Read Jinghpaw Hanson Version Bible DANIELA 11 Bible Online

DANIELA 11 - Jinghpaw Hanson Version Bible bible

DANIELA 11

¹“Ngai mung Medi amyu, Dari hkaw dung ai shawng shaning hta e, Mihkaela hpe n-gun shaja nna, shagrin da na matu, rawt nngai.

²Ya chyawm gaw, ngai nang hpe tengman ai lam madun na de ai. Yu u, Persi mung hta e hkawhkam masum naw paw pru na ra ai; mali ngu na wa gaw, kaga mahkra hta sutgan grau lu na ra ai: shi gaw sut su ai majaw, daru magam an wa yang, Heleni mung hpe hpyen gasat na matu, masha yawng mayawng hpe rawt shangun na ra ai.

³Shaloi, n-gun atsam rawng nna, up ai ahkang aya kaba lu ai hte, galaw mayu ai hte maren, galaw na ra ai hkawhkam langai mi, paw pru na ra ai.

⁴Dai wa n-gun an wa yang, shi a mungdan agrawp kau ai hkrum nna, sumsing lamu man mali ang hkra, karan la na mara ai; rai timung up ai ni gaw shi a aru arat, n rai, up ai ahkang aya mung shi zawn lu na n rai: kaning rai nme law, shi a mungdan gaw baw kau ai hkrum nna, hpyen du ni up lu ai mungdaw hta kaga, masha gale mung up lu na ra ai.

⁵Ya dingda hkawhkam wa hte shi a hpyen du langai mi n-gun ja na ra ai: hpyen du wa chyawm gaw, hkawhkam wa hta n-gun grau ja nna, up ai ahkang aya lu la na ra ai: shi up ai ahkang aya gaw, grai dam lada na ra ai.

⁶Dai hpang shaning tsawmra na jang, hkawhkam lahkawng shada matut na mara ai rai nna, dingda hkawhkam a shayi sha gaw, amu mye na matu, dingdung hkawhkam hpang de du na ra ai: rai timung, shi a lata lapyin rawng na n rai; dingdung hkawhkam wa hte shi a n-gun mung, grin nga na n rai: hkawhkam shayi sha mung, shi hpe hkan sa ai ni mung, shi hpe shaprat ai wa mung, ndai aten e shi hpe shadaw ai wa mung, shaden jahka kau ai hkrum na mara ai.”

⁷“Rai timung, dai shayi sha a aru hta na, kawa a malai, makrung langai mi paw pru nna, shi gaw luksuk laba ni hpe woi let, dingdung hkawhkam a hpyen dap hta shang nhtawm, shi a hpyen ni hpe adip arip di yang, shanhte hpe dang kau na ra ai:

⁸shanhte a hpara ni, jaw ai sumla ni hte, de a tsawm htap ai, aja, gumhpraw gawm ni hpe, Egutu mung de rim la mat wa na ra ai; dai hpang shi gaw dingdung hkawhkam hpe tsawmra ning hpyen gasat na, n rai.

⁹Dingdung hkawhkam wa chyawm gaw, dingda hkawhkam a mungdan hta shang lu timung, tinang a buga de nhtang wa na ra ai.”

¹⁰“Dai hpang shi a shadang sha yan hpyen sharawt nna, luksuk laba law law jahpawng tawn nhtawm, dai ni gaw mung hpe ga lim kabye kau nna, shi a hpyen dap du hkra gasat hpang na mara ai.

¹¹Shing rai dingda hkawhkam wa gaw grai myit kahtet nna, dingdung hkawhkam wa hpe hkap gasat na ra ai: shi gaw luksuk laba wunawng wuwa jahpawng tawn timung, dingda hkawhkam shanhte hpe dang kau na ra ai.

¹²Dai wunawng wuwa ni bawng rim wa ai hkrum nna, dingda hkawhkam wa a myit masin kabu na ra ai; shi gaw hkying mun ni hpe dang kau timung, dai hta shi a matu akyu n pru nga ai.

¹³Kaning rai nme law, dingdung hkawhkam wa gaw bai wa nna, shawng na hta grau law ai wunawng wuwa ni hpe jahpawng nhtawm, aten ladaw lai jang, luksuk laba kaba arung arai law law hte, bai du na ra ai.

¹⁴Dai aten e masha law law wa dingda hkawhkam wa hpe gumlau na mara ai: shingran ga hpe shadik na matu, na a amyu masha ni a pagawn para re ai kasha ni kabrawng rawt timung, shanhte kadawng na mara ai.

