Read Jinghpaw Hanson Version Bible JAW JAU 8 Bible Online

JAW JAU 8 - Jinghpaw Hanson Version Bible bible

JAW JAU 8

¹Bai Yehowa Mawshe hpe tsun wu ai gaw,

²Arun hte shi a shadang sha ni, shanhte a hpun palawng hte chya na namman, htingrai hkungga a usu, dai sagu la lahkawng hte matsi n rawng ai muk ka mi la sa nna,

³shawa sum a chyinghka makau e shawa masha ni nlang hte hpe jahpawng tawn mu, ngu wu ai.

⁴Shaloi Mawshe Yehowa shi hpe hkang ai hte maren galaw wu ai rai nna, shawa masha ni dai shawa sum a chyinghka makau e hpawng nga ma ai.

⁵Shing rai Mawshe gaw, Da ndai gaw nanhte galaw na Yehowa hkang da ai lam rai nga ai, ngu nna hpung masha ni hpe tsun dan wu ai.

⁶Shing rai Mawshe gaw Yehowa hkang da ai hte maren Arun hte shi a shadang sha ni hpe shaga la nna hka shin ya nhtawm,

⁷Arun hpe palawng jahpun nna shingkyit kyit ya wu ai; palawng galu hte hpa hkai lawng mung hpun ya nhtawm hpa hkai lawng a reng ai shingkyit hte dai hpe kyit ya wu ai.

⁸Sinda magap mung shi dagap ya nna, sinda magap a kata e Urim hte Htumim bang da ya wu ai.

⁹Shi a baw hta bunghkaw hkaw ya nna, dai chyoi pra ai ja htan bam mung man maga, bunghkaw hta, bam ya wu ai.

¹⁰Bai, Yehowa hkang da sai hte maren Mawshe gaw chya na namman la nhtawm, sum hte dai sum a rai yawng hpe chya nna shachyoi shapra wu ai.

¹¹Dai namman hte tawn hkungri a ntsa e sanit lang lapri bun nna, tawn hkungri hte seng ai rai nlang hpe mung ntsin htung hte de a shadun hpe mung chya nna shachyoi shapra wu ai.

¹²Dai chya ai namman hpe Arun a baw hta ru jaw nhtawm, shi hpe chya nna shachyoi shapra wu ai.

¹³Arun a shadang sha ni hpe mung, hpun palawng jahpun nna, shingkyit kyit ya ai hte bunghkaw hkaw ya di wu ai.

¹⁴Bai, Yehowa hkang da sai hte maren, htingrai hkungga usu hpe dun la nna, Arun hte shi a shadang sha ni gaw, htingrai hkungga usu a baw hta tinang a lata mara mu ai.

¹⁵Usu dai hpe sat nhtawm, Mawshe gaw asai la nna, tawn hkungri a ntsa grup na nrung ni hpe shi a layung hte chya wu ai; shing rai dai tawn hkungri hpe jasan jaseng ngut jang ngam ai sai hpe gaw tawn hkungri a lagaw nhpang e ru hkaw nna, dai tawn hkungri hta htingrai htingrat na matu shachyoi shapra wu ai.

¹⁶Bai, pu kan hta kap ai sau mahkra, sin hta magap ai sau mahkra, sin hta magap ai sap sanap, nhkyun tawng lahkawng hte dai hta kap ai sau re ai ni hpe la nna, Mawshe gaw tawn hkungri hta dai hpe nat nawng wu ai.

¹⁷Ahpyi, ashan, ahkyi re ai hkum ting hpe gaw dap shinggan e nat kau mu ai.

¹⁸Bai, Yehowa hkang da sai hte maren wan nat hkungga sagu la dun la nna, Arun hte shi a shadang sha ni gaw sagu la a baw hta tinang a lata mara mu ai.

¹⁹Dai sagu hpe sat nhtawm, Mawshe gaw de a asai hte tawn hkungri ntsa grup hpe lapri bun wu ai.

