaw,

²³Israela a kashu kasha ni hpe ning ngu tsun u: Nanhte gaw dumsu hte sagu bainam re ai ni a sau man sha lu na myit dai n rai:

²⁴shi hkrai si ai hte matse labye e kawa sat ai sau hpe kaga lam hta lang lu rai timung, gaja nan sha lu na myit dai n rai.

²⁵Kadai rai timung, Yehowa hpe wan hte nawng jau ai hkungga hta na sau man sha ai wa gaw, shi a amyu hta na sumri dan kau ya ai hkrum lu na wu ai.

²⁶Nanhte a nga shara shagu hta awu sai, ashan sai re ai hpa baw a sai rai timung, sha lu na myit dai n rai.

²⁷Lama ma a sai sha hkrup ai wa gaw, shi amyu hta na sumri dan kau ya ai hkrum na wu ai, ngu wu ai.

²⁸Bai Yehowa Mawshe hpe tsun wu ai gaw,

²⁹Israela kashu kasha ni hpe ning ngu tsun u: Yehowa hpe mahku hkungga jaw ai wa gaw, shi jaw ai hkungga hta na Yehowa hpe nawng na hte la sa na rai wu ai:

³⁰Yehowa a matu wan hte nawng ai hkungga hpe shi hkum nan la sa na rai wu ai: Yehowa a man e dai sinda hpe nwat hkungga di na matu, sau man hte hpawn la sa na rai wu ai.

³¹Shing rai hkinjawng wa gaw, dai sau hpe tawn hkungri hta nat na rai wu ai: sinda gaw Arun hte shi a shadang sha ni la na rai mu ai.

³²Bai mahku hkungga a hkra magyi hpe manawt hkungga a matu hkinjawng wa hpe sa ya na rai mu ai.

³³Arun a shadang sha ni hta na dai mahku hkungga a asai hte sau man hpe la nawng ya ai wa gaw dai hkra magyi la na rai wu ai.

³⁴Kaning rai nme law, Israela kashu kasha ni jaw ai mahku hkungga ni hta na, dai nwat sinda hte manawt magyi hpe ngai di la nna, hkinjawng wa Arun hte shi a shadang sha ni hpe, htani htana na kumhpaw jaw da se ai, ngu wu ai.

³⁵Dai gaw, Arun hte shi a shadang sha ni Yehowa a man e hkinjawng amu gun hpai nga na matu, shanhte hpe aya dang ai shani e Yehowa hpe wan hte nawng ai kumhpa ni hta na, shanhte lu la ai namman chya ya ai kumhtaw rai malu ai; Israela a kashu kasha ni a lata na kumhtaw dai lu la na matu, Yehowa shanhte hpe namman chya ya ai shani e hkang da ai lam rai nga ai: dai gaw shanhte a shu mashi shu masha prat dingsa na kumhtaw rai nga malu ai.

³⁷Dai hte gaw Sina nam mali hkan e Israela kashu kasha ni Yehowa hpe hkungga jaw jau na lam, hkang da ai shaloi e, Sina bum ntsa nna Yehowa Mawshe hpe hkang dat ai,

³⁸Wan nat hkungga, shadung kumhpa, htingrai hkungga, mara raw hkungga, aya dang hkungga hte mahku hkungga ni a tara a lam rai nga ai.