¹⁵Shing rai dingdung hkawhkam sa wa nna, kaduk htu nhtawm, bunghku kaba kum ai mare hpe gasat la na ra ai: dingda luksuk ni n tsap lu ai hte, shi san da ai masha ni hta, hkap gasat na n-gun n rawng nga ai.

¹⁶Shi hpe gasat sa wa ai wa gaw, shi ra ai hte maren galaw nna, shi a man e kadai n tsap lu na ra ai: shi gaw reng htum ai mungdan hta tsap nga nna, shi a lata hta hten byak ai lang na ra ai.

¹⁷Shi gaw, shi a mungdan a n-gun mahkra hte sa du nna, mye lu na lam shapraw na matu, shakut sharang nga ai hte, dai lam mung galaw nga ai: dai mung hpe jahten na matu, shi gaw dingda hkawhkam wa hpe shayi sha mung ya sha na ra ai: rai timung shi daw ai lam n byin nna, shi a matu akyu n pru nga ai.

¹⁸Dai rai nna shi gaw zunlawng ni a maga de myi man yawng nna, law law hpe gasat dang la lu ai; rai timung, hpyen du langai mi gaw, shi kaw na pru ai arawng jahpoi ai lam, jahtum kau na ra ai: gaja wa, shi kaw na pru ai arawng jahpoi ai lam, shi hkum ntsa e nhtang shangun na ra ai.

¹⁹Dai hpang shi gaw nhtang wa nna, shi a mung na hpyen dap ni hpe shagrin mayu timung, shi kadawng hkrat wa nna, shi hpe bai n mu lu na ra ai.”

²⁰“Dai hpang, hpung shingkang rawng htum ai mungdan hta, hkanse hta na matu, jawt hkawm ai wa shangun ai hkawhkam langai mi, kawa malai paw pru na ra ai: rai timung, shi gaw gade n na jang, pawt sindawng ai hku mung n rai, hpyen gasat ai hku mung n rai, agrawp kau ai hkrum na ra ai.

²¹Bai, dai hkawhkam wa a malai, hkawhkam hkringhtawng n dagraw ang ai, n shawp ai wa langai mi paw pru na ra ai: shi gaw ginwan gale ai aten e du nna, hkalem hkalau ai ga hte mungdan hpe lu la na ra ai.

²²Ga lim nga ai wunawng wuwa ni shi a man e lup mat nna, agrawp kau ai hkrum na mara ai: gaja wa, ga shaka hte tawn da ai du wa mung, agrawp kau ai hkrum na ra ai.

²³Dai hkawhkam wa hte ga sadi tawn da ai hpang, shi gaw hkalem ai hku hkan na ra ai: shing rai shi gaw lung wa nna, masha n law timung, n-gun ja na ra ai.

²⁴Ginwan gale ai aten e shi gaw dai mungdaw a ga sau htum ai shara ni hta du nna, shi a kawa mung, shi a kaji kawa ni mung, n galaw yu ai lam, shi galaw na ra ai: shi gaw hkan nang ai ni hpe lanep, arung arai hte sutgan karan ayai na ra ai: gaja wa shi gaw, hpyen majan baw na lam, tawng marang mi hpaji daw na ra ai.

²⁵Bai shi gaw hpyen luksuk law law hte dingda hkawhkam wa hpe gasat na matu, shi a n-gun hte nden ja ai myit shaja na ra ai: dingda hkawhkam wa mung, nachying law ai hpyen luksuk ni hte hkap gasat timung, shi gaw dang lu na n rai: kaning rai nme law, shanhte gaw hkalem ai hku shi hpe di na maru ai.

²⁶Gaja wa, shi a shat sha ai ni pyi shi hpe agrawp kau nna, shi a hpyen luksuk ni lup mat ai hkrum nna, law law wa, kadawng jahkrat kau ai hte sat kau ai hkrum na mara ai.

²⁷Ndai hkawhkam yan gaw myit magaw ai hku maw nna, sha ku langai hta sha shada masu ai ga tsun timung, dai hku byin lu na n rai; kaning rai nme law, ndat da ai aten hta, de a jahtum rai na ra ai.”

²⁸“Dai hpang dingdung hkawhkam wa gaw, arung arai law law hte, shi a mung de nhtang wa nga yang, dai chyoi pra ai ga shaka hpe n dawng n yawt ai myit rawng ai hte maren shari nna, tinang a mung de nhtang wa na ra ai.

