Read Jinghpaw Hanson Version Bible YEREMIA 43 Bible Online

YEREMIA 43 - Jinghpaw Hanson Version Bible bible

YEREMIA 43

¹Ya Yeremia gaw, shanhte a Karai Kasang Yehowa hkang da mada hte maren, mung masha ni mahkra hpe htawn tsun nna, shana dat ngut jang,

²Hoshaia kasha Azaria, Karea kasha Yohanan hte myit kaba ai masha ni nlang, Yeremia hpe, Nang masu ga tsun ndai; Egutu mung hta shingbyi nga na matu, nanhte yu wa lu na myit dai n rai, nga nna anhte a Karai Kasang Yehowa nang hpe tsun shangun ai n rai;

³Hkalde masha ni gaw, anhte hpe sat kau nna, Babelon mare de rim woi wa shangun hkra, shanhte a lata hta anhte hpe ap kau na matu, Neria kasha Baruk gaw, nang hpe anhte a lam gumlau nga ai, ngu nna tsun nhtawm,

⁴Karea kasha Yohanan, luksuk ni a bu ni hte mung masha ni mahkra gaw, Yuda mung hta shingbyi nga mu, nga ai Yehowa ga n madat ma ai.

⁵Shing rai Karea kasha Yohanan hte, luksuk ni a hpyen du ni mahkra gaw, mung shagu de shabra kau hkrum nna, Yuda mung hta bai shingbyi nga na matu, nhtang wa ai, Yuda amyu hta naw ngam nga ai,

⁶lasha, numsha ma kaji, hkawhkam shayi sha ni hte, sin langa ni a hpyen du Nebuzaradan, Shahpan a kashu, Ahikam a kasha Gedalia lata hta ap ya ai mung masha ni mahkra hpe mung, myihtoi Yeremia hte Neria kasha Baruk hpe mung, woi la nna,

⁷Egutu mung de du ma ai; shanhte gaw Yehowa a nsen n madat ai, Tahpan mare e sa nga ma ai.

⁸Shaloi Yehowa a mungga, Tahpan mare e Yeremia kaw du nna,

⁹Nlung kaba la nhtawm, Tahpan mare Hpara-u a htingnu chyinghka lam makau e nga ai, wut kabaw ai ga hta, Yuda masha ni a man e, engade hte lup makoi da nna shanhte hpe,

¹⁰Israela Karai Kasang Zaw nawng zaw wa up ai Yehowa ning nga ai: Yu mu, ngai gaw nye a shangun ma, Babelon hkawhkam Nebuhkadneza hpe shaga la nna, shi a tingnyang hpe, ngai lup makoi da ai nlung ni a ntsa e shadun da na nngai; shi gaw shi a hkawhkam sum hpe dai nlung ni a ntsa e hpyan tawn na ra ai.

¹¹Shi gaw sa du nna Egutu mung hpe shaza kau na ra ai; si ging ai ni hpe si ai de, bawng dung ging ai ni hpe bawng dung ai de, sat kau ging ai ni hpe sat kau ai de ap kau na ra ai.

¹²Ngai gaw Egutu hpara ni a nta ni hpe nat kau na nngai; shi gaw nta ni hpe nat kau nna, sumla ni hpe hpai kau na ra ai: sagu rem wa gaw tinang nba lawai ai zawn, shi gaw Egutu mung hpe lawai nna, dai hta na ngwipyaw ai hte pru na ra ai.

¹³Dai hta kaga shi gaw, Egutu mung, Bet-sheme mare na nlung shadaw ni hpe agrawp kau nna, Egutu hpara ni a nta ni hpe nat kau na ru ai, nga ai.