Read Jinghpaw Hanson Version Bible JAW JAU 9 Bible Online

JAW JAU 9 - Jinghpaw Hanson Version Bible bible

JAW JAU 9

¹Shing rai, matsat ya ngu na shani e Mawshe gaw Arun hte shi a shadang sha ni hpe mung, Israela salang ni hpe mung shaga la nna Arun hpe tsun wu ai gaw;

²Ya nang htingrai hkungga di na matu ra n rawng ai dumsu kasha langai mi, wan nat hkungga di na matu ra n rawng ai sagu la langai mi la nna, Yehowa a man e nawng jau u, ngu wu ai.

³Bai Israela amyu masha ni hpe, Nanhte mung, htingrai hkungga di na matu, nam la langai mi; wan nat hkungga di na matu ra n rawng ai hte ladu hkrum sai dumsu kasha langai mi, sagu kasha langai mi:

⁴Yehowa a man e mahku hkungga di na matu usu langai mi, sagu la langai mi hte, sau kayau ai shadung kumhpa la wa marit: kaning rai nme law, dai ni Yehowa nanhte kaw dan pru na ra ai, ngu nna tsun mu, ngu wu ai.

⁵Mawshe htet da ai arai ni dai shawa sum a man e shanhte la sa nna, shawa masha ni yawng sit sa let Yehowa a man e tsap nga ma ai.

⁶Shaloi Mawshe gaw, Nanhte hkan galaw na lam gaw, Yehowa hkang da ai hku rai nga ai: shing rai Yehowa a hpung shingkang nanhte a man e dan pru na ra ai ngu mu ai.

⁷Bai Mawshe gaw Arun hpe, Yehowa hkang da ai hte maren, nang dai tawn hkungri de sit sa nna na a matu htingrai hkungga hte wan nat hkungga nawng ya nna, na a matu mung amyu masha ni a matu mung htingrai htingrat ya u: amyu masha ni a kumhpa mung nawng ya nna, shanhte a matu htingrai htingrat ya u, ngu wu ai.

⁸Shing rai Arun gaw tawn hkungri de sit sa nna, shi a matu san da ai htingrai hkungga a dumsu kasha sat wu ai.

⁹Arun a shadang sha ni mung, de a sai shi hpang de la wa ya mu ai rai nna, Arun gaw shi a layung hte dai sai hta kapruk la nhtawm, tawn hkungri a nrung ni hta chya wu ai: ngam ai sai hpe gaw tawn hkungri a lagaw ninghpang e ru hkaw wu ai;

¹⁰htingrai hkungga sau man hte nhkyun sin hta kap ai sap sanap re ai ni hpe tawn hkungri hta nat wu ai: dai gaw Yehowa Mawshe hpe hkang da ai hku rai nga ai.

¹¹Ashan hte ahpyi gaw dap shinggan e nat kau wu ai.

¹²Wan nat hkungga mung sat nhtawm, Arun a shadang sha ni de a sai shi kaw la wa nna, shi gaw dai hpe tawn hkungri ntsa grup lapri wu ai.

¹³Bai shanhte gaw wan nat hkungga a shan tau ni hte abaw wa ya mu ai rai nna, dai hpe tawn hkungri hta nat nawng wu ai.

¹⁴Pu sin ni hte lagaw ni hpe mung lajang kashin nna, tawn hkungri na wan nat hkungga hte rau nat shalawm wu ai.

¹⁵Bai shawa masha ni a kumhpa shi la ya ai hte, shawa masha ni a matu htingrai hkungga tai na bainam hpe dun la nna, dai hpe sat nhtawm, yubak hpe htingrai na matu, shawng na zawn nawng ya wu ai.

¹⁶Dai wan nat hkungga mung shi dun la nna, ga matsun hte maren nawng ya wu ai.

¹⁷Shadung kumhpa mung shi la nna, latup mi magra la nhtawm, jahpawt na wan nat hkungga a makau e tawn hkungri hta nat nawng wu ai.

¹⁸Amyu masha ni a matu mahku hkungga usu hte sagu la hpe mung la sat nhtawm, Arun a shadang sha ni de a asai wa ya mu ai rai nna, shi gaw dai hpe tawn hkungri ntsa grup e lapri wu ai;

¹⁹nmai sau hte pu kan magap ai sau, nhkyun yan hte asin a sap sanap re ai usu hte sagu la a sau re ai ni hpe,

²⁰singda shan ntsa e mara nna tawn hkungri hta nat wu ai:

²¹sinda hte hkra magyi hpe Arun gaw Yehowa a man e nwat hkungga di nna nwat wu ai: shing di galaw ai mung Mawshe tsun da ai hku rai nga ai.

²²Shaloi Arun gaw shi a lata shawa masha ni hpang de sharawt let shanhte hpe shaman ya nhtawm htingrai hkungga, wan nat hkungga hte mahku hkungga re ai ni jau ngut nna yu wa ai.

²³Bai Mawshe yan Arun gaw shawa sum kata de shang nna pru wa nhtawm, amyu masha ni hpe shaman ya mu ai: shaloi Yehowa a hpung shingkang gaw amyu masha ni a man e dan pru nga ai.

²⁴Yehowa kaw na wan pru nna tawn hkungri na wan nat hkungga hte sau man ni hpe hkru kau wu ai: shing rai byin wa ai hpe amyu masha ni mu jang, shanhte jahtau garu nna dingnyawm dagup nga ma ai.