Read Jinghpaw Hanson Version Bible DANIELA 10 Bible Online

DANIELA 10 - Jinghpaw Hanson Version Bible bible

DANIELA 10

¹Ya Persi hkawhkam Kuru hkaw dung ai masum ning hta e, Belteshaza ngu ai Daniela gaw, shingran langai mi hkam la nga ai: dai shingran gaw teng nga nna, hpyen majan kaba hte seng nga ai: shi gaw dai lam hpe chye na nna, dai shingran a lachyum chye na wu ai.

²Ngai Daniela gaw ndai aten hta, nhtoi bat masum tup, yawn hkyen nga nngai.

³Ndai nhtoi bat masum gu wa ai du hkra, ngai gaw dwi ai muk n sha, ashan hte tsabyi jahku hpe n chyim yu ai hte, nye hkum hpe sau chya ai n rai.

⁴Ya ngai gaw shawng shata a hkun mali ya e, hka nu kaba Hidekela makau e nga nga yang,

⁵ngai mada yu nna, yu u, Lachyit nba bu hpun nna, Uhpaza ja jet shingkyit kyit let, masha langai mi tsap nga ai hpe, ngai mu nngai:

⁶shi a hkum gaw mek-yoi, shi a myi man gaw myihprap, shi a myi gaw wan shanan, shi a lagaw lata kabrim ai magri zawn rai nga nna, shi shaga ai nsen gaw, wunawng wuwa a nsen hte bung nga ai.

⁷Dai shingran hpe ngai Daniela hkrai mu lu nngai: ngai hte rau nga ai manang ni dai shingran hpe n mu lu timung, shanhte gaw grai hkrit gari ai hkrum nna, tinang hkum hpe makoi na, hprawng ma ai.

⁸Shing rai ngai hkrai hti nga nna, dai shingran kaba hpe mu ai majaw, gawng kya nngai; nye a myi man mung sum wa nna, hpa n-gun n rawng nngai.

⁹Rai timung, dai wa a nsen hpe ngai na nngai; ya shiga tsun ai nsen ngai na yang, ngai ga de gum dagup nna, nawng mat nga nngai.

¹⁰Shaloi yu u, lata hkawn mi ngai hpe ahtawk nna, lahput hte lata lahpan e madi nga shangun nngai.

¹¹Bai shi gaw, “Grai tsawra hkam ai Daniela e, nye a ga chye na nna, jan rai tsap u: nang nga ai de, ngai hpe ya shangun dat nngai,” nga nna tsun yang, ngai gaw gari let jan rai tsap nga nngai.

¹²Shaloi shi gaw, “Daniela e, hkum hkrit et; chye na lu na matu mung, na a Karai Kasang man e na a myit shanem na matu mung, nang myit shada da ai shawng shani kaw nna, na a ga hpe na la lu ai: na a ga majaw mung, ngai du ni ai.

¹³Rai timung Persi mungdan a du gaw, nhtoi hkun langai ya tup ngai hpe hkap shadang da nngai: dai hpang, yu u, Mihkaela mying ai du kaba langai mi, ngai hpe sa karum nna, ngai gaw dai shara hta Persi hkawhkam ni hte e hti nga nngai.

¹⁴Ya chyawm gaw, na a amyu masha ni hta htawm hpang e byin na ra ai amu a lam ni hpe, nang hpe chye na shangun na matu, ngai du ni ai; ndai shingran gaw naw na ai aten hte seng nga ai,” nga nna ngai hpe tsun ai.

¹⁵Shing nga ga tsun ai hpang, ngai ga de gum dagup nna, ga n tsun lu nngai.

¹⁶Shaloi yu u, masha kasha nsan ai wa langai mi gaw nye a n-gup hpe ahtawk ya ai; shing rai ngai n-gup hpaw nna, “Nye a madu e, ndai shingran majaw, nye a ntsa e yawn hkyen ai du nna, ngai gawng kya nga nngai.

¹⁷Kaning rai nme law, na mayam wa gaw, nang madu hte kaning rai ga tsun lu na rai ta? ya e pyi ngai n-gun n rawng nngai, nye a nsoi nsa mung htum sai,” ngu nna nye makau e tsap nga ai wa hpe, ga tsun nngai.

¹⁸Shaloi masha nsan ai wa langai mi ngai hpe bai ahtawk nna, n-gun shaja nngai.

¹⁹Bai shi gaw, “Grai tsawra hkam ai wa e, hkum hkrit et; nang ngwipyaw nga n ga; n-gun ja u, gaja wa n-gun ja u,” nga nna tsun ai. Shing nga tsun nga yang, ngai n-gun lu la nna, “Nye a madu ga tsun u ga; nang ngai hpe n-gun jaw nit dai,” nga nna tsun nngai.

²⁰Shaloi dai wa gaw, “ngai nang hpang de sa wa ai lam, nang chye na n ni? Persi du hpe hpyen gasat na matu, ya ngai nhtang wa na nngai: dai kaw na pru yang, yu u, Heleni du paw pru na ra ai.

²¹Rai timung, tengman ai laika hta tawk ka ai ga ngai nang hpe naw madun na nngai: ndai du lahkawng hpe gasat na nga, nanhte a du Mihkaela hta kaga, ngai hpe shingdep shingtau ai wa n nga ai.”