Read Jinghpaw Hanson Version Bible DANIELA 1 Bible Online

DANIELA 1 - Jinghpaw Hanson Version Bible bible

DANIELA 1

¹Yuda hkawhkam Yehoiakim hkaw dung ai masum ning e, Babelon hkawhkam Nebuhkadneza gaw, Yerusalem mare hpe lung gasat nna, wang tawn wu ai.

²Ya Madu gaw, Yuda hkawhkam Yehoiakim hte, Karai Kasang nta na arai nkau mi hpe, Nebuhkadneza lata hta ap ya kau nna, shi gaw dai arai ni hpe, Shina mung e nga ai, shi a hpara nta de la wa nhtawm, shi a hpara nta sutdek hta bang da wu ai.

³Shaloi hkawhkam wa gaw, unuk ni a agyi Ashpena hpe shaga la nna, ra n rawng ai, hpraw tsawm ai hte, hpaji byeng-ya amyu myu, chye chyang ai hte maka kumla pru nna, hkawhkam htingnu hta amu galaw mai ai, Israela kashu kasha shabrang nkau mi hpe

⁴hkawhkam amyu hta na mung, arawng lu ai ni hta na mung, lata la nhtawm, Hkalde masha ni a laika hte tsun ai ga, shanhte hpe sharin achyin ya na lam, shi hpe hkang da wu ai.

⁵Dai hta kaga hkawhkam wa gaw, shi a sha ku na shat hte, shi lu ai tsabyi jahku hta na, shani shagu shanhte hpe karan jaw nna, masum ning tup bau nhtawm, hkawhkam wa man e shang lu na lam, hkang da wu ai.

⁶Ya dai shabrang ni hta, Yuda amyu na Daniela, Hanania, Mishaela hte Azaria, lawm ma ai.

⁷Unuk ni a agyi wa gaw shanhte a amying lai nna, Daniela hpe Belteshaza, Hanania hpe Shadrak, Mishaela hpe Meshak, Azaria hpe Abed-nego, ngu nna shamying mu ai.

⁸Daniela chyawm gaw, hkawhkam wa karan jaw ai shat hte, shi lu ai tsabyi jahku hpe n lu n sha ai sha, awu asin hpe koi gam na nga, myit jahkut da wu ai: dai rai nna, awu asin n hkrum u ga, shi gaw unuk ni a agyi wa hpe hpyi wu ai.

⁹Daniela gaw unuk ni a agyi wa man e, matsan dum ai hte myi man pa ai hkrum u ga, Karai Kasang shabyin wu ai.

¹⁰Rai timung, unuk ni a agyi wa gaw, “Nanhte a matu shahpa hte luhpa san da ai, nye a madu hkawhkam wa hpe, ngai hkrit nngai: nanhte a myi man gaw rau ram prat ni a myi man daram n tsawm ai hpe, shi mu jang, nanhte a majaw nye baw sum na, tsang shara nga ai, n rai ni?” ngu nna Daniela hpe tsun wu ai.

¹¹Shaloi Daniela gaw, shi hte Hanania, Mishaela, Azaria hte hpe yu lajang na matu, unuk ni a agyi san tawn da ai shat shadu wa hpe,

¹²“Nhtoi shi ya tup, na a mayam ni hpe namlaw namlap hte ntsin sha jaw chyam yu mi:

¹³dai hpang anhte a myi man hte, hkawhkam wa sha ku na shat sha ai shabrang ni a myi man hpe, nang shadawn yu n ga: nang nan mu ai hte maren, na a mayam ni hpe di mi,” ngu nna tsun wu ai.

¹⁴Shat shadu wa mung yin la nna, nhtoi shi ya tup shanhte hpe chyam yu wu ai.

¹⁵Ya nhtoi shi ya lai yang, shanhte a myi man gaw, hkawhkam a sha ku na shat sha ai shabrang ni a myi man hta, grau tsawm nna hpum nga malu ai.

¹⁶Dai rai nna shat shadu wa gaw, shanhte a shat hpe mung, shanhte lu na tsabyi jahku hpe mung, dawm la nna, namlaw namlap sha jaw mu ai.

¹⁷Ya Karai Kasang gaw dai shabrang mali hpe, laika chye ai hte hpaji byeng-ya amyu myu hta nyan rawng nna, chye chyang ai myit, jaw manu ai: Daniela mung, shingran hte yup mang amyu myu chye htai ai nyan hpring nga ai.

¹⁸Dai shabrang ni hpe jashawn na matu, hkawhkam wa madat da ai aten du jang, unuk ni a agyi gaw, shanhte hpe Nebuhkadneza man de woi jashawn nna,

¹⁹hkawhkam wa gaw shanhte hte tsun chyai nga ai; nlang hte hta, Daniela, Hanania, Mishaela, Azaria hte bung ai wa langai mi n nga ai: dai re ai majaw shanhte gaw hkawhkam wa man e tsap nga lu ma ai.

²⁰Hkawhkam wa san yu ai hpaji byeng-ya hte, chye chyang ai lam mahkra hpe, dai shabrang ni gaw, mungdan ting a lakle sara ni hte, htamshi grau nna chye ma ai.

²¹Daniela chyawm gaw, Kuru hkawhkam hkaw dung ai shawng shaning du hkra, nga nga ai.