²⁹Ya, ndat da ai aten e, shi bai wa nna, dingda mung de shang na ra ai: rai timung, ya aten e shawng na hte bung ai n rai:

³⁰kaning rai nme law, Kitim sanghpaw li ni shi hpe hkum shadang na ra ai: dai majaw shi gaw myit n pyaw let nhtang wa nna, chyoi pra ai ga shaka hpe pawt sindawng ai myit hte shari na ra ai: shing rai shi nhtang wa nna, dai chyoi pra ai ga shaka hpe gumlau kau da ai ni hte jinghku hku na ra ai.

³¹Shi a hpyen luksuk ni sin nga nna, bunghku kum ai chyoi pra ai nta hpe awu asin di kau ai hte, tutnawng nawng ya ai wan nat hkungga hpe hkum kau nna, jahten shabyak chye ai matsat shabat kumla hpe shadun da na mara ai.

³²Dai ga shaka hpe n tara ai hku galaw ai ni gaw, shi a hkalem hkalau ai ga hkan nang nna, lam dam na mara ai: tinang a Karai Kasang hpe dum chye ai amyu chyawm gaw, n-gun ja wa nna, amu magam galaw lu na ra ai.

³³Amyu masha ni hta nyan rawng ai ni gaw, masha law law hpe sharin achyin na mara ai: rai timung shanhte gaw nhtoi tsawmra na hkra, ri nhtu, wan nat ai, bawng dung ai hte kashun kashe hkrum na mara ai.

³⁴Ya shanhte kadawng wa jang, karum ai lam kaji mi, shanhte a matu, pru na ra ai: rai timung, masha law law wa hkalem hkalau ai hku hkan nang nna, shanhte hte matut manoi na mara ai.

³⁵Hpang jahtum na aten du hkra, mung masha ni san seng, chyoi pra ai hte hpraw wa shangun na matu, nyan rawng ai ni nkau mi gaw, asak sum na mara ai: kaning rai nme law, dai amu gaw ndat da ai aten e byin na ra ai.”

³⁶“Dai hkawhkam wa gaw shi myit ra ai hte maren galaw nna, hpara ni mahkra ntsa e tinang hkum hpe shagrau shatsaw ai hte, hpara ni a Karai Kasang hpe shinggan kau nna, mauhpa ga tsun na ra ai; pawt sindawng hpring ai aten du hkra, shi awng wa na ra ai; kaning rai nme law ndat da ai lam gaw dik wa na ra ai.

³⁷Dai wa gaw shi a kaji kawa ni a hpara ni hpe mung, numsha ni nawku ra ai hpara hte, kadai hpara hpe mung, nawn nga ai n rai: shi gaw nlang hte a ntsa e tinang hkum hpe shagrau shatsaw na ra ai.

³⁸Dai hpara ni a malai, shi gaw hpyen dap ni a hpara hpe hkungga lara na ra ai: shi a kaji kawa ni n chye ai hpara hpe mung, shi hkungga lara nna, aja hte gumhpraw, lungseng hte gali lakan nawng ya na ra ai.

³⁹Shi gaw hpara tsasam karum ai hte, grau ngang ai hpyen dap ni hpe gasat dang na ra ai: shi hte matut ai wa kadai mung, shi kaw na arawng sadang lu la nna, masha law law ntsa e up lu ai ahkang hte, sake manawn majaw, mungdan karan na ra ai.”

⁴⁰“Ya de a ladaw htum wa mahka e, dingda hkawhkam wa gaw, shi hpe htim gasat na ra ai: dingdung hkawhkam wa chyawm gaw, hpyen leng, hpyen gumra, sanghpaw li law law hte hpawn, bungsha zawn ru lung wa let, dai mung ni hta shang nna, lim kabye ga lai kau na ra ai.

⁴¹Shi gaw reng htum ai mung hta mung shang nna, mung law law kadawng kau ai hkrum na ra ai: rai timung, Edom mung, Moba mung hte Ammon kashu kasha ni malawng maga, shi a lata na lawt lu na mara ai.

⁴²Bai shi gaw, grup yin na mung ni a ntsa e, shi a lata ladawn nna, Egutu mung pyi lawt lu na, n rai.

⁴³Egutu mung hta mahkawng da ai aja gumhpraw hte hpu ai baw mahkra hpe shi madu lu nna, Libi hte Hkusha masha ni gaw, shi kaw hkan nang na mara ai.

⁴⁴Rai timung, sinpraw hte dingdung maga de na pru ai shiga majaw, shi myit ru nna, masha law law hpe shagrawm shamyit kau na matu, n-yun bu let pru sa wa na ra ai.

⁴⁵Shi gaw, nammukdara hte reng htum nna chyoi pra ai bum lapran e, shi a htingnu sum ni hpe gap da na ra ai: rai timung, shi hpe karum ai wa kadai n nga ai rai nna, shi htum mat na ra ai.”