²⁰Sagu hkum hpe mung hpya kahtum nna, baw hte shan tau ni hpe sau man hte rau Mawshe nat nawng wu ai.

²¹Pu sin ni hte lagaw ni hpe mung kashin la nna, Mawshe gaw sagu hkum ting tawn hkungri hta nat nawng wu ai; dai gaw manam pyaw ai wan nat sangau hkungga rai nga ai: Yehowa hpe wan hte jaw jau ai kumhpa rai nga ai.

²²Bai, Yehowa hkang da sai hte maren, kaga san da ai aya dang hkungga sagu la dun la nna, Arun hte shi a shadang sha ni gaw tinang a lata dai sagu baw hta mara mu ai.

²³Sagu dai hpe sat nhtawm Mawshe gaw de a sai la nna, Arun a hkra na lapyen hta mung, hkra lata yung nu hta mung, hkra lagaw yung nu hta mung chya ya wu ai.

²⁴Arun a shadang sha ni hpe mung Mawshe shaga la nna shanhte a hkra na lapyen hta mung, hkra lata yung nu hta mung, hkra lagaw yung nu hta mung dai sai hte chya nhtawm, tawn hkungri ntsa grup e lapri bun wu ai.

²⁵Dai sau man nmai hta na sau, pu kan magap ai sau, sin hta kap ai sap sanap, nhkyun tawng lahkawng hte dai hta kap ai sau, hkra magyi re ai ni hte,

²⁶Yehowa a man e tawn da ai muk ka hta na matsi n rawng ai muk tawng langai mi, sau hte gumrin ai muk pa mi, muk hkrawp pa mi la nna dai muk ni hpe sau man hte magyi hta mara nhtawm,

²⁷Arun a lata hte shi a shadang sha ni a lata hta lang da nna nwat hkungga di na matu Yehowa a man e nwat mu ai.

²⁸Bai dai hpe shanhte a lata na Mawshe dawm la nhtawm, wan nat hkungga ntsa e, tawn hkungri hta e nat shalawm wu ai: dai gaw manam pyaw sangau tai ai aya dang hkungga rai nga ai: Yehowa hpe wan hte jaw jau ai kumhpa mung rai nga ai.

²⁹Bai Mawshe gaw sinda shan la nna, Yehowa a man e nwat hkungga di nwat wu ai: dai aya dang sagu la a sinda gaw Mawshe a kumhtaw rai nga ai.

³⁰Bai Mawshe gaw, chya na namman hte tawn hkungri na asai la nhtawm, Arun hte shi a hpun palawng hta mung, shi a shadang sha ni hte shanhte a hpun palawng ni hta mung lapri bun nna, Arun hte shi a hpun palawng, shi a shadang sha ni hte shanhte a hpung palawng hpe shachyoi shapra wu ai.

³¹Bai Mawshe gaw Arun hte shi a shadang sha ni hpe, Shawa sum a chyinghka makau e dai sagu shan shadu mu: Arun hte shi a shadang sha ni dai sha na rai mu ai, ngu nna Yehowa ngai hpe hkang da sai hte maren, ashan hpe mung, aya dang ai hte seng ai muk ka hta na muk ni hpe mung, dai yang e sha mu.

³²Ngam ai shan hte muk hpe gaw wan hta nat kau mu.

³³Nanhte hpe sanit ya tup aya dang lam tawn da sai majaw, dai aya dang sanit ya garai n gu gu gaw, shawa sum chyinghka nna hkum pru myit.

³⁴Nanhte a matu htingrai htingrat ya na, dai ni ning rai galaw ai gaw, Yehowa hkang da ai hku rai nga ai.

³⁵Dai rai nna, nanhte si ai n hkrum myit ga, sanit ya tup shani shana, shawa sum chyinghka a makau e nga nga nna Yehowa a matsun hkan nga na rai myit dai, nga nna ngai hpe hkang da ni ai, ngu nna tsun mu ai.

³⁶Yehowa Mawshe hpe hkang da mada yawng, Arun hte shi a shadang sha ni hkan galaw ma